அபுதாபியிலிருந்து துபாய் நகரின் மையப்பகுதிக்குச் செல்லும் ஆயிரக்கணக்கான வாகன ஓட்டிகளுக்கு இனி தடையற்ற மற்றும் எளிதான பயண அனுபவம் கிடைக்கவுள்ளது. எமிரேட்டின் பிரதான நெடுஞ்சாலைகளில் ஒன்றான ஷேக் சையத் சாலையில் மேற்கொள்ளப்பட்ட மேம்பாட்டுப் பணிகள் நிறைவடைந்துள்ள நிலையில், புர்ஜ் கலீஃபா/துபாய் மால் மெட்ரோ நிலையம் அருகே கூடுதலாக ஒரு போக்குவரத்துப் பாதை (lane) சேர்க்கப்பட்டுள்ளது. இது சாலையின் வாகனக் கொள்ளளவை அதிகரிப்பதோடு, போக்குவரத்து நெரிசல் மிகுந்த நேரங்களில் பயண நேரத்தைக் குறைக்கவும் உதவுகிறது.
துபாயின் சாலைகள் மற்றும் போக்குவரத்து ஆணையம் (RTA) மேற்கொண்ட முக்கிய சாலை விரிவாக்கத் திட்டம் நிறைவடைந்துள்ளதால், ஷேக் சையத் சாலையில் துபாய் உலக வர்த்தக மையத்தை (Dubai World Trade Centre) நோக்கிச் செல்லும் வாகன ஓட்டிகள் இனி தடையற்ற பயணத்தை அனுபவிக்கலாம்.
2 கி.மீ தூரத்திற்கான இந்த மேம்பாட்டுப் பணியின் மூலம், புர்ஜ் கலீஃபா/துபாய் மால் மெட்ரோ நிலையம் அருகே போக்குவரத்துப் பாதைகளின் எண்ணிக்கை ஆறிலிருந்து ஏழாக உயர்த்தப்பட்டுள்ளது. இது சாலையின் கொள்ளளவை 17 சதவீதம் அதிகரிப்பதோடு, நெரிசல் மிகுந்த நேரங்களில் பயண நேரத்தை 10 சதவீதம் வரை குறைக்கும் என்று ஆணையம் தெரிவித்துள்ளது.
ஷேக் சையத் சாலையில் மேற்கொள்ளப்படும் விரிவான போக்குவரத்து மேம்பாட்டுத் திட்டத்தின் ஒரு பகுதியாகவே இத்திட்டம் செயல்படுத்தப்பட்டுள்ளது என்று அதிகாரிகள் தெரிவித்துள்ளனர்.
மேம்படுத்தப்பட்ட இந்தப் பகுதியானது, முக்கிய வணிக, சுற்றுலா மற்றும் குடியிருப்புப் பகுதிகளை நோக்கி தினமும் பயணிக்கும் ஆயிரக்கணக்கான மக்களுக்குப் பயனளிக்கும் என்று எதிர்பார்க்கப்படுகிறது. இப்பகுதிகளில் அடங்குவன:
- துபாய் வேர்ல்ட் ட்ரேட் சென்டர்
- துபாய் இன்டர்நேஷனல் பைனான்சியல் சென்டர் (DIFC)
- மியூசியம் ஆஃப் தி ப்யூச்சர் (Museum of the Future)
- அல் கராமா
- அல் ஜஃபிலியா
- அல் மன்கூல்
துபாய் உலக வர்த்தக மையத்தில் நடைபெறும் பெரிய கண்காட்சிகள் மற்றும் சர்வதேச நிகழ்வுகளின் போது போக்குவரத்தை நிர்வகிக்கவும், முக்கிய வணிகப் பகுதிகள் மற்றும் குடியிருப்புப் பகுதிகளுக்கு இடையிலான இணைப்பை மேம்படுத்தவும் இந்த மாற்றங்கள் உதவும் என்று RTA தெரிவித்துள்ளது.
புதிய மேம்பாலம்
வேர்ல்ட் ட்ரேட் சென்டர் ரவுண்டானா மேம்பாட்டுத் திட்டத்தின் ஒரு பகுதியாக, சமீபத்தில் திறக்கப்பட்ட இரண்டாவது நிலை மேம்பாலத்தைத் (second-level bridge) தொடர்ந்தே இந்தச் சாலை விரிவாக்கப் பணி மேற்கொள்ளப்பட்டுள்ளது.
1,000 மீட்டர் நீளமும் இரண்டு பாதைகளும் கொண்ட இந்த மேம்பாலம், ஒரு மணி நேரத்திற்கு 3,000 வாகனங்கள் வரை கையாளும் திறன் கொண்டது. இது ஷேக் சையத் சாலையிலிருந்து அல் கராமா மற்றும் தேரா திசையில் உள்ள ஷேக் கலீஃபா பின் சையத் ஸ்ட்ரீட்டை நோக்கிச் செல்லும் வாகன ஓட்டிகளுக்குப் பயன்படுகிறது.
இந்தப் பகுதிக்கான பயண நேரத்தை சுமார் ஆறு நிமிடங்களிலிருந்து வெறும் ஒரு நிமிடமாகக் குறைத்துள்ள இந்த மேம்பாலம், பரபரப்பான உலக வர்த்தக மைய ரவுண்டானாவில் ஏற்படும் போக்குவரத்து நெரிசலைக் குறைக்க உதவுகிறது.
இவ்வாறு எமிரேட்டில் போக்குவரத்து வசதியை மேம்படுத்தவும், துபாயின் வளர்ந்து வரும் மக்கள் தொகை, சுற்றுலா மற்றும் பொருளாதார நடவடிக்கைகளுக்கு ஏற்பச் செயல்படவும் மேற்கொள்ளப்படும் போக்குவரத்து உள்கட்டமைப்பு முதலீடுகளின் ஒரு பகுதியாகவே இந்தச் சமீபத்திய சாலை மேம்பாட்டுப் பணிகள் அமைந்துள்ளன என்று RTA தெரிவித்துள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
