மும்பையிலிருந்து துபாய் நோக்கிச் சென்ற இண்டிகோ விமானத்தின் சரக்கு வைக்கும் பகுதியில் (cargo hold) புகை இருப்பதைக் விமானக் குழுவினர் கண்டறிந்ததைத் தொடர்ந்து, குஜராத்தின் ராஜ்கோட் விமான நிலையத்தில் அந்த விமானம் அவசரமாகத் தரையிறக்கப்பட்டதாக சமீபத்திய அறிக்கைகள் கூறுகின்றன. மேலும், அந்த விமான நிலைய நிர்வாகம் ‘முழு அவசரநிலை’யை (full emergency) அறிவித்ததாகக் கூறப்படுகிறது.
மும்பையிலிருந்து துபாய்க்குச் சென்றுகொண்டிருந்த 6E 1452 என்ற விமானத்தில் 194 பயணிகள் பயணம் செய்தனர். அப்போது சரக்கு வைக்கும் அறையில் புகை வருவதைக் கவனித்த விமானக் குழுவினர், உடனடியாக விமானப் போக்குவரத்து கட்டுப்பாட்டு அறைக்குத் தகவல் அளித்துள்ளனர்.
இது குறித்த தகவல் கிடைத்ததும், பாதுகாப்பான தரையிறக்கத்தை உறுதி செய்வதற்காக ராஜ்கோட் விமான நிலையம் முழு அவசரநிலையை அறிவித்ததுடன், அதற்கான நிலையான அவசரக்கால நடைமுறைகளையும் செயல்படுத்தியதாக அதிகாரிகள் தெரிவிக்கின்றனர்.
இதையடுத்து, விமானம் ராஜ்கோட் விமான நிலையத்தில் பாதுகாப்பாகத் தரையிறங்கியதாகக் கூறப்படுகிறது. மேலும், பயணிகள் அனைவரும் எவ்விதக் காயமுமின்றி பத்திரமாக வெளியேற்றப்பட்டதாக அதிகாரிகள் உறுதிப்படுத்தியுள்ளனர்.
விமானத்தில் புகை கண்டறியப்பட்டதைத் தொடர்ந்து முன்னெச்சரிக்கை நடவடிக்கையாக இந்த விமானம் தரையிறக்கப்பட்டதை ராஜ்கோட் விமான நிலைய இயக்குநர் திகந்தா போரா (Diganta Borah) உறுதிப்படுத்தினார். மேலும், பயணிகள் அனைவரும் பாதுகாப்பாக இருப்பதாகவும், இந்த நடவடிக்கை முழுவதும் அவசரக்காலச் சேவைகள் தயார் நிலையில் வைக்கப்பட்டிருந்ததாகவும் அவர் தெரிவித்துள்ளார்.
அதிகாரிகள் வெளியிட்டுள்ள விபரங்களின் படி, புகை வந்ததற்கான காரணம் இன்னும் கண்டறியப்படவில்லை. மேலும், இச்சம்பவத்திற்கான காரணம் குறித்து விசாரணை நடத்தப்படும் என்று எதிர்பார்க்கப்படுகிறது.
இதுவரை, இச்சம்பவம் குறித்து இண்டிகோ நிறுவனம் அதிகாரப்பூர்வ அறிக்கை எதையும் வெளியிடவில்லை என்பது குறிப்பிடத்தக்கது.
சந்தை பங்களிப்பின் அடிப்படையில் இந்தியாவின் மிகப்பெரிய விமான நிறுவனமாகத் திகழும் இண்டிகோ, 80-க்கும் மேற்பட்ட உள்நாட்டு மற்றும் 30-க்கும் மேற்பட்ட சர்வதேச இடங்களுக்கு விமானங்களை இயக்கி வருகிறது. இந்நிறுவனத்தின் விமானக் கடற்படையில் முக்கியமாக ஏர்பஸ் (Airbus) A320 மற்றும் A321 ரக விமானங்களும், பிராந்திய வழித்தடங்களில் பயன்படுத்தப்படும் ATR 72-600 டர்போப்ராப் (turboprop) விமானங்களும் இடம்பெற்றுள்ளன.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
