ஐக்கிய அரபு அமீரகத்தில், தனியார் துறை நிறுவனங்கள் தங்கள் ஊழியர்களுக்கான கடமைகளை நிறைவேற்றத் தவறினால் அவர்களின் நிதி உரிமைகளைப் பாதுகாக்கும் வகையில், மனிதவள மற்றும் எமிரேட்டிசேஷன் அமைச்சகத்தின் (MoHRE) திட்டத்தின் கீழ், ஒவ்வொரு ஊழியருக்கும் பணி அனுமதி பெறுவதற்கு முன்பாகவே ‘ஊழியர் பாதுகாப்பு காப்பீட்டுத் திட்டத்தை’ (Worker Protection Insurance) வாங்குவது கட்டாயமாக்கப்பட்டுள்ளது.
இது தொடர்பாக எமராத் அல் யோம் (Emarat Al Youm) செய்தி நிறுவனம் வெளியிட்டுள்ள தகவலின்படி, இந்த ஊழியர் பாதுகாப்பு காப்பீட்டுத் திட்டம், 30 மாதங்கள் வரையிலான காலத்திற்கு 20,000 திர்ஹம் வரையிலான நிலுவை ஊதியம் உட்பட ஊழியர்களின் உரிமைகளுக்கு உத்தரவாதம் அளிக்கிறது. மேலும், ஊழியர் இறக்க நேரிட்டால் அவரது உடலை சொந்த நாட்டிற்கு அனுப்பி வைப்பதற்கான செலவுகளையும் இந்தக் காப்பீடு உள்ளடக்கியுள்ளது.
ஐக்கிய அரபு அமீரகத்தின் தொழிலாளர் சட்டத்தின் கீழ் உள்ள முக்கிய சட்டக் கடமைகள் மற்றும் ஊழியர்களின் உரிமைகளை விளக்கும் வகையில் நிறுவனங்களுக்கு வழங்கப்பட்ட வழிகாட்டுதல் தொகுப்பின் ஒரு பகுதியாகவே இந்த விதிமுறை அமல்படுத்தப்பட்டுள்ளதாக MoHRE தெரிவித்துள்ளது. அமீரகத்தில் தொழிலாளர் சந்தையின் ஸ்திரத்தன்மையை வலுப்படுத்துவதும், வேலைவாய்ப்பு விதிமுறைகளை முறையாகப் பின்பற்றுவதை உறுதி செய்வதும் இத்திட்டத்தின் நோக்கமாகும்.
அதுமட்டுமின்றி, பல்வேறு வகையான ஊழியர்கள் மற்றும் வணிகங்களுக்கு ஏற்றவாறு நான்கு வகையான காப்பீட்டுத் திட்டங்களை அமைச்சகம் வழங்குகிறது. இவற்றிற்கான ஆண்டு பிரீமியம் (காப்பீட்டுக் கட்டணம்) 40 முதல் 100 திர்ஹம் வரை இருக்கும் என்று கூறப்படுகிறது.
நிறுவனங்களின் பொறுப்புகள்
இந்த வழிகாட்டுதலின்படி, நிறுவனங்கள் பின்வருவனவற்றைச் செய்ய வேண்டும்:
- பணி அனுமதி பெறுவதற்கு முன் கட்டாய ஊழியர் பாதுகாப்பு காப்பீட்டை வாங்க வேண்டும்.
- ஆட்சேர்ப்புச் செலவுகள், அரசு கட்டணங்கள், உத்தரவாதத் தொகைகள் மற்றும் காப்பீட்டுச் செலவுகள் அனைத்தையும் ஏற்க வேண்டும்.
- ஊழியர்களுக்கு அடிப்படைப் பயிற்சியை வழங்க வேண்டும் மற்றும் அவர்களின் ஒப்பந்த உரிமைகள் மற்றும் கடமைகளை விளக்க வேண்டும்.
- ஊதியப் பாதுகாப்பு அமைப்பு (WPS) மூலம் சரியான நேரத்தில் சம்பளம் வழங்க வேண்டும்.
ஊழியர்களின் உரிமைகள்
ஊழியர்களுக்குக் கிடைக்கும் பல சட்டப்பூர்வ உரிமைகளையும் இந்த வழிகாட்டுதல் எடுத்துரைக்கிறது, அவற்றுள் சில:
- ஓராண்டு பணி நிறைவுக்குப் பிறகு 30 நாட்கள் ஊதியத்துடன் கூடிய வருடாந்திர விடுப்பு.
