ஐக்கிய அரபு அமீரகத்தில் உள்ள இந்திய வெளிநாட்டினரின் மக்கள் தொகை ஒரு தசாப்தத்தில் இரு மடங்கிற்கும் மேலாக அதிகரித்து, சுமார் 4.36 மில்லியனைத் தாண்டியுள்ளதாக மூத்த இந்திய தூதரக அதிகாரிகள் தெரிவித்துள்ளனர். துபாயில் இந்தியா டுடே குழுமம் நடத்திய ‘Indo-UAE Conclave’ நிகழ்வின் போது இந்த புள்ளிவிவரங்கள் வெளியிடப்பட்டுள்ளன. இந்த நிகழ்வில் பேசிய துபாய் மற்றும் வடக்கு எமிரேட்ஸில் உள்ள இந்திய தூதர் சதீஷ் சிவன், மக்கள்தொகை வளர்ச்சியின் அசாதாரண வேகத்தைக் குறிப்பிட்டார். அதில் “டிசம்பர் 2023 வரை, அதிகாரப்பூர்வ எண்ணிக்கை 3.89 மில்லியனாக இருந்தது. இப்போது, ஆறு மாதங்களுக்குள், நாங்கள் 4.36 மில்லியனை எட்டியுள்ளோம்” என்று சிவன் கூறியுள்ளார்.
மேலும், அவர் தொடர்ந்து பேசுகையில், “ஒரு தசாப்தத்திற்கு முன்பு, இந்திய வெளிநாட்டவர்களின் எண்ணிக்கை சுமார் 2.2 மில்லியனாக இருந்தது. பத்து ஆண்டுகளில் நாம் இரட்டிப்பாகிவிட்டோம், இது 2000களின் முற்பகுதியில் இருந்து ஐக்கிய அரபு அமீரகத்தின் முழு மக்கள்தொகையுடன் ஒத்துப்போகிறது.” என்று தெரிவித்துள்ளார்.
இவ்வாறு வேகமாக வளர்ந்து வரும் புள்ளிவிவரங்கள் பிராந்தியத்தில் இந்திய சமூகத்தின் வேகமான வளர்ச்சிக்கு ஒரு சான்றாகும். இதற்கிடையில், ஐக்கிய அரபு அமீரகத்திற்கான இந்திய தூதர் சஞ்சய் சுதிர், இந்திய வெளிநாட்டினர் மக்கள்தொகையில் பாதிக்கும் மேற்பட்டவர்கள் துபாயில் வசிக்கின்றனர், இது இந்தியா-UAE உறவில் நகரத்தின் மையப் பங்கை அடிக்கோடிட்டுக் காட்டுவதாக எடுத்துரைத்துள்ளார்.
“இந்தியா-UAE இடையேயான உறவு வரலாற்று ரீதியாகத் தொடங்கிய இடம் துபாய். எங்கள் முதல் படகுகள் இங்குள்ள போர்ட் ரஷீத்தில் தரையிறங்கின,” என்று கூறிய சுதிர், “இன்று, எங்கள் 4.3 மில்லியன் வலுவான சமூகத்தில் பாதிக்கும் மேற்பட்டவர்கள் துபாயில் வாழ்கின்றனர். எங்கள் முதலீடுகள் மற்றும் பணியாளர்களில் பெரும்பாலோர் இங்குதான் உள்ளனர், மேலும் ஐக்கிய அரபு அமீரகத்தில் உள்ள 60 சதவீதத்திற்கும் அதிகமான CFOக்கள் இந்திய வம்சாவளியைச் சேர்ந்தவர்கள்” என்பதைச் சுட்டிக்காட்டி பேசியுள்ளார்.
அதுமட்டுமில்லாமல், இரு நாடுகளுக்கும் இடையிலான வலுவான இருதரப்பு உறவுகளை மேலும் உறுதிப்படுத்தும் வகையில், ஐக்கிய அரபு அமீரகத்தின் பொருளாதாரத்திற்கு இந்திய புலம்பெயர்ந்தோர் அளித்த குறிப்பிடத்தக்க பங்களிப்பையும் அதிகாரிகள் எடுத்துரைத்ததாகக் கூறப்படுகின்றது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
