ஐக்கிய அரபு அமீரக கோல்டன் விசா பெற்ற 18 வயது இந்திய மாணவரான வைஷ்ணவ் கிருஷ்ணகுமார் என்பவர் தீபாவளி கொண்டாட்டத்தின் போது திடீரென உயிரிழந்துள்ள சம்பவம் அவரின் உறவினர்களையும் நண்பர்களையும் ஆழ்ந்த அதிர்ச்சியிலும் துக்கத்திலும் ஆழ்த்தியுள்ளது. கடந்த செவ்வாய்க்கிழமை இரவு துபாய் இன்டர்நேஷனல் அகாடமிக் சிட்டியில் தீபாவளி கொண்டாட்டத்தின் போது வைஷ்ணவ்க்கு மாரடைப்பு ஏற்பட்டதாகவும், உடனடி மருத்துவ சிகிச்சை அளித்தும் அவரை மீண்டும் உயிர்ப்பிக்க முடியவில்லை என்றும் கூறப்படுகிறது.
மிடில்செக்ஸ் யுனிவர்சிட்டி துபாயில் (Middlesex University in Dubai) முதலாமாண்டு பிபிஏ மார்க்கெட்டிங் (BBA Marketing) படிக்கும் மாணவரான வைஷ்ணவ், திறமையானவர், இரக்கமுள்ளவர் மற்றும் அவரது சகாக்களுக்கு ஒரு உத்வேகம் அளிப்பவர் என்று அவரை அறிந்தவர்கள் விவரித்துள்ளனர்.
இந்நிலையில் அவரது பெற்றோர் விஜி கிருஷ்ணகுமார் மற்றும் விது கிருஷ்ணகுமார் மற்றும் அவரது தங்கை விருஷ்டி கிருஷ்ணகுமார் ஆகியோர் அவரின் திடீர் மறைவை ஏற்றுக்கொள்ள முடியாமல் வேதனைப்படுகிவதாக கூறப்படுகின்றது. கேரளா மாநிலத்தைச் சேர்ந்த குடும்பத்தினர் ஊடகங்களுக்கு அளித்த பேட்டியில் வைஷ்ணவ் மாரடைப்பு காரணமாக மருத்துவமனை கொண்டு செல்லும் வழியிலேயே இறந்துவிட்டார் என்று மருத்துவமனையில் அறிவிக்கப்பட்டதாக உறுதிப்படுத்தியுள்ளனர். இதனிடையே, துபாய் காவல்துறையின் தடயவியல் துறை மேலும் சோதனைகளை நடத்தி வருகிறது. அவரது குடும்பத்தினரின் கூற்றுப்படி, வைஷ்ணவ்வுக்கு எந்த மருத்துவ பிரச்சினைகளும் இல்லை, முறையாக உடற்பயிற்சி செய்தார், மேலும் அவரது உடல் மற்றும் மன ஆரோக்கியத்தில் மிகவும் கவனமாக இருந்தார் என்பது தெரிய வந்துள்ளது.
அரிய திறமை கொண்ட மாணவர்
வைஷ்ணவ் தனது முழு பள்ளிப் படிப்பையும் துபாயில் உள்ள GEMS Own Indian School (OIS) இல் முடித்ததாகவும், அங்கு அவர் தனது தலைமைத்துவம் மற்றும் கல்வித் திறமைக்காக பரவலாகப் பாராட்டப்பட்டதாகவும் கூறப்படுகிறது. CBSE 12 ஆம் வகுப்பு வாரியத் தேர்வுகளில் (2024–25) 97.4% மதிப்பெண்களுடன் பட்டம் பெற்றதுடன், சந்தைப்படுத்தல் மற்றும் தொழில்முனைவோர் இரண்டிலும் 100/100 மதிப்பெண்கள் பெற்றிருக்கிறார். மேலும் அனைத்து பாடங்களிலும் A1 கிரேடுகளைப் பெற்றுள்ளார்.
அவரது தொடர் சாதனைகள் அவருக்கு UAE கோல்டன் விசாவை பெற்றுத் தந்தன, இது கல்வியில் தனிச்சிறப்பு பெற்ற மாணவர்களுக்கு வழங்கப்படுகிறது. ஆனால் வைஷ்ணவ் பள்ளிப்படிப்பில் மட்டுமல்லாது பின்வருவனவற்றிலும் ஆர்வம் காட்டியுள்ளார்:
- School Councils at GEMSஇன் தலைவர்
- Model United Nations Club-இன் தலைவர்
- OIS Debating Society இன் தலைவர்
மேலும், துபாய் முழுவதும் உள்ள நிறுவனங்களுடன் பல பயிற்சிகளை முடித்திருந்தார். அவரது இறுதி இலக்கு, வெற்றிகரமான தொழில்முனைவோராக மாறுவதே என்று குடும்ப வட்டாரங்கள் கூறுகின்றன.
வைஷ்ணவின் மறைவைத் தொடர்ந்து, மிடில்செக்ஸ் யுனிவர்சிட்டி துபாய் வெளியிட்ட ஒரு அறிக்கையில், “வைஷ்ணவ் ஒரு முன்மாதிரியான மாணவர், அவரது கல்வி பங்களிப்புகளுக்கு மரியாதை செலுத்தினார், மேலும் அவரது கருணை, பணிவு மற்றும் அவரைச் சுற்றியுள்ளவர்களுக்கு அவர் கொண்டு வந்த அரவணைப்புக்காகப் போற்றப்பட்டார். அவரது இழப்பு எங்கள் முழு சமூகத்தையும் ஆழமாகப் பாதித்துள்ளது… கிருஷ்ணகுமார் குடும்பத்திற்கு எங்கள் மனமார்ந்த இரங்கலைத் தெரிவித்துக் கொள்கிறோம்.” என்று இரங்கல் தெரிவித்துள்ளது.
GEMS Our Own Indian School அவரது பெற்றோருக்கு அனுப்பிய ஒரு சுற்றறிக்கையில், “வைஷ்ணவ் அவரது ஆசிரியர்கள் மற்றும் சகாக்களால் மிகவும் நேசிக்கப்பட்டார்… உண்மையிலேயே ஒரு சிறந்த மாணவர். இந்த இழப்பால் முழு பள்ளி சமூகமும் மிகவும் துக்கத்தில் உள்ளது. இந்த கடினமான நேரத்தில் அவரது குடும்பத்தினருடன் எங்கள் மனமார்ந்த பிரார்த்தனைகள் உள்ளன.” என்று ஆழ்ந்த வருத்தத்தை வெளிப்படுத்தியுள்ளது.
வைஷ்ணவின் திடீர் மரணம் அவரை அறிந்தவர்களை மட்டுமல்ல, அவரது கல்வி சாதனைகள் மற்றும் தலைமைத்துவ திறனைக் கொண்டாடிய பரந்த சமூகத்தையும் உலுக்கியுள்ளது. நண்பர்கள், வகுப்பு தோழர்கள் மற்றும் ஆசிரியர்கள் சமூக ஊடகங்களில் தனது புத்திசாலித்தனம், அரவணைப்பு மற்றும் தாராள மனப்பான்மையால் பலரையும் ஈர்த்த ஒரு இளைஞனாக அவரை நினைவு கூர்ந்துள்ளனர்.
சம்பிரதாயங்கள் முடிந்ததும், இறுதிச் சடங்குகளுக்காக அவரது உடலை கேரளாவிற்குக் கொண்டு செல்ல குடும்பத்தினர் திட்டமிட்டுள்ளதாகக் கூறப்படுகிறது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
