அமீரகத்தில் எத்தனை நாட்களுக்கு Sick Leave எடுக்கலாம்? அதற்கான சம்பளம் மற்றும் விதிகள் பற்றி சட்டம் கூறுவது என்ன.?
ஐக்கிய அரபு அமீரக சட்டப்படி, நாட்டில் பணிபுரியும் ஊழியர்களுக்கு உடல்நிலை சரியில்லாத நிலையில், அவர்கள் விடுமுறை எடுத்துக்கொள்ள வருடாந்திர விடுப்பை (annual leave) பயன்படுத்தத் தேவையில்லை. அதற்கு மாறாக சம்பளத்துடன் கூடிய விடுப்பு எடுத்துக்கொள்ள அனுமதி உண்டு. எனினும் அவ்வாறு நோய்வாய்ப்பட்ட விடுப்பை (sick leave) எடுப்பதற்கு சில விதிகளும் உள்ளன. அவற்றை பின்வருமாறு பார்க்கலாம்.
நோய்வாய்ப்பட்ட விடுப்பு விதிகள்:
அமீரகத்தில் தனியார் துறையில் பணிபுரியும் தொழிலாளர் உறவுகளை ஒழுங்குபடுத்துவதற்கான தொழிலாளர் சட்டம் 2021 ஆம் ஆண்டின் ஃபெடரல் ஆணை எண். 33 இன் படி, ஒவ்வொரு தொழிலாளிக்கும் வருடத்திற்கு ஒரு மாதம் என்ற அடிப்படையில் வருடாந்திர விடுப்பு வழங்கப்படுகிறது. அதுவே அவர்கள் ஆறு மாதம் மட்டும் பணிபுரிந்திருந்தால் மாதத்திற்கு 2 நாட்கள் என 15 நாட்கள் விடுப்பை பெற முடியும்.
இருப்பினும், அந்த தொழிலாளி ஏதேனும் ஒரு நோயின் காரணமாக நோய்வாய்பட்டிருந்தால், அவருக்கு ஒரு வருடத்தில் 90 நாட்கள் வரையிலும் நோய்வாய்ப்பட்ட விடுப்பு எடுத்துக்கொள்ள உரிமை உண்டு. அதாவது வருடாந்திர விடுப்பான ஒரு மாதத்திற்கும் மேல் அவர் நோய்வாய்ப்பட்ட விடுப்பு எடுத்துக்கொள்ளலாம். எனினும், தகுதிகாண் காலம் (probationary period) முடிந்த பின்னரே வருடத்திற்கு 90 நாட்களுக்கு மேல் இல்லாத நோய்வாய்ப்பட்ட விடுப்புக்கு உரிமை உண்டு. மேலும் இது தொடர்ச்சியாகவோ அல்லது இடைப்பட்டதாகவோ இருக்கலாம்.
நோய்வாய்ப்பட்ட விடுப்புக்கான சம்பளம் எவ்வாறு வழங்கப்படும்:
- முதல் 15 நாட்களுக்கு முழு ஊதியம்
- அடுத்த 30 நாட்களுக்கு பாதி ஊதியம்
- மீதமுள்ள 45 நாட்களுக்கு ஊதியம் இல்லை
மேலும், தகுதிகாண் காலத்தில் பணிபுரியும் பணியாளரின் ஒப்புதலுக்கு உட்பட்டு, விடுப்பின் அவசியத்தை நிர்ணயிக்கும் மருத்துவ நிறுவனம் வழங்கிய மருத்துவ அறிக்கையின் அடிப்படையில், ஊழியர் ஊதியம் இல்லாமல் நோய்வாய்ப்பட்ட விடுப்பைப் பெறலாம்.
எனினும் இந்த விதிகள் நிபந்தனைகளுக்கு உட்பட்டவையாகும். குறிப்பாக, பின்வரும் சூழ்நிலைகளில் ஊதியத்துடன் கூடிய நோய்வாய்ப்பட்ட விடுப்புக்கு பணியாளர்கள் தகுதியற்றவர்களாக கருதப்படும்.
- மது அல்லது போதைப்பொருள் உட்கொள்வது போன்ற தொழிலாளியின் தவறான நடத்தையால் நோய் ஏற்பட்டால்.
- ஐக்கிய அரபு அமீரகத்தின் சட்டங்களின்படி பணியாளர் பாதுகாப்பு வழிமுறைகளை மீறினால்
நோய்வாய்ப்பட்ட விடுப்பை முதலாளிக்கு அறிவித்தல்:
அமீரக தொழிலாளர் சட்டத்தின் 31 வது பிரிவின்படி, ஊழியர் தனது உடல்நிலை குறித்து முதலாளிக்கு அதிகபட்சம் மூன்று நாட்களுக்குள் தெரிவிக்க வேண்டும் மற்றும் மருத்துவ நிறுவனம் வழங்கிய அவரது உடல்நிலை குறித்த மருத்துவ அறிக்கையையும் சமர்ப்பிக்க வேண்டும்.
நோய்வாய்ப்பட்ட விடுப்பின் போது பணிநீக்கம் செய்ய முடியுமா?
ஒரு ஊழியர் தனது 90 நாட்களுக்கான நோய்வாய்ப்பட்ட விடுப்பு முழுவதையும் பயன்படுத்திய பிறகு, வேலைக்குச் செல்ல முடியாவிட்டால், முதலாளி அவரது சேவைகளை நிறுத்தலாம். அத்தகைய சூழ்நிலையில், தொழிலாளர் சட்டத்தின் விதிகளுக்கு இணங்க, பணியாளருக்கு சேவை பலன்களின் முடிவைப் பெற உரிமை உண்டு. ஆனால், அவர் நோய்வாய்ப்பட்ட விடுப்பில் இருக்கும்போது, அவரை பணிநீக்கம் செய்யவோ அல்லது பணிநீக்கம் செய்வதற்கான அறிவிப்பை வழங்கவோ முடியாது என்பது குறிப்பிடத்தக்கது.
