இலவச பேருந்து பயணத்தை அறிவித்துள்ள எமிரேட்.. உலக பொது போக்குவரத்து தினத்தை முன்னிட்டு திட்டம்..

ராஸ் அல் கைமா எமிரேட்டானது, உலகப் பொதுப் போக்குவரத்து தினத்தை முன்னிட்டு, குடியிருப்பாளர்களுக்கும் பார்வையாளர்களுக்கும் இலவசப் பேருந்து சேவைகளை அறிவித்துள்ளது. இது குறித்து இன்ஸ்டாகிராமில் வெளியிட்ட ஒரு பதிவில், ராஸ் அல் கைமா போக்குவரத்து ஆணையம் (RAKTA), ஏப்ரல் 17, வெள்ளிக்கிழமை அன்று எமிரேட் முழுவதும் அனைத்துப் பேருந்துப் பயணங்களும் இலவசமாக வழங்கப்படும் என்று கூறியுள்ளது.

ஓமானிலும், மவாசலாத் (mwasalat) இதேபோன்ற ஒரு முன்னெடுப்பை வெளிப்படுத்தி, ஏப்ரல் 17 அன்று ஓமான் தலைநகர் மஸ்கட் மற்றும் சலாலா நகரில் குடியிருப்பாளர்களுக்கும் சுற்றுலாப் பயணிகளுக்கும் வரம்பற்ற இலவசப் பயணங்களை அறிவித்துள்ளது.

ஏப்ரல் 17 அன்று உலகெங்கிலும் கொண்டாடப்படும் உலகப் பொதுப் போக்குவரத்து தினம், பொதுப் போக்குவரத்து எவ்வாறு மக்களை வேலைக்கும், வாழ்க்கைக்கும், ஒருவருக்கொருவர் இணைக்கிறது என்பதற்கான ஒரு உலகளாவிய கொண்டாட்டமாகும்.

இது நமது அன்றாட வாழ்வில், நமது நகரங்களின் வெற்றியில், நமது பொருளாதார வளம் மற்றும் நிலையான வளர்ச்சியில் பொதுப் போக்குவரத்து வகிக்கும் முக்கியப் பங்கின் உலகளாவிய கொண்டாட்ட நிகழ்வு என்று RAKTA தெரிவித்துள்ளது.