ஈரான் மீண்டும் தாக்குதல் நடத்தினால் தேவையான அனைத்து நடவடிக்கைகளையும் எடுக்க அமீரகம் தயார் – அதிகாரி தகவல்!!

ஈரான் மீண்டும் தாக்குதல்களை நடத்தினால், தனது இறையாண்மை, தேசிய பாதுகாப்பு மற்றும் மக்களைப் பாதுகாப்பதற்காக ஐக்கிய அரபு அமீரகம் (UAE) தேவையான அனைத்து நடவடிக்கைகளையும் எடுக்கும் என்று அமீரகத்தின் மூத்த அதிகாரி ஒருவர் வியாழக்கிழமை தெரிவித்துள்ளார். மேலும், தெஹ்ரானிடமிருந்து வரும் அச்சுறுத்தல்களுக்குப் பதிலளிக்க அனைத்து வாய்ப்புகளும் பரிசீலனையில் உள்ளதாகவும் அவர் எச்சரித்துள்ளார்.

ஐக்கிய அரபு அமீரகத்தின் கூட்டாட்சி தேசிய கவுன்சிலின் (FNC) பாதுகாப்பு, உள்துறை மற்றும் வெளியுறவு விவகாரக் குழுவின் தலைவர் டாக்டர் அலி ரஷித் அல் நுவைமி, துபாயில் நடைபெற்ற ‘யுஏஇ செய்தியாளர்கள் மஜ்லிஸ்’ (UAE Correspondents’ Majlis) நிகழ்வின் போது இவ்வாறு கூறியுள்ளார்.

ஈரான் மீண்டும் தாக்குதல் நடத்தினால் அமீரகம் பதிலடி கொடுக்குமா என்றும், அந்தப் பதிலடி நேரடியானதாக இருக்குமா என்றும் அவரிடம் கேட்கப்பட்ட போது, அதற்கு அவர் “அனைத்தும் (சாத்தியம்)” என்று பதிலளித்துள்ளார்.

ஈரான் ஏவுகணைகள் மற்றும் ட்ரோன்கள் மூலம் அமீரகம் மற்றும் பிற வளைகுடா நாடுகளின் மீது தாக்குதல்களை நடத்தியதைத் தொடர்ந்து, இப்பகுதியில் பல மாதங்களாக பதற்றம் நிலவி வரும் சூழலில் அவரது கருத்துகள் வெளியாகியுள்ளன.

ஐக்கிய அரபு அமீரகம் தனது நிலப்பரப்பின் மீதான தாக்குதல்களைத் தொடர்ந்து கண்டித்து வருகிறது. சர்வதேச சட்டத்திற்கு உட்பட்டு பதிலடி கொடுக்கும் உரிமை தங்களுக்கு உண்டு என்றும் அந்நாடு தெரிவித்துள்ளது. மேலும், தாங்கள் இந்த மோதலில் ஒரு தரப்பினர் அல்ல என்றும், பதற்றத்தைக் குறைக்க வேண்டும் என்றும் ஐக்கிய அரபு அமீரகம் வலியுறுத்தி வருகிறது.

ஈரானுடனான மோதல் பல ஆண்டுகள் நீடிக்குமா?

ஈரானுடனான மோதல், ரஷ்யா-உக்ரைன் போரைப் போல பல ஆண்டுகள் நீடிக்கும் என்று தான் கருதவில்லை என்றும், 2026-ஆம் ஆண்டு முடிவதற்கு முன்பே இது முடிவுக்கு வரக்கூடும் என்றும் அல் நுவைமி தனது கணிப்பை குறிப்பிட்டுள்ளார்.

மேலும், இப்பகுதியில் மீண்டும் மீண்டும் பதற்றம் அதிகரிப்பதும், அவ்வப்போது அமைதி திரும்புவதுமாக நீண்ட காலம் நீடிக்க வாய்ப்புள்ளதா என்று கேட்டதற்கு, தற்போதைய சூழல் ரஷ்யா-உக்ரைன் மோதலில் இருந்து முற்றிலும் மாறுபட்டது என்று அவர் விளக்கமளித்துள்ளார்.

இருப்பினும், மீண்டும் ஒரு முழு அளவிலான போர் ஏற்படுவதற்கான வாய்ப்பை அவர் முற்றிலுமாக நிராகரிக்கவில்லை. நிலைமை என்பது ஈரானியத் தலைவர்களின் முடிவுகள், அவர்களின் உறுதிப்பாடுகள் மற்றும் தங்கள் மக்களுக்காக அவர்கள் விரும்பும் எதிர்காலம் ஆகியவற்றைப் பொறுத்தே அமையும் என்றும் அவர் குறிப்பிட்டுள்ளார்.

