ஐக்கிய அரபு அமீரகத்தின் தொலைத்தொடர்பு மற்றும் டிஜிட்டல் அரசு ஒழுங்குமுறை ஆணையம் (TDRA) வெள்ளிக்கிழமையன்று, ஸ்டார்லிங்கிற்கு ‘பொது செயற்கைக்கோள் சேவை உரிமத்தை’ (General Satellite Services Licence) வழங்கியுள்ளது. இந்த உரிமமானது, அமீரகத்தில் செயற்கைக்கோள் பிராட்பேண்ட் இணைய சேவைகளை வழங்க நிறுவனத்தை அனுமதிக்கிறது.
இதன் மூலம், தனிநபர்கள், வணிகங்கள் மற்றும் அரசு நிறுவனங்களுக்கு மட்டுமின்றி, கடல்சார் மற்றும் விமானப் போக்குவரத்துத் துறைகளுக்கும் செயற்கைக்கோள் இணைப்பு சேவைகள் வழங்கப்படும் என்று தெரிவிக்கப்பட்டுள்ளது.
இருப்பினும், இந்நிறுவனத்திற்கு இத்தகைய உரிமம் வழங்கப்படுவது இது முதல் முறையல்ல. முன்னதாக 2024-ல், கடல்சார் செயற்கைக்கோள் இணைய சேவைகளுக்கு மட்டுமே ஸ்டார்லிங்கிற்கு அனுமதி வழங்கப்பட்டிருந்தது. ஏற்கனவே உள்ள ஃபைபர்-ஆப்டிக் (fibre-optic) இணைப்புடன் செயற்கைக்கோள் சேவையையும் இணைப்பதன் மூலம், அமீரகத்தின் டிஜிட்டல் உள்கட்டமைப்பு அமைப்பை மேலும் வலுப்படுத்த இந்த புதிய உரிமம் உதவும் என்று எதிர்பார்க்கப்படுகிறது.
மேலும், அமீரகத்தில் வசிப்பவர்கள் நிறுவனத்தின் இணையதளத்தைப் பயன்படுத்தி இச்சேவையை முன்பதிவு (pre-order) செய்யலாம் என்று கூறப்பட்டுள்ளது.
இது தொடர்பாக ஸ்டார்லிங்க் தனது இணையதளத்தில் வெளியிட்டுள்ள அறிவிப்பில், “சேவை எப்போது கிடைக்கும் என்பதற்கான துல்லியமான காலக்கெடுவை எங்களால் வழங்க முடியாது என்பதைத் தெரிவித்துக் கொள்கிறோம். ஆனால், உலகம் முழுவதும் உள்ள அதிகமான வாடிக்கையாளர்களுக்குச் சேவையை விரிவுபடுத்தும் வகையில், எங்கள் செயற்கைக்கோள் கட்டமைப்பின் (constellation) திறனை அதிகரிக்க எங்கள் குழுவினர் மிக விரைவாகப் பணியாற்றி வருகின்றனர்” என்று குறிப்பிட்டுள்ளது.
இந்த இணைய சேவையை முன்பதிவு செய்வது குறித்த முக்கிய விவரங்கள் இதோ:
விலை, திட்டங்கள் மற்றும் வேகம்
வெளியான தகவலின் படி, வீட்டு உபயோகத்திற்கான திட்டங்களின் விலை மாதத்திற்கு 300 திர்ஹம்ஸ் ஆகும்; இதில் 30 நாள் சோதனைக் காலம் மற்றும் வரம்பற்ற டேட்டா (unlimited data) வசதி ஆகியவை அடங்கும். அதேவேளையில், இதற்கான ஹார்டுவேர் தொகுப்பின் விலை 1,465 திர்ஹம்ஸில் தொடங்குகிறது. இதில் ‘ரூட்டர் 3’ (Wi-Fi 6) சாதனமும் அடங்கும்.
முன்பதிவின் போது 300 திர்ஹம்ஸ் முன்பணம் (deposit) வசூலிக்கப்படும். இது பின்னர் ‘ஸ்டார்லிங்க் கிட்’ (Starlink Kit) விலையிலிருந்து கழித்துக்கொள்ளப்படும் என்று கூறப்பட்டுள்ளது. அதுமட்டுமின்றி, இச்சேவை 400 Mbps-க்கும் அதிகமான வேகத்தை வழங்குகிறது.
முன்பதிவு செய்வது எப்படி?
இச்சேவையை மிகவும் எளிமையாக முன்பதிவு செய்ய முடியும். சில எளிய படிகளில் அதைச் செய்வது எப்படி என்பது இங்கே கொடுக்கப்பட்டுள்ளது:
- அதிகாரப்பூர்வ ஸ்டார்லிங்க் அமீரக இணையதளத்திற்குச் சென்று, ‘Get started’ என்பதைக் கிளிக் செய்யவும்.
- சேவை கிடைக்குமா என்பதைச் சரிபார்க்க உங்கள் இருப்பிடத்தைத் தேர்ந்தெடுக்கவும்.
- முன்பதிவுப் பக்கத்திற்குச் சென்றதும், சேவை மற்றும் ஹார்டுவேர் குறித்த அனைத்து விவரங்களையும் சரிபார்க்கவும். பின்னர் ‘Checkout’ என்பதைக் கிளிக் செய்யவும்.
- இது உங்களை ஒரு படிவத்திற்கு (form) அழைத்துச் செல்லும். அதில் உங்கள் தனிப்பட்ட விவரங்கள், டெலிவரி முகவரி மற்றும் கட்டணம் செலுத்துவதற்கான விவரங்களை நிரப்பவும்.
- கட்டணங்களின் விவரங்கள் பக்கத்தின் வலதுபுறத்தில் தோன்றும். இருப்பினும், தற்போதைய நிலையில், பணம் செலுத்தும் போது வாடிக்கையாளர்கள் முன்பணமாக 285.71 திர்ஹம்ஸ் மட்டுமே செலுத்த வேண்டியிருக்கும்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
