துபாயில் ரமலான் மாதத்தின் போது மக்களிடம் பிச்சை எடுத்து அதிக பணம் சம்பாதித்ததுடன், மூன்று சொகுசு கார்களை வைத்திருந்த ஒரு பிச்சைக்காரரை துபாய் காவல்துறை அதிரடியாக கைது செய்துள்ளது.
இது குறித்து சந்தேக நபர்கள் மற்றும் குற்றவியல் நிகழ்வுகள் துறையின் இயக்குனர் பிரிகேடியர் அலி அல் ஷம்சி அவர்கள் கூறுகையில், பொதுமக்களிடமிருந்து அனுதாபத்தைப் பெறுவதற்காக அந்த நபர் பகலில் ஏழையாகவும் சோர்வாகவும் நடித்து பிச்சை எடுப்பார். அன்றைய தினத்தை முடித்த பிறகு, அவர் தனது உடைகளை மாற்றிக்கொண்டு, ஒரு உயர் ரக காரில் புறப்படுவதாக அதிகாரிகள் தெரிவிக்கின்றனர்.
அந்த நபர் குடியிருப்பாளர்களிடமிருந்து அனுதாபத்தைப் பெறுவதற்காக கற்பனையான கதைகளைப் பயன்படுத்தியதாக அதிகாரிகள் கூறியுள்ளனர். மேலும், பணம் சம்பாதிப்பதற்காக அவரது செயல்கள் திட்டமிடப்பட்டு ஒழுங்கமைக்கப்பட்டவை என்று விசாரணைகள் காட்டுகின்றன.
பிரச்சாரத்தின் போது கைது செய்யப்பட்ட பிச்சைக்காரர்களில் 90 சதவீதம் பேர் விசிட் விசாக்களில் ஐக்கிய அரபு அமீரகத்தில் நுழைந்து, மக்களின் தாராள மனப்பான்மையை பயன்படுத்திக் கொள்ள வேண்டுமென்றே ரமலான் மாதத்தை தேர்ந்தெடுத்ததாக பிரிகேடியர் அல் ஷம்சி தெரிவித்துள்ளார். முன்னதாக ஒரு வழக்கில், ஒரு பிச்சைக்காரர் 25,000 திர்ஹம் பணத்துடன் பிடிபட்டார் என்பது குறிப்பிடத்தக்கது.
பிச்சை எடுப்பதற்கான தண்டனைகள்
2018 ஆம் ஆண்டின் 9 ஆம் எண் கூட்டாட்சி சட்டத்தின் கீழ், ஐக்கிய அரபு அமீரகத்தில் பிச்சை எடுப்பது மூன்று மாதங்கள் வரை சிறைத்தண்டனை மற்றும் 5,000 திர்ஹம்ஸ் அபராதம் விதிக்கப்படும். அதேபோல், பிச்சை எடுக்கும் குழுக்களை ஏற்பாடு செய்பவர்கள் அல்லது வெளிநாட்டிலிருந்து மக்களை பிச்சை எடுப்பதற்காக சேர்ப்பவர்கள் ஆறு மாதங்கள் வரை சிறைத்தண்டனை மற்றும் 100,000 திர்ஹம்ஸ் வரை அபராதம் என கடுமையான தண்டனைகளை எதிர்கொள்ள வேண்டியிருக்கும்.
ரமலான் பிச்சை எதிர்ப்பு பிரச்சாரம்
ரமலானின் முதல் வாரத்தில், “Combat Begging” என்ற பிரச்சாரத்தின் ஒரு பகுதியாக துபாய் காவல்துறை பல்வேறு தேசங்களைச் சேர்ந்த 26 பிச்சைக்காரர்களைக் கைது செய்தது. இந்த பிரச்சாரம் சமூகத்தைப் பாதுகாப்பதையும், குடியிருப்பாளர்கள் அதிகாரப்பூர்வ தொண்டு நிறுவனங்கள் மூலம் மட்டுமே நன்கொடை அளிக்க ஊக்குவிப்பதையும் நோக்கமாகக் கொண்டுள்ளது.
இந்த இயக்கம் துபாய் பொது குடியிருப்பு மற்றும் வெளிநாட்டினர் விவகார இயக்குநரகம் – துபாய் மற்றும் இஸ்லாமிய விவகாரங்கள் மற்றும் தொண்டு நடவடிக்கைகள் துறையின் ஒத்துழைப்புடன் மேற்கொள்ளப்படுகிறது.
மேலும், பிச்சைக்காரர்களுக்கு நேரடியாக பணம் கொடுக்க வேண்டாம் என்று காவல்துறை குடியிருப்பாளர்களைக் கேட்டுக் கொண்டுள்ளது. அதற்கு பதிலாக, அவர்கள் 901 என்ற எண்ணை அழைப்பதன் மூலமோ அல்லது துபாய் காவல்துறை ஸ்மார்ட் செயலியில் உள்ள “police eye” சேவையைப் பயன்படுத்துவதன் மூலமோ அதிகாரப்பூர்வ தொண்டு நிறுவனங்கள் மூலம் மட்டுமே நன்கொடை அளிக்கவும் வலியுறுத்தியுள்ளது.
அதேசமயம், ஆன்லைன் பிச்சை எடுக்கும் மோசடிகள் குறித்தும் அதிகாரிகள் குடியிருப்பாளர்களை எச்சரித்துள்ளனர். சமூக ஊடகங்கள் மற்றும் வலைத்தளங்களில் போலி நன்கொடை முறையீடுகள் மூலம் சட்டவிரோத நிதி ஆதாயங்களைப் பெற மோசடி செய்பவர்கள் பெரும்பாலும் ரமலான் இரக்க மனப்பான்மையை தவறாகப் பயன்படுத்துவதாகக் கூறப்படுகிறது. எனவே, குடியிருப்பாளர்கள் இத்தகைய ஆன்லைன் பிச்சை மோசடிகளை e-Crime தளம் மூலம் புகாரளிக்கலாம் எனவும் தெரிவிக்கப்பட்டுள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
