துபாயின் வருடாந்திர ‘ஃபிளாக் கார்டன்’ (Flag Garden – கொடித் தோட்டம்) நிகழ்வின் 13-வது பதிப்பாக, ஜுமேரா கடற்கரையில் சுமார் 10,000 ஐக்கிய அரபு அமீரகக் கொடிகளைக் கொண்டு, துபாய் ஆட்சியாளர் ஷேக் முகமது பின் ரஷித் அல் மக்தூம் அவர்களின் பிரம்மாண்ட உருவப்படம் உருவாக்கப்பட்டுள்ளது.
இது தொடர்பாக வெளியான விபரங்களின் படி, கடற்கரையில் சுமார் 5,400 சதுர மீட்டர் பரப்பளவில், 60 மீட்டர் நீளம் மற்றும் 90 மீட்டர் அகலத்தில் இந்த பிரம்மாண்டமான கலைப்படைப்பு அமைக்கப்பட்டுள்ளது. உம் சுகீம் 2 (Umm Suqeim 2) பகுதியில் அமைந்துள்ள இந்த கொடித் தோட்டம், 2027-ஆம் ஆண்டு ஜனவரி 10-ஆம் தேதி வரை பார்வையாளர்களுக்காகத் திறந்திருக்கும் என்று அறிவிக்கப்பட்டுள்ளது.
இது குறித்து துபாய் அரசு ஊடக அலுவலகத்தின் படைப்பாற்றல் பிரிவான ‘பிராண்ட் துபாய்’ (Brand Dubai)-ன் இயக்குனர் ஷைமா அல் சுவைதி கூறுகையில், இந்த ஆண்டு, ஐக்கிய அரபு அமீரகத்தின் அடையாளத்தையும் விழுமியங்களையும் கொண்டாடும் விதமாகவும், அந்நாட்டின் துணை அதிபரும் பிரதமருமான ஷேக் முகமதுவுக்கு மரியாதை செலுத்தும் வகையிலும் அமீரகக் கொடிகளைக் கொண்டு இந்த உருவப்படம் உருவாக்கப்பட்டுள்ளதாகத் தெரிவித்துள்ளார்.
துபாயின் தேசிய மாதக் கொண்டாட்டங்களின் ஒரு சிறப்பம்சம்
இந்த ‘ஃபிளாக் கார்டன்’, துபாயின் தேசிய மாதக் கொண்டாட்டங்களின் ஒரு பகுதியாகும். இந்த மாதத்தில் நாட்டின் முக்கிய தேசிய நிகழ்வுகளைக் குறிக்கும் வகையில் பல்வேறு செயல்பாடுகள் முன்னெடுக்கப்படுகின்றன.
கடந்த 13 ஆண்டுகளாக, ஐக்கிய அரபு அமீரகக் கொடிகளைக் கொண்டு பிரம்மாண்டமான காட்சிகளை உருவாக்கும் இந்தத் தோட்டம், துபாயின் தேசியக் கொண்டாட்டங்களில் ஒரு முக்கிய அங்கமாக மாறியுள்ளது.
இந்தக் கலைப்படைப்பைக் காண குடிமக்கள், குடியிருப்பாளர்கள் மற்றும் சுற்றுலாப் பயணிகள் அனைவருக்கும் அனுமதி உண்டு. மேலும், இங்கு வரும் பார்வையாளர்கள் தாங்கள் எடுக்கும் புகைப்படங்களைச் சமூக ஊடகங்களில் #UAEFlagGarden என்ற ஹேஷ்டேக்கைப் பயன்படுத்திப் பகிர்ந்துகொள்ளுமாறு ஊக்குவிக்கப்படுகிறார்கள்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
