துபாயின் சாலைகள் மற்றும் போக்குவரத்து ஆணையம் (RTA), பரபரப்பான டிரேட் சென்டர் ரவுண்டானாவில் இரண்டு புதிய பாலங்களைத் திறந்து வைத்துள்ளது. இது நகரத்தின் முக்கிய இண்டர்செக்ஷன்கள் ஒன்றில் பயண நேரத்தைக் கணிசமாகக் குறைத்து, போக்குவரத்து நெரிசலைக் குறைக்கும் என கூறப்பட்டுள்ளது.
புதிதாகத் திறக்கப்பட்ட இந்தப் பாலங்கள், 2வது டிசம்பர் ஸ்ட்ரீட்டிலிருந்து ஷேக் ரஷீத் சாலை மற்றும் அல் மஜ்லிஸ் ஸ்ட்ரீட்டை நோக்கிச் செல்லும் போக்குவரத்திற்கு உதவுகின்றன. இதனால் பயண நேரம் சுமார் 10 நிமிடங்களிலிருந்து வெறும் இரண்டு நிமிடங்களாகக் குறைக்கப்பட்டுள்ளது. வாகன ஓட்டிகள் இப்போது அல் மஜ்லிஸ் ஸ்ட்ரீட், அல் முஸ்தக்பல் ஸ்ட்ரீட் மற்றும் ஜபீல் பேலஸ் ஸ்ட்ரீட்டை மிக வேகமாக அடையலாம். அத்துடன் இது ரவுண்டானாவில் உள்ள போக்குவரத்து நெரிசலை குறைக்கும் என கூறப்பட்டுள்ளது.
RTA வெளியிட்ட விபரங்களின் படி, ஒவ்வொரு பாலமும் இரு திசைகளிலும் இரண்டு வழித்தடங்களைக் கொண்டுள்ளது. இதன் மொத்த நீளம் 2,000 மீட்டர்கள் மற்றும் மணிக்கு சுமார் 6,000 வாகனங்களைக் கையாளும் திறன் கொண்டது. இந்தப் பாலங்கள் ஜனவரி மாத நடுப்பகுதியில் திறக்கத் திட்டமிடப்பட்டிருந்த நிலையில், திட்டமிடப்பட்ட காலத்திற்கு முன்பே திறக்கப்பட்டுள்ளன என்பது குறிப்பிட்டத்தக்கது.
டிரேட் சென்டர் ரவுண்டானா துபாயின் மிகவும் பரபரப்பான இண்டர்செக்ஷன்களில் ஒன்றாகும். இது ஷேக் சையத் சாலையை ஷேக் கலீஃபா பின் சையத் ஸ்ட்ரீட், ஷேக் ரஷீத் சாலை, 2வது டிசம்பர் ஸ்ட்ரீட், ஜபீல் பேலஸ் ஸ்ட்ரீட் மற்றும் அல் மஜ்லிஸ் ஸ்ட்ரீட் ஆகிய ஐந்து முக்கிய சாலைகளுடன் இணைக்கிறது. இந்தப் பாலங்கள், கடந்த ஆண்டு அக்டோபரில் அறிவிக்கப்பட்ட ஒரு பெரிய திட்டத்தின் ஒரு பகுதியாகும். இந்தத் திட்டத்தில், மொத்தம் 5,000 மீட்டர் நீளமுள்ள ஐந்து பாலங்கள் அமைக்கும் பணியும் அடங்கும்.
RTA-வின் பொது இயக்குநர் மற்றும் நிர்வாக இயக்குநர்கள் குழுவின் தலைவர் மத்தார் அல் தயெர் கூற்றுப்படி, இதற்கான திட்டப் பணிகள் திட்டமிட்டதை விட வேகமாக நடைபெற்று வருகின்றன. ஒட்டுமொத்தப் பணிகள் கிட்டத்தட்ட 50 சதவீதம் நிறைவடைந்துள்ளதாகவும், மேலும் பல கட்டங்களாகத் திறப்புகள் தொடரும் என்றும் அவர் தெரிவித்துள்ளார்.
அவரது கூற்றுப்படி, ஷேக் சையத் சாலையை ஷேக் கலீஃபா பின் சையத் ஸ்ட்ரீட்டுடன் இணைக்கும் ஒரு பாலம் வரும் மார்ச் மாதம் திறக்கப்பட உள்ளது. அதே நேரத்தில், ஷேக் ரஷீத் சாலை மற்றும் அல் மஜ்லிஸ் ஸ்ட்ரீட்டிலிருந்து 2வது டிசம்பர் ஸ்ட்ரீட்டை நோக்கிச் செல்லும் போக்குவரத்திற்காக மேலும் இரண்டு பாலங்கள் அக்டோபர் 2026-க்குள் திறக்கப்படும் என்று எதிர்பார்க்கப்படுகிறது.
திட்டம் முழுமையாக நிறைவடைந்ததும், இன்டர்செக்ஷனில் சராசரி காத்திருப்பு நேரம் 12 நிமிடங்களிலிருந்து வெறும் 90 வினாடிகளாகக் குறையும் என்று RTA தெரிவித்துள்ளது. மேலும், ஷேக் சையத் சாலையிலிருந்து ஷேக் கலீஃபா பின் சையத் ஸ்ட்ரீட்டுக்கான பயண நேரமும் ஆறு நிமிடங்களிலிருந்து ஒரு நிமிடமாகக் குறையும். இந்த மேம்பாட்டுத் திட்டத்தின் ஒரு பகுதியாக, ஷேக் சையத் சாலையிலிருந்து ஷேக் கலீஃபா பின் சையத் ஸ்ட்ரீட்டை நோக்கி, தேரா செல்லும் திசையில் 1,000 மீட்டர் நீளமுள்ள, இரண்டு வழிப் பாலம் ஒன்று கட்டப்பட்டு வருகிறது. இந்தப் பாலம் மணிக்கு சுமார் 3,000 வாகனங்களைக் கையாளும் என எதிர்பார்க்கப்படுகிறது.
ஒட்டுமொத்தமாகப் பார்க்கையில், இந்தத் திட்டம் துபாய் உலக வர்த்தக மையம், DIFC, ஸபீல், அல் சத்வா, அல் கராமா, அல் ஜஃபிலியா மற்றும் அல் மன்கூல் உள்ளிட்ட முக்கிய வணிக மற்றும் குடியிருப்புப் பகுதிகளுக்குப் பயனளிக்கும். இந்த மேம்பாடுகளால் 500,000-க்கும் மேற்பட்ட குடியிருப்பாளர்களும் பார்வையாளர்களும் பயனடைவார்கள் என எதிர்பார்க்கப்படுகிறது.
இந்த பாலப் பணிகள், 2027-ஆம் ஆண்டில் நிறைவடையத் திட்டமிடப்பட்டுள்ள அல் முஸ்தக்பல் ஸ்ட்ரீட்டின் மேம்பாட்டையும் உள்ளடக்கிய ஒரு பெரிய பெருந்திட்டத்தின் பகுதியாகும். இந்தத் திட்டத்தில், மொத்தம் 1,500 மீட்டர் நீளமுள்ள பாலங்கள் மற்றும் சுரங்கப்பாதைகளைக் கட்டுதல், சாலையை ஒவ்வொரு திசையிலும் மூன்று வழித்தடங்களிலிருந்து நான்கு வழித்தடங்களாக விரிவுபடுத்துதல், மற்றும் அதன் கொள்ளளவை மணிக்கு 9,000 வாகனங்களிலிருந்து 12,000 வாகனங்களாக அதிகரித்தல் ஆகியவை அடங்கும்.
கூடுதல் பணிகளில், அல் முஸ்தக்பல் ஸ்ட்ரீட் மற்றும் டிரேட் சென்டர் ஸ்ட்ரீட்டின் இண்டர்செக்ஷனில் மூன்று சுரங்கப்பாதைகள் அமைப்பது, அத்துடன் துபாய் உலக வர்த்தக மையத்திலிருந்து ஜபீல் பேலஸ் ஸ்ட்ரீட்டை நோக்கிய அணுகலை மேம்படுத்த 400 மீட்டர் பாலம் கட்டுவது ஆகியவையும் அடங்கும்.
இந்த மேம்பாடுகள் அனைத்தும் இணைந்து, துபாயின் மிக முக்கியமான போக்குவரத்து வழித்தடங்களில் ஒன்றில் பயணத்தை வேகமானதாகவும், பாதுகாப்பானதாகவும், சீரானதாகவும் மாற்றுவதை நோக்கமாகக் கொண்டுள்ளன என்பது குறிப்பிடத்தக்கதாகும்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
