ஷார்ஜாவில் வசிக்கும் இந்தியர் ஒருவர், தனது 60-வது பிறந்தநாளுக்கு ஐந்து நாட்களுக்கு முன்பு, UAE லாட்டரியில் சுமார் 5 மில்லியன் திர்ஹாம்ஸ் ரொக்கப்பரிசை வென்றுள்ளார். மூன்று தசாப்தங்களுக்கும் மேலாக ஐக்கிய அரபு அமீரகத்தில் தனது வாழ்க்கையை கட்டமைத்து வந்த அவருக்கு, இந்த வெற்றி ஒரு மிகப்பெரிய திருப்பத்தை ஏற்படுத்தியுள்ளது.
1993-ம் ஆண்டு ஐக்கிய அரபு அமீரகத்திற்கு வந்த கிஷோர் பாண்டுரங் ராவ், அக்டோபர் 3 அன்று நடைபெற்ற ‘லக்கி டே’ (Lucky Day) டிராவில் இரண்டாவது பரிசை வென்றார். அவர் 50 திர்ஹம் கொடுத்து வாங்கிய லாட்டரி சீட்டில், ‘ஈஸி பிக்’ (Easy Pick) வசதியைப் பயன்படுத்தி எண்களைத் தேர்ந்தெடுத்திருந்தார்.
மேலும், டிராவில் இருந்த ஆறு எண்களும் சரியாகப் பொருந்த, அவருக்கு 5 மில்லியன் திர்ஹம் பரிசு கிடைத்தது. இந்த வெற்றி, அமீரகத்தின் ‘கோல்டன் விசா’ (Golden Visa) பெறுவது மற்றும் தனது மனைவியுடன் உலகம் முழுவதும் பயணம் செய்வது போன்ற அவரது நீண்டகால கனவுகளை நனவாக்க வழிவகுத்துள்ளதாக வெற்றியாளர் தெரிவித்துள்ளார்.
30 ஆண்டுகளுக்குப் பிறகு ‘கோல்டன் விசா’ கனவு
துபாய், அஜ்மான், ஷார்ஜா மற்றும் அபுதாபி ஆகிய இடங்களில் பல ஆண்டுகளாக வாழ்ந்து வந்த ராவ், தான் தனது இல்லமாகக் கருதும் இந்த நாட்டில் மூன்று தசாப்தங்களுக்கும் மேலாகக் கழித்துள்ளார்.
அமீரகத்தின் ‘கோல்டன் விசா’ பெறுவது அவரது நீண்டகால விருப்பங்களில் ஒன்றாகும். தற்போது கிடைத்துள்ள இந்த லாட்டரி வெற்றி அவருக்கு அந்த இலக்கை அடைய ஒரு வாய்ப்பை வழங்கியுள்ளது.
இது குறித்து அவர் பேசுகையில், “எப்போதாவது ஒருநாள் கோல்டன் விசா கிடைக்கும் என்று நான் எப்போதும் நம்பியிருந்தேன், இப்போது அதற்கான வாய்ப்பு கிடைத்துள்ளது, அதை நான் நிச்சயமாகப் பயன்படுத்திக்கொள்ள விரும்புகிறேன்.” என்று மகிழ்ச்சி தெரிவித்துள்ளார்.
இந்த எதிர்பாராத வெற்றியை முதலில் யாரிடமும் சொல்லாமல் வைத்திருந்த ராவ், பின்னர் தனது மனைவியிடம் பகிர்ந்துகொண்டார். இதைக் கேட்டு அவர் மிகுந்த மகிழ்ச்சியடைந்ததாகவும் தெரிவித்துள்ளார். இதையடுத்து, இந்தச் செய்தியை ஒரு சிறிய வட்டத்திற்குள் மட்டும் வைத்துக்கொண்டு, அடுத்தகட்ட நடவடிக்கைகளைத் திட்டமிடத் தம்பதியினர் முடிவு செய்துள்ளனர்.
நீண்ட காலம் பிரிந்து வாழ்ந்த பிறகு, தனது குடும்பத்தை மீண்டும் ஐக்கிய அரபு அமீரகத்தில் ஒன்றிணைப்பதே அவரது முக்கிய முன்னுரிமைகளில் ஒன்றாகும்.
மேலும், இந்த வெற்றி, நீண்டகாலமாக அவர் கனவு கண்ட உலகப் பயணத்தையும் நனவாக்கும் நிலைக்குக் கொண்டு வந்துள்ளது. தன்னைப் போலவே பயணங்களை நேசிக்கும் தனது மனைவியுடன் இணைந்து, பல்வேறு நாடுகளுக்குச் செல்ல விரும்புவதாக ராவ் தெரிவித்துள்ளார்.
அதுமட்டுமில்லாமல், கிடைத்த இந்த பெரும் தொகையைத் தனது குடும்பத்தினருக்குப் பயனுள்ள வகையில் எவ்வாறு செலவிடலாம் என்பது குறித்து, அவசரப்படாமல் நிதானமாகச் சிந்தித்து முடிவெடுக்கப்போவதாக ராவ் குறிப்பிட்டுள்ளார்.
தனது வெற்றி மற்றும் முக்கியமான பிறந்தநாளைக் கொண்டாடும் அதே வேளையில், லாட்டரி விளையாட்டுகளில் ஈடுபடும்போது பொறுப்புடன் செலவு செய்வதன் அவசியத்தை ராவ் வலியுறுத்தியுள்ளார்.
“ஒவ்வொருவரும் தங்கள் எல்லைகளை அறிந்திருக்க வேண்டும்,” என்று கூறிய அவர், “தா ன் எவ்வளவு செலவு செய்யலாம் என்பதற்கு ஒரு வரம்பை அவர்கள் நிர்ணயித்துக்கொள்ள வேண்டும்.” என்று அறிவுறுத்தியுள்ளார்.
அமீரகம் மற்றும் வளைகுடாப் பகுதிகளில் உள்ள இந்தியர்கள், UAE லாட்டரி மட்டுமின்றி, பிக் டிக்கெட் உள்ளிட்ட பிற லாட்டரிகளிலும் தொடர்ந்து வெற்றியாளர்களாக அறிவிக்கப்படுகின்றனர். சமீபத்தில் நடைபெற்ற பிக் டிக்கெட் டிராவில் நான்கு இந்தியர்கள் 200 கிராம், 24 காரட் தங்கக் கட்டிகளை வென்றுள்ளனர். அவர்களில் சிலர் தங்கள் பரிசுகளைக் குடும்பத்தினருடனும் நண்பர்களுடனும் பகிர்ந்து கொள்ளத் திட்டமிட்டுள்ள நிலையில், மற்றவர்கள் தங்கள் வெற்றித் தொகையை எவ்வாறு பயன்படுத்துவது என்று இன்னும் முடிவு செய்யவில்லை.
நவம்பர் மாதம் மற்றொரு தங்கக் கட்டி டிரா மற்றும் 25 மில்லியன் திர்ஹாம் மாபெரும் பரிசு திட்டமிடப்பட்டுள்ளதால், வாழ்க்கையை மாற்றும் வெற்றியை எதிர்பார்க்கும் பங்கேற்பாளர்களை பிக் டிக்கெட் தொடர்ந்து ஈர்த்து வருகிறது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
