துபாய் காவல்துறையானது, அமீரகத்தில் 2.3 டன்னுக்கும் அதிகமான போதை மாத்திரைகள் மற்றும் பிற போதைப்பொருட்களை விநியோகிக்கும் முயற்சியை முறியடித்துள்ளது. காவல்துறையினர் வெளிநாட்டில் இயங்கும் ஒரு ஒழுங்கமைக்கப்பட்ட குற்றவியல் கும்பலுடன் தொடர்புடைய 14 பேரைக் கைது செய்து, அவர்களிடமிருந்து 2.3 டன்னுக்கும் அதிகமான போதைப்பொருள் மற்றும் மனநல பாதிப்பை ஏற்படுத்தும் பொருட்களை (psychotropic substances) பறிமுதல் செய்துள்ளனர்.
சுமார் 115.19 மில்லியன் திர்ஹம் சந்தை மதிப்பு கொண்டதாக மதிப்பிடப்பட்ட இந்த போதைப்பொருட்கள், 113 அட்டைப்பெட்டிகளில் அடைக்கப்பட்டு, அமீரகத்தில் விநியோகிப்பதற்காகத் தயார் நிலையில் வைக்கப்பட்டிருந்ததாக அதிகாரிகள் தெரிவித்துள்ளனர்.
சந்தையை அடைவதற்கு முன்பே போதைப்பொருட்கள் பறிமுதல்
பறிமுதல் செய்யப்பட்ட பொருட்களில் ஸானாக்ஸ் (Xanax), ட்ரமாடோல் (Tramadol), லிரிகா (Lyrica), மைட்ரியாசில் (Mydriacyl) கண் சொட்டு மருந்துகள், கிரிஸ்டல் மெத்தாம்பேட்டமைன் (crystal methamphetamine) மற்றும் கஞ்சா உள்ளிட்ட பல்வேறு கட்டுப்பாட்டுக்கு உட்பட்ட பொருட்களும், போதைப்பொருள் கலந்த காகிதங்களும் அடங்கும்.
நாட்டில் பெருமளவிலான போதைப்பொருட்களை புழக்கத்திற்குக் கொண்டுவர ஒரு குற்றவியல் கும்பல் தயாராகி வருவதாகத் தகவல் கிடைத்ததையடுத்து இந்த வழக்கு விசாரணையைத் தொடங்கியதாக துபாய் காவல்துறை தெரிவித்துள்ளது.
இதையடுத்து, சம்பந்தப்பட்ட நபர்களை அடையாளம் காணவும், அவர்களின் நடமாட்டத்தைக் கண்காணிக்கவும் புலனாய்வாளர்கள் கண்காணிப்பு மற்றும் தொடர் நடவடிக்கைகளை மேற்கொண்டதாகக் கூறப்படுகிறது.
மேலும், சந்தேக நபர்கள் மற்றும் அவர்களின் செயல்பாடுகள் அடையாளம் காணப்பட்டதும், காவல்துறை ஒருங்கிணைந்த நடவடிக்கையை மேற்கொண்டது. இதன் விளைவாக 14 ஆசிய சந்தேக நபர்கள் கைது செய்யப்பட்டதுடன், போதைப்பொருட்கள் சந்தையை அடைவதற்கு முன்பே பறிமுதல் செய்யப்பட்டதாகவும் அதிகாரிகள் தெரிவித்துள்ளனர்.
அதுமட்டுமின்றி, சந்தேக நபர்கள் வெளிநாட்டில் இயங்கும் ஒரு ஒழுங்கமைக்கப்பட்ட குற்றவியல் கும்பலுடன் தொடர்புடையவர்கள் என்பது விசாரணையில் தெரியவந்துள்ளதாக காவல்துறை கூறியுள்ளது.
அதிகாரிகளின் கூற்றுப்படி, இதற்கான சட்ட நடைமுறைகள் தொடங்கப்பட்டுள்ளன மற்றும் சந்தேக நபர்கள் உரிய நீதித்துறை அதிகாரிகளிடம் ஒப்படைக்கப்படுவார்கள் என்பது தெரிய வந்துள்ளது.
ஐக்கிய அரபு அமீரக சுங்கத்துறை அதிகாரிகள் மற்றொரு போதைப்பொருள் கடத்தல் முயற்சியை முறியடித்த சில நாட்களிலேயே இந்த சமீபத்திய நடவடிக்கையும் மேற்கொள்ளப்பட்டுள்ளது.
செப்டம்பர் 30 அன்று, தரைவழி எல்லை சோதனைச் சாவடி ஒன்றில், வாகன டயருக்குள் மறைத்து வைக்கப்பட்டிருந்த 16.2 கிலோ கிரிஸ்டல் மெத்தாம்பேட்டமைனை சுங்கத்துறை ஆய்வாளர்கள் பறிமுதல் செய்தனர்.
மேம்பட்ட ஸ்கேனிங் செயல்முறையின் போது அந்த வாகனம் அசாதாரண அறிகுறிகளைக் காட்டியதால் அதிகாரிகளின் கவனத்தை ஈர்த்ததாக, அடையாளம், குடியுரிமை, சுங்கம் மற்றும் துறைமுகப் பாதுகாப்புக்கான கூட்டாட்சி ஆணையம் (ICP) தெரிவித்துள்ளது.
அதன்பிறகு, சுங்கம் மற்றும் பாதுகாப்பு ஆதரவுத் துறையின் K9 (மோப்ப நாய்) குழுவுடன் இணைந்து நேரடி ஆய்வு மேற்கொள்ளப்பட்டது. அந்தச் சோதனையில், டயருக்குள் மிகவும் நுட்பமாக மறைத்து வைக்கப்பட்டிருந்த போதைப்பொருட்கள் கண்டெடுக்கப்பட்டதாக அதிகாரிகள் கூறியுள்ளனர்..
இதேபோல், ஜூலை மாதத்தில் நடந்த மற்றொரு சம்பவத்தில், துபாய் சுங்கத்துறை மற்றும் துபாய் காவல்துறை ஆகியவை சுமார் 200 கிலோ எடையுள்ள 278,850 ‘பிரிகபாலின’ (Pregabalin) மாத்திரைகளை கைப்பற்றி, நான்கு பேரைக் கைது செய்தன.
மேலும், சமீபத்தில் 2.3 டன் போதைப்பொருள் கைப்பற்றப்பட்ட சம்பவத்திற்கும், ஜூலை மாதம் நடந்த இந்த பறிமுதல் நடவடிக்கைக்கும் எந்தத் தொடர்பும் இல்லை என்று அதிகாரிகள் தெரிவித்துள்ளனர்.
2021-ஆம் ஆண்டின் கூட்டாட்சி ஆணைச் சட்டம் எண் 30-இன் கீழ், தடைசெய்யப்பட்ட போதைப்பொருட்களை ஐக்கிய அரபு அமீரகத்திற்குள் கொண்டு வருவது ஒரு குற்றமாகும்.
போதைப்பொருட்களைக் கடத்துவதற்கோ அல்லது அவற்றை ஊக்குவிப்பதற்கோ நோக்கம் இருந்தது உறுதியானால், சூழ்நிலைகள் மற்றும் சட்டத்தின் தொடர்புடைய விதிகளின் அடிப்படையில், ஆயுள் தண்டனை அல்லது மரண தண்டனை உள்ளிட்ட கடுமையான தண்டனைகள் விதிக்கப்படலாம்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
