இஸ்லாமியர்களால் இறுதி இறைத்தூதர் என போற்றப்படும் நபிகள் நாயகம் (ஸல்) அவர்களின் பிறந்தநாளை முன்னிட்டு, வெள்ளிக்கிழமை, ஆகஸ்ட் 28, 2026 அன்று பொது மற்றும் தனியார் துறை ஊழியர்களுக்கு பொது விடுமுறை அளிக்கப்படும் என்று ஐக்கிய அரபு அமீரகம் அறிவித்துள்ளது.
இந்த விடுமுறை பெரும்பாலான ஊழியர்களுக்கு மூன்று நாள் வார இறுதி விடுமுறையை வழங்கும் என்பது குறிப்பிடத்தக்கது. ஏனெனில், அதைத் தொடர்ந்து வரும் சனிக்கிழமை மற்றும் ஞாயிற்றுக்கிழமைகளும் வழக்கமான விடுமுறை நாட்களாக அமைகின்றன.
இந்த நீண்ட வார இறுதி விடுமுறையானது, அமீரகப் பள்ளிகளின் கோடைக்கால விடுமுறையின் கடைசி வாரத்தில் வருகிறது. 2026-27 கல்வியாண்டு ஆகஸ்ட் 31 அன்று தொடங்கத் திட்டமிடப்பட்டுள்ளதாக பள்ளி நிர்வாகங்கள் தெரிவித்துள்ளன. இந்நிலையில் பள்ளிகள் துவங்குவதற்கு முன்பே இந்த விடுமுறை வருவது குறிப்பிடத்தக்கது.
உலகெங்கிலும் உள்ள முஸ்லிம்களால் நபிகள் நாயகம் அவர்களின் பிறந்தநாள் அனுசரிக்கப்படுகிறது. இது இஸ்லாமிய நாட்காட்டியின்படி ரபி-உல்-அவ்வல் மாதம் 12-ஆம் தேதி வருகிறது. இஸ்லாமிய நாட்காட்டியின்படி ஹிஜ்ரி நாட்காட்டி சந்திரனின் சுழற்சியைப் பின்பற்றுகிறது. இதில் ஒவ்வொரு மாதமும் பிறை தெரிவதைப் பொறுத்தே தொடங்குகிறது.
இதன் விளைவாக ஐக்கிய அரபு அமீரகத்தில், ஒவ்வொரு ஹிஜ்ரி மாதத்தின் 29-ஆம் தேதியன்றும் பிறை பார்க்கும் குழு (Moon Sighting Committee) கூடி, பிறையை உற்றுநோக்கி, அடுத்த இஸ்லாமிய மாதத்தின் தொடக்கத்தைத் தீர்மானிக்கிறது.
நபிகள் நாயகம் அவர்களின் பிறந்தநாள் ஐக்கிய அரபு அமீரகத்தின் அதிகாரப்பூர்வ பொது விடுமுறை நாட்காட்டியில் இடம்பெற்றுள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
