UAE: பால்கனி விளிம்பில் இருந்த 2 வயது குழந்தையை காப்பாற்றிய பெண்!! விரைந்து செயல்பட்ட காவல்துறை…

அமீரகத்தில் வியாழனன்று ஒரு இரண்டு வயது குழந்தை ஆபத்தான சூழ்நிலையிலிருந்து காப்பாற்றப்பட்ட சம்பவம் ஒன்று நிகழ்ந்துள்ளது. பால்கனியின் விளிம்பில் குழந்தை நிற்பதைக் கண்ட ஒரு பெண் உடனடியாக அதிகாரிகளிடம் தெரிவித்ததால்  குழந்தை மிகப்பெரிய ஆபத்தில் இருந்து காப்பாற்றப்பட்டுள்ளதாகக் கூறப்படுகிறது.

இது தொடர்பாக அஜ்மான் காவல்துறை வெளியிட்ட தகவல்களின் படி, அரபு நாட்டைச் சேர்ந்த வெளிநாட்டவர் தனது ஜன்னலில் நின்று கொண்டிருந்தபோது, ​​எதிர் கட்டிடத்தின் பால்கனியின் ஓரத்தில் ஆபத்தான நிலையில் குழந்தை நின்று கொண்டிருப்பதைப் பார்த்துள்ளார். குழந்தையின் பெற்றோர் வேலையாக வீட்டிற்குள் இருந்தபோது குழந்தை ஒரு நாற்காலியில் ஏறி பால்கனியின் விளிம்பில் நின்றதைப் பார்த்த அந்த பெண், உடனடியாக காவல்துறையை தொடர்பு கொண்டு தகவல் அளித்துள்ளார்.

சம்பவ இடத்திற்கு விரைந்து சென்ற அஜ்மான் காவல்துறை உடனடியாக குழந்தையை மீட்டு, பெற்றோர் குழந்தையை கண்காணிக்கவில்லை என்பதை உறுதிப்படுத்தியது. மேலும், இது குழந்தையின் உயிருக்கு ஆபத்தை விளைவித்ததால், அலட்சியத்திற்காக பெற்றோருக்கு எதிராக சட்ட நடவடிக்கை எடுக்கப்பட்டது. இது ஐக்கிய அரபு அமீரகத்தில் குழந்தைகளின் பாதுகாப்பைப் பாதுகாக்கும் 2016 ஆம் ஆண்டின் ஃபெடரல் சட்டம் எண் 3 இன் கீழ் வருகிறது.

அதிகாரிகளுக்கு தகவல் கொடுத்ததன் மூலம் ஒரு துயரத்தைத் தடுக்க உதவியதற்காக காவல்துறை நடவடிக்கைகளின் இயக்குநர் ஜெனரல் பிரிகேடியர் அப்துல்லா சைஃப் அல் மத்ரூஷி அவரைப் பாராட்டியதாகவும், அவருக்கு சான்றிதழ் வழங்கி கௌரவித்ததாகவும் தெரிவிக்கப்பட்டுள்ளது.

இச்சம்பவத்தைத் தொடர்ந்து, வீட்டில், குறிப்பாக உயரமான கட்டிடங்களில், பாதுகாப்பு முன்னெச்சரிக்கை நடவடிக்கைகளை எடுக்குமாறு அனைத்து பெற்றோருக்கும் அதிகாரிகள் நினைவூட்டினர், மேலும் குழந்தைகளை கவனிக்காமல் விட்டுவிடுவது சட்டரீதியான விளைவுகளுக்கு வழிவகுக்கும் என்றும் எச்சரிக்கை விடுத்துள்ளனர்.

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel