ஐக்கிய அரபு அமீரகத்தின் 55-வது ‘ஈத் அல் எத்திஹாத்’- எனப்படும் தேசிய தினத்தை முன்னிட்டு, தனியார் துறை ஊழியர்களுக்கு டிசம்பர் 2 மற்றும் 3 ஆகிய தேதிகளில் விடுமுறை அளிக்கப்படுவதாக அறிவிக்கப்பட்டுள்ளது. இதன் மூலம், 2026-ஆம் ஆண்டின் கடைசி முக்கிய விடுமுறை நாட்களை ஊழியர்கள் அனுபவிக்கலாம்.

அமீரகத்தின் மனித வளங்கள் மற்றும் எமிராட்டிசேஷன் அமைச்சகம் (MoHRE), டிசம்பர் 2 (புதன்) மற்றும் டிசம்பர் 3 (வியாழன்) ஆகிய நாட்களில் தனியார் துறை ஊழியர்களுக்கு ஊதியத்துடன் கூடிய விடுமுறை வழங்கப்படும் என்பதை உறுதிப்படுத்தியுள்ளது.

இதற்கு முன்னதாக, நவம்பர் 13 (வெள்ளி) அன்று ஐக்கிய அரபு அமீரக அரசு ஊடக அலுவலகம், மத்திய அரசு ஊழியர்களுக்கு டிசம்பர் 2 முதல் 4 வரை மூன்று நாட்கள் விடுமுறை அளிக்கப்படும் என்று அறிவித்திருந்தது. அதன்படி, அரசுத் துறை ஊழியர்கள் வார இறுதி நாட்களுக்குப் பிறகு, டிசம்பர் 7 (திங்கள்) அன்று மீண்டும் பணிக்குத் திரும்புவார்கள்.

‘Eid Al Etihad’ என்றால் ‘ஒன்றியத்தின் கொண்டாட்டம்’ என்று பொருள். 1971-ஆம் ஆண்டு டிசம்பர் 2-ஆம் தேதி, ஏழு அமீரகங்கள் ஒன்றிணைந்து ஐக்கிய அரபு அமீரகத்தை உருவாக்கிய வரலாற்றுச் சிறப்புமிக்க நாளை இது குறிக்கிறது.

இந்த பெயர், புதிதாக உருவாக்கப்பட்ட ஒன்றல்ல. மாறாக, இந்த தேசிய நிகழ்விற்காக ஆரம்பத்தில் இருந்தே பயன்படுத்தப்பட்டு வந்த அரபு மொழிப் பெயரே மீண்டும் கொண்டுவரப்பட்டுள்ளது.

அமீரகத்தில் பொது விடுமுறை நாட்களை மாற்ற முடியுமா?

2025-ஆம் ஆண்டில் அமல்படுத்தப்பட்ட சட்டத்தின்படி, சில பொது விடுமுறை நாட்களைச் சூழலுக்கு ஏற்ப வாரத்தின் தொடக்கத்திற்கோ அல்லது இறுதி நாட்களுக்கோ மாற்றிக்கொள்ள முடியும். விடுமுறை நாட்களை வார இறுதி நாட்களுடன் இணைப்பதன் மூலம், நீண்ட விடுமுறை நாட்களை உருவாக்க இந்தச் சட்டம் வழிவகை செய்கிறது.

இருப்பினும், இந்த நெகிழ்வுத்தன்மை அனைத்து பொது விடுமுறை நாட்களுக்கும் பொருந்தாது. மேலும், விடுமுறை தேதிகளில் மாற்றங்களைச் செய்வது குறித்து முடிவெடுக்கும் அதிகாரம் அமைச்சரவைக்கு வழங்கப்பட்டுள்ளது என்பது குறிப்பிடத்தக்கது.

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel