துபாயில் ஷேரிங் ரூம்களுக்கு புதிய கட்டுப்பாடு: சுற்றுலா மற்றும் வர்த்தகப் பகுதிகளில் பேச்சுலர் தங்குமிடங்களுக்கு அனுமதி இல்லை!!

துபாயில் பகிரப்பட்ட குடியிருப்புகள் (shared accomodation) எங்கு செயல்படலாம் என்பது குறித்த புதிய வழிகாட்டுதல்களை துபாய் அரசு அறிமுகப்படுத்தியுள்ளது. இது தொடர்பாக துபாய் முனிசிபாலிட்டி வெளியிட்டுள்ள சமீபத்திய அறிக்கையில், குறிப்பிடப்பட்ட பகுதிகளில் மட்டுமே அத்தகைய குடியிருப்புகள் அனுமதிக்கப்படும் என்று அறிவித்துள்ளது

இந்த விதிகள் தனிநபர் மற்றும் குடும்பப் பகிரப்பட்ட குடியிருப்புகள் இரண்டையும் உள்ளடக்கியதுடன், குடியிருப்புப் பகுதிகளில் வாழ்க்கைத் தரத்தைப் பாதுகாக்கும் அதே வேளையில், நெரிசலைத் தடுப்பதை நோக்கமாகக் கொண்டுள்ளன என்று அதிகாரிகள் வலியுறுத்துகின்றனர்.

முக்கிய சாலைகளில் பகிரப்பட்ட குடியிருப்புகளுக்குக் கட்டுப்பாடு

சமீபத்திய அறிக்கையின் படி, பல முக்கிய சுற்றுலா மற்றும் வர்த்தக பகுதிகளில் உள்ள சொத்துக்கள், குடும்பங்கள் மட்டுமே வசிக்கக்கூடிய பகிரப்பட்ட குடியிருப்புகளுக்கு மட்டுமே வரையறுக்கப்படும்.

இவற்றில் பனி யாஸ் சாலை, ஷேக் சையத் சாலை, ஜுமைரா சாலை மற்றும் அல் வாஸ்ல் சாலை ஆகியவை அடங்கும். இதன் பொருள், குடும்பப் பகிர்வுக்கு மட்டுமே ஒதுக்கப்பட்ட ஒரு சொத்தில், அப்பகுதிகளில் வசிக்கும் மக்கள், தொடர்பில்லாத நபர்களுக்கோ அல்லது தனியாகப் பணிபுரியும் ஊழியர்களுக்கோ (bachelors) ஒரு அறையைப் ஷேரிங் குடியிருப்பாகப் பயன்படுத்த முடியாது.

ஷேரிங் குடியிருப்புகளுக்கு அங்கீகரிக்கப்பட்ட பகுதிகள், துபாய் முனிசிபாலிட்டியால் மேற்கொள்ளப்பட்ட திட்டமிடல் ஆய்வுகள் மற்றும் நகர்ப்புறப் பகுப்பாய்வுகளின் அடிப்படையில் அடையாளம் காணப்பட்டுள்ளதாகக் கூறப்படுகிறது.

எனவே, பகிரப்பட்ட குடியிருப்பை வாடகைக்கு விட அல்லது அதில் குடியேறத் திட்டமிடும் எவரும், அந்தக் கட்டிடம் அங்கீகரிக்கப்பட்ட மண்டலத்திற்குள் அமைந்துள்ளதா என்பதை முதலில் சரிபார்க்க வேண்டும்.

பகிரப்பட்ட தங்குமிடத்தை வழங்குவதற்காக மாற்றியமைக்கப்பட்ட புதிய கட்டிடங்கள் மற்றும் ஏற்கனவே உள்ள சொத்துக்கள் ஆகிய இரண்டிற்கும் புதிய தேவைகள் பொருந்தும் என்று தெரிவிக்கப்பட்டுள்ளது.

இந்நிலையில், துபாய் முனிசிபாலிட்டியால் நிர்ணயிக்கப்பட்ட தேவைகளைத் தங்கள் சொத்துக்கள் பூர்த்தி செய்வதை உறுதி செய்ய, கட்டுமான நிறுவனங்களும் நில உரிமையாளர்களும் செப்டம்பர் 8, 2027 வரை அவகாசம் பெற்றுள்ளதாகத் தகவல் வெளியாகியுள்ளன.

இரண்டு வகையான பகிரப்பட்ட தங்குமிடங்கள்

துபாயின் கட்டமைப்பின் கீழ், பகிரப்பட்ட வீடுகள் இரண்டு வகைகளாகப் பிரிக்கப்பட்டுள்ளன.

தனிநபர் குடியிருப்பு என்பது ஒரு குடியிருப்பு யூனிட் அல்லது அறைக்குள் தனிநபர்களால் பகிரப்படும் தங்குமிடத்தைக் குறிக்கிறது. இதில் சமையலறைகள், உணவருந்தும் பகுதிகள், குளியலறைகள் மற்றும் வெளிப்புற இடங்கள் போன்ற வசதிகளைப் பகிர்ந்து பயன்படுத்துவதும் அடங்கும்.

குடும்பக் குடியிருப்பு என்பது ஒரே சொத்து யூனிட்டில் ஒன்றுக்கு மேற்பட்ட குடும்பங்களால் பகிரப்படும் தங்குமிடத்தைக் குறிக்கிறது, இதில் பொதுவான வசதிகளும் பகிரப்படுகின்றன. பகிரப்பட்ட தங்குமிடமானது குடியிருப்பு அடுக்குமாடிக் கட்டிடங்களிலும், அத்துடன் தனி வீடுகள் மற்றும் இணைக்கப்பட்ட வில்லாக்களிலும் வழங்கப்படலாம்.

நெரிசலைக் கட்டுப்படுத்தும் புதிய சட்டம்

துபாயில் பகிரப்பட்ட வீடுகளின் மேலாண்மை மற்றும் குடியிருப்பை ஒழுங்குபடுத்துவதற்காக பிப்ரவரியில் அறிமுகப்படுத்தப்பட்ட ஒரு சட்டத்தைத் தொடர்ந்து இந்த வழிகாட்டுதல்கள் வந்துள்ளன.

குடியிருப்பாளர்கள் மற்றும் சொத்து உரிமையாளர்களைப் பாதுகாப்பதையும், நெரிசல் மற்றும் முறைசாரா குடியிருப்புகளைத் தடுப்பதையும் நோக்கமாகக் கொண்டு, இந்தச் சட்டம் அனுமதிகள், குத்தகை மற்றும் பாதுகாப்புத் தரங்களுக்கான தேவைகளை நிறுவுகிறது.

மேலும், இது தொடர்பான மீறல்களுக்கு 500 திர்ஹம்ஸ் முதல் 500,000 திர்ஹம்ஸ் வரை அபராதம் விதிக்கப்படலாம்.

இது மட்டுமின்றி, நகராட்சியின் வழிகாட்டியானது, குடியிருப்பாளர்களின் எண்ணிக்கை, ஒரு நபருக்கான குறைந்தபட்ச படுக்கையறை இடம், பகிரப்பட்ட சமையலறைகள் மற்றும் குளியலறைகள், சுகாதார வசதிகள், நிர்வாகக் கட்டணங்கள் மற்றும் பகிரப்பட்ட தங்குமிடத்திற்காக சொத்துக்களை மாற்றுவதற்கான நடைமுறைகள் ஆகியவற்றுக்கான தேவைகளையும் நிர்ணயிக்கிறது.

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel