ஐக்கிய அரபு அமீரகத்தின் அடையாளம் மற்றும் குடியுரிமைக்கான பெடரல் ஆணையம் (ICA) எமிரேட்ஸ் ஐடியின் புதிய மேம்பட்ட பதிப்பை வெளியிடத் தொடங்கியுள்ளது.
இந்த எமிரேட்ஸ் ஐடி -யின் மின்னணு பதிப்பு ICA UAE ஸ்மார்ட் அப்ளிகேஷனில் கிடைக்கும். இது iOS மற்றும் Android போன்களில் இலவசமாக பதிவிறக்கம் செய்யலாம் எனக் கூறப்பட்டுள்ளது.
எமிரேட்ஸ் ஐடி வேண்டி விண்ணப்பித்தவர்கள் தங்களுக்கான ID அச்சிடப்படும் வரை அனைத்து அரசு சேவைகளுக்கும் மின் பதிப்பைப் பயன்படுத்துமாறு ICA கேட்டுக்கொண்டுள்ளது.
அரசாங்க துறைகளில் உத்தியோகபூர்வ நோக்கங்களுக்காக பயன்படுத்துவதை எளிதாக்கும் வகையில் QR குறியீட்டை இது கொண்டிருக்கும் என தெரிவிக்கப்பட்டுள்ளது.
சாதாரண எமிரேட்ஸ் ஐடி போலவே இ-எமிரேட்ஸ் ஐடி செல்லுபடியாகும்.அமீரகத்தில் அறிவிக்கப்பட்டிருக்கும் புதிய அடையாள அட்டைகள் மற்றும் பாஸ்போர்ட்டுகளுக்கு மாறும் திட்டத்தின் ஒரு பகுதியாக இந்த முயற்சி மேற்கொள்ளப்பட்டுள்ளதாக ICA கூறியுள்ளது.
ICA சம்பந்தப்பட்ட அனைத்து அதிகாரிகளுடனும் ஒருங்கிணைந்துள்ளது என்றும் சேவைகள் மற்றும் வணிக வழங்குநர்கள் மின்-எமிரேட்ஸ் ஐடியின் அடிப்படையில் சேவைகளை வழங்க வேண்டும் என்றும் தெரிவித்துள்ளது.
ஐக்கிய அரபு அமீரகத்தின் துணைத் தலைவரும் பிரதமரும் துபாய் ஆட்சியாளருமான மாண்புமிகு ஷேக் முகமது பின் ரஷீத் அல் மக்தூம் அவர்கள் தலைமையிலான அமைச்சரவைக் கூட்டத்திற்குப் பிறகு, எமிராட்டி பாஸ்போர்ட் மற்றும் எமிரேட்ஸ் ஐடிகளுக்கான புதிய வடிவமைப்புகள் கடந்த ஆண்டு நவம்பரில் முதன்முதலில் அறிவிக்கப்பட்டன.
தற்போதைய எமிராட்டி பாஸ்போர்ட் மற்றும் எமிரேட்ஸ் ஐடிகள், கூடுதல் பாதுகாப்பு அம்சங்களுடனும் புதிய வடிவமைப்புகளுடனும் மாற்றப்படும் என்று அப்போது அறிவிக்கப்பட்டது.
அடையாள மோசடியை தவிர்ப்பதற்கும் பயண ஆவணங்களில் தேசிய மற்றும் சர்வதேச நம்பிக்கையை வலுப்படுத்துவதற்கும் புதிய அடையாள ஆவணங்களில் கூடுதல் மின்னணு பாதுகாப்பு அம்சங்கள் இடம்பெறும் என்று குறிப்பிடப்பட்டிருந்தது.
எமிரேட்ஸ் ஐடி என்பது ICA வழங்கிய அடையாள அட்டையாகும், இது அனைத்து ஐக்கிய அரபு அமீரக குடிமக்களுக்கும் குடியிருப்பாளர்களுக்கும் சட்டப்பூர்வ தேவையாகும். இது அரசு சேவைகளைப் பெறப் பயன்படுகிறது.
மேலும், புதிய தொலைபேசி இணைப்புகள், பயன்பாட்டு சேவைகள் மற்றும் விமான நிலையங்களில் ஈகேட்ஸ் மற்றும் ஸ்மார்ட் வாயில்கள் வழியாக இமிக்ரேஷன் சேவை போன்றவற்றிற்காகவும் பயன்படுகிறது.