- 60 நாட்கள் மகப்பேறு விடுப்பு.
- 90 நாட்கள் வரை மருத்துவ விடுப்பு.
- பெற்றோர் விடுப்பு, துக்க விடுப்பு மற்றும் கல்வி விடுப்பு.
- ஓராண்டு தொடர் பணிக்குப் பிறகு வெளிநாட்டவர் ஊழியர்களுக்கான கிராஜுட்டி (gratuity).
மேலும், ஊழியர்களின் பாஸ்போர்ட்டுகள் அல்லது அதிகாரப்பூர்வ ஆவணங்களைத் தங்கள் வசம் வைத்துக்கொள்ள நிறுவனங்களுக்குத் தடை விதிக்கப்பட்டுள்ளதையும் MoHRE நினைவூட்டியுள்ளது. அதேபோல், ஊழியர்கள் கோரும்போது, அவர்களின் கடைசி சம்பளம் மற்றும் வேலையை விட்டு விலகியதற்கான காரணம் ஆகியவற்றை மட்டும் குறிப்பிட்டு, எதிர்கால வேலைவாய்ப்பு வாய்ப்புகளைப் பாதிக்கக்கூடிய தகவல்கள் ஏதுமின்றி, வேலைவாய்ப்புச் சான்றிதழை இலவசமாகப் பெறும் உரிமை அவர்களுக்கு உண்டு என்பதையும் சுட்டிக்காட்டியுள்ளது.
மேற்கூறிய தொழிலாளர் விதிமுறைகளை முழுமையாகப் பின்பற்றி, தங்களின் எமிராட்டிசேஷன் இலக்குகளைத் தாண்டிச் செயல்படும் நிறுவனங்கள், முதல் வகை தகுதியையும், எமிராட்டிசேஷன் கூட்டாளர் மன்றத்தில் உறுப்பினராகவும் தகுதி பெறலாம் என்று அமைச்சகம் தெரிவித்துள்ளது. இதன் மூலம், தேர்ந்தெடுக்கப்பட்ட MoHRE சேவைகளில் 80 சதவீதம் வரை தள்ளுபடிகளைப் பெற முடியும் என்பது குறிப்பிடத்தக்கது.
தொழிலாளர் விதிமீறல்கள் மற்றும் சம்பள வழங்கல் விதிகள்
இந்த வழிகாட்டுதலில், நிர்வாகத் தண்டனைகளுக்கு வழிவகுக்கக்கூடிய 11 தொழிலாளர் விதிமீறல்கள் அடையாளம் காணப்பட்டுள்ளன. அவற்றுள் அடங்குபவை:
- சம்பள வழங்கலைத் தாமதப்படுத்துதல்.
- மோசடியான எமிராட்டிசேஷன் நடைமுறைகள்.
- போலியான வணிகங்களை நடத்துதல்.
- MoHRE-இன் மின்னணு சேவைகளைத் தவறாகப் பயன்படுத்துதல்.
- தவறான தகவல்களை வழங்குதல்.
- கட்டாய ஆவணங்களைப் புதுப்பிக்கத் தவறுதல்.
- அங்கீகரிக்கப்பட்ட பயிற்சித் திட்டங்களுக்குப் பிறகு பயிற்சியாளர்களை நியமிக்காமல் இருத்தல்.
- அமீரகக் குடிமக்களைப் பணியமர்த்துவது தொடர்பான விதிமீறல்கள்.
மேற்கூறியவாறு, சம்பள வழங்கலைத் தாமதப்படுத்தும் முதலாளிகள், ஊதியப் பாதுகாப்பு அமைப்பின் கீழ் கடுமையான அமலாக்க நடவடிக்கைகளை எதிர்கொள்வார்கள் என்றும் MoHRE எச்சரித்துள்ளது. இவை மின்னணு அறிவிப்புகளுடன் தொடங்குகின்றன, மேலும் தாமதங்கள் தொடர்ந்தால் புதிய பணி அனுமதிகளை வழங்குவதில் கட்டுப்பாடுகளுக்கு வழிவகுக்கும் என்றும் கூறப்பட்டுள்ளது.
அத்துடன் ஐக்கிய அரபு அமீரகத்தின் தொழிலாளர் விதிமுறைகளுக்கு இணங்கி இருப்பதற்காக, சம்பளங்கள் உரிய தேதியிலிருந்து 15 நாட்களுக்குள் வழங்கப்படுவதை உறுதி செய்யுமாறு முதலாளிகளை அமைச்சகம் வலியுறுத்தியுள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
