சவூதி அரேபியாவின் ரியாத்தில் உள்ள கிங் காலித் சர்வதேச விமான நிலையத்தை குறிவைத்து நடத்தப்பட்ட புதிய பாலிஸ்டிக் ஏவுகணைத் தாக்குதலுக்கு ஏமனின் ஹூதி அமைப்பு பொறுப்பேற்றுள்ளது.
ரியாத் விமான நிலையம் மீது முன்னதாக நடத்தப்பட்ட தாக்குதலில் ஒருவர் உயிரிழந்ததையும், எட்டு பேர் காயமடைந்ததையும் சவூதி அதிகாரிகள் உறுதிப்படுத்திய சில மணிநேரங்களுக்குப் பிறகு, வியாழக்கிழமை அதிகாலையில் இந்த அறிவிப்பு வெளியானது. ஹூதி அமைப்பின் இந்த புதிய குற்றச்சாட்டை சவூதி அதிகாரிகள் உடனடியாக உறுதிப்படுத்தவில்லை.
ஏமனில் ஹூதிகளுக்கும் சவூதி ஆதரவுப் படைகளுக்கும் இடையிலான மோதல் தீவிரமடைந்துள்ள சூழலில் இந்தச் சம்பவம் நடந்துள்ளது.
சவூதி விமான நிலையங்கள் மீதான தாக்குதல்களில் மூவர் பலி
இதற்கிடையில், செவ்வாய் மற்றும் புதன்கிழமைகளில் ரியாத்தில் உள்ள கிங் காலித் சர்வதேச விமான நிலையம் மற்றும் அபா சர்வதேச விமான நிலையம் ஆகியவற்றின் மீது நடத்தப்பட்ட தாக்குதல்களில் மூன்று பேர் உயிரிழந்ததாகவும், 36 பேர் காயமடைந்ததாகவும் சவூதி அரேபியாவின் சிவில் விமானப் போக்குவரத்து ஆணையம் தெரிவித்துள்ளது.
அபா சர்வதேச விமான நிலையத்தில், மொராக்கோ மற்றும் அல்ஜீரியாவைச் சேர்ந்த பெண்கள் இருவர் உயிரிழந்த நிலையில், மேலும் 28 பேர் காயமடைந்துள்ளனர். காயமடைந்தவர்களில் சவூதி குடிமக்கள் மற்றும் வங்கதேசம், பிலிப்பைன்ஸ் நாடுகளைச் சேர்ந்தவர்கள் அடங்குவர் என்று அதிகாரிகள் தெரிவித்துள்ளனர்.
மேலும், ரியாத்தில் உள்ள கிங் காலித் சர்வதேச விமான நிலையத்தில், சூடான் நாட்டைச் சேர்ந்த ஒருவர் உயிரிழந்தார் மற்றும் எட்டு பேர் காயமடைந்ததுள்ளனர். காயமடைந்தவர்களில் ஐந்து சவூதி குடிமக்கள், இரண்டு எகிப்தியர்கள் மற்றும் ஒரு பாகிஸ்தானியர் ஆகியோர் அடங்குவர். காயமடைந்த அனைவரும் சிகிச்சைக்காக மருத்துவமனைக்கு அழைத்துச் செல்லப்பட்டதாகக் கூறப்படுகிறது.
இத்தாக்குதல்களால் விமான நிலையங்களில் பொருட்சேதமும் ஏற்பட்டதாக சிவில் விமானப் போக்குவரத்து ஆணையம் தெரிவித்துள்ளது.
சவூதி தலைமையிலான கூட்டணி தாக்குதல்கள்
இத்தாக்குதல்களைத் தொடர்ந்து, ஏமனில் உள்ள ஹூதி இலக்குகள் மீது பெரிய அளவிலான ராணுவ நடவடிக்கையை மேற்கொண்டதாக சவூதி தலைமையிலான கூட்டணி அறிவித்துள்ளது.
ஏமனின் சாடா (Saada), அல் ஹுதைதா (Al Hudaydah), அல் ஜவ்ஃப் (Al Jawf) மற்றும் மாரிப் (Ma’rib) ஆகிய மாகாணங்களில் 82 ராணுவ இலக்குகள் அழிக்கப்பட்டதாகக் கூட்டணியின் செய்தித் தொடர்பாளர் மேஜர் ஜெனரல் துருக்கி அல்-மால்கி தெரிவித்துள்ளார்.
அழிக்கப்பட்ட இலக்குகளில் பாலிஸ்டிக் ஏவுகணைத் தளங்கள், கட்டளை மற்றும் கட்டுப்பாட்டு மையங்கள், தகவல் தொடர்பு அமைப்புகள், ஆயுதக் கிடங்குகள் மற்றும் ஹூதி படைகள் பயன்படுத்திய இடங்கள் ஆகியவை அடங்கும் என்று கூறப்படுகிறது.
மேலும், சவூதி விமான நிலையங்கள் மீதான தாக்குதல்களுக்கு “தகுந்த பதிலடி கொடுக்கப்படும்” என்று கூட்டணி கூறியுள்ளது. இதற்கிடையில், கிங் காலித் சர்வதேச விமான நிலையம் மீது பாலிஸ்டிக் ஏவுகணைத் தாக்குதல் நடத்தப்பட்டதாக ஹூதிகள் கூறியுள்ள சமீபத்திய கூற்றை சவூதி அதிகாரிகள் இன்னும் உறுதிப்படுத்தவில்லை. ஹூதிகளுக்கும் சவூதி ஆதரவு ஏமன் படைகளுக்கும் இடையிலான மோதல் தீவிரமடைந்து வருவதால், நிலைமை மோசமடைந்து வருகிறது.
இது போன்ற வளைகுடா நாடுகளின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