அதுமட்டுமின்றி, ஐக்கிய அரபு அமீரகம் ஆரம்பத்திலிருந்தே அரசியல் ரீதியான தீர்வை ஆதரித்து வருவதாகவும், நெருக்கடியைத் தீர்ப்பதில் பிராந்திய நாடுகளின் பங்களிப்பை உள்ளடக்கிய இராஜதந்திர ஈடுபாட்டை விரும்புவதாகவும் அவர் தெரிவித்துள்ளார்.

அதிகாரிகளின் கூற்றுப்படி, பிப்ரவரி 28 அன்று மோதல் தொடங்குவதற்கு முன்பே, பதற்றம் அதிகரிப்பதைத் தடுக்க ஐக்கிய அரபு அமீரகம் இராஜதந்திர நடவடிக்கைகளை மேற்கொண்டிருந்தது. ஜனவரி மாதத்தில், ஈரானுக்கு எதிரான இராணுவ நடவடிக்கைகளுக்குத் தங்கள் வான்வெளி, நிலப்பரப்பு அல்லது கடல் பகுதிகளைப் பயன்படுத்த அனுமதிக்க மாட்டோம் என்றும், இத்தகைய நடவடிக்கைகளுக்குத் தேவையான தளவாட உதவிகளை வழங்க மாட்டோம் என்றும் அந்நாடு மீண்டும் உறுதிப்படுத்தியது.

இத்தகைய முயற்சிகள் இருந்தபோதிலும் மோதல் வெடித்தது. இருப்பினும், ஐக்கிய அரபு அமீரகம் தொடர்ந்து இராஜதந்திர ரீதியிலான தீர்வுக்காகவே வலியுறுத்தி வருகிறது.

அமீரகமும் ஈரானும் நம்பிக்கையை மீண்டும் கட்டியெழுப்ப முடியுமா?

ஐக்கிய அரபு அமீரகத்திற்கும் ஈரானுக்கும் இடையிலான உறவுகள் மேம்பட வாய்ப்புள்ளதா என்பது குறித்து அல் நுவைமி பேசுகையில், நம்பிக்கையை மீண்டும் கட்டியெழுப்ப வெறும் தூதரக உரையாடல்களைத் தொடங்குவது மட்டும் போதாது என்றும், அதற்கு உறுதியான செயல்பாடுகளுடன் கூடிய உண்மையான மாற்றம் தேவை என்றும் கூறியுள்ளார்.

மோதல் தொடங்கிய காலத்திலிருந்து ஈரானின் அரசியல் அமைப்பில் மாற்றங்கள் ஏற்பட்டுள்ளதாகவும், இந்த மாற்றச் செயல்முறை இன்னும் தொடர்ந்து கொண்டிருப்பதாகவும் கூறிய அவர், ஈரானின் நடவடிக்கைகளின் விளைவுகள், நேரடியாக சம்பந்தப்பட்ட நாடுகளைத் தாண்டி, ஒட்டுமொத்த சர்வதேச சமூகத்தையும் பாதிக்கின்றன என்பதையும் வலியுறுத்தியுள்ளார்.

மேலும், தொடர்ந்து பேசுகையில், இந்த மோதலை ஈரான், அமெரிக்கா மற்றும் இஸ்ரேல் ஆகிய நாடுகளுக்கு இடையிலான ஒரு பிணக்காக மட்டும் பார்க்கக்கூடாது. ஏனெனில், இது பிராந்திய மற்றும் உலகளாவிய அளவில் பரந்த தாக்கங்களைக் கொண்டுள்ளது என்று அவர் எடுத்துரைத்துள்ளார்.

மேலும், ஈரானின் தலைமைக்கும் அந்நாட்டு மக்களுக்கும் இடையே வேறுபாடு காட்டிய அல் நுவைமி, ஈரானிய மக்கள் சிறந்த வாழ்க்கையையும் எதிர்காலத்தையும் பெறத் தகுதியானவர்கள் என்றும், எனவே, ஈரானிய அரசாங்கம் தனது அணுகுமுறையை மாற்றிக்கொண்டு, குடிமக்களின் நலனுக்கு முன்னுரிமை அளிப்பதன் மூலம் அவர்களின் துயரத்தைப் போக்க உதவும் என்றும் நம்பிக்கை தெரிவித்துள்ளார்.

தற்போது, ஐக்கிய அரபு அமீரகத்துடனான உறவைச் சீரமைப்பதற்கான முறையான நிபந்தனைகளை அவர் முன்வைக்கவில்லை என்றாலும், போக்கை மாற்றிக்கொள்ள வேண்டிய பொறுப்பு ஈரானின் தலைமையிடமே உள்ளது என்பதை உறுதியாக வலியுறுத்தியுள்ளார்.

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel