ஐக்கிய அரபு அமீரகத்தில் வசிக்கும் மக்கள் இந்த பருவத்தின் மிகக் கனத்த மழைப்பொழிவுகளில் ஒன்றை திங்களன்று அனுபவித்துள்ளனர். பல எமிரேட்களில் பெய்த தீவிர மழையின் காரணமாக, சாலைகளில் நீர் தேக்கம், போக்குவரத்து நெரிசல் ஏற்பட்டதுடன் வெப்பநிலையிலும் குறிப்பிடத்தக்க வீழ்ச்சி பதிவானதாக செய்தி அறிக்கைகள் கூறுகின்றன.
தேசிய வானிலை மையத்தால் வெளியிடப்பட்ட தகவல்களின்படி, திங்கள்கிழமை முழுவதும் அதிகபட்ச மழை அளவுகளைப் பதிவு செய்த முதல் ஐந்து இடங்களின் சில பின்வருமாறு:
- அல் மனாமா (அஜ்மான்): 93.3 மி.மீ
- கயாதி (அபுதாபி): 91 மி.மீ
- அல் வத்பா (அபுதாபி): 88.2 மி.மீ
- முகமது பின் சையத் சிட்டி (அபுதாபி): 78.7 மி.மீ
- அல் ருவைஸ் (அபுதாபி): 75.7 மி.மீ
எமிரேட் முழுவதும் உள்ள குடியிருப்புப் பகுதிகள் முதல் முக்கிய நெடுஞ்சாலைகள் வரை, சாலைகளில் நீர் தேங்கியிருப்பதையும், நாள் முழுவதும் அலை அலையாகத் திடீரெனப் பெய்த மழை பற்றியும் மக்கள் ஊடகங்களிடம் விவரித்துள்ளனர்.
அல் தஃப்ரா போன்ற நாட்டின் மேற்குப் பகுதிகளில் மழைப்பொழிவு முன்னதாகவே தொடங்கி, பின்னர் அபுதாபி மற்றும் அல் அய்ன் நோக்கி உட்பகுதிகளுக்கு நகர்ந்ததாக வானிலை ஆய்வாளர்கள் தெரிவித்தனர். அதையடுத்து பிற்பகல் வாக்கில், இந்த வானிலை அமைப்பு மேலும் விரிவடைந்து, ஜெபல் அலி மற்றும் அல் பார்ஷா உள்ளிட்ட துபாய் பகுதிகளிலும் மழையைக் கொண்டுவந்தது. அதே வேளையில் ஃபுஜைரா மற்றும் ராஸ் அல் கைமா போன்ற வடக்கு மற்றும் கிழக்கு பிராந்தியங்களிலும் மழைப்பொழிவு அதிகரித்ததாகக் கூறப்படுகிறது.
சில பகுதிகளில், குறிப்பாக அபுதாபியில், மிதமான முதல் கனத்த மழை வரை பெய்த நிலையில், தாழ்வான பகுதிகளில் குளம்போல் நீர் தேங்கியதாகவும், சிறிய அளவிலான வெள்ளப்பெருக்கு ஏற்பட்டதாகவும் குடியிருப்புவாசிகள் தெரிவித்துள்ளனர்.
இவ்வாறு நாடு முழுவதும் கனமழை கொட்டித் தீர்க்கும் நிலையில், தற்போதைய வானிலையானது வளிமண்டல நிலையற்றத்தன்மையின் ஒரு பரந்த வடிவத்தின் பகுதியாகும் என்றும், மார்ச் 27 வரை பல மழை அலைகள் தொடர்ந்து வரும் என்றும் வானிலை ஆய்வுத் துறை தெரிவித்துள்ளது.
- மார்ச் 24 (செவ்வாய்): நாடு முழுவதும் மற்றொரு மழை அலை எதிர்பார்க்கப்படுகிறது.
- மார்ச் 25 (புதன்): வடக்கு மற்றும் கிழக்கு பிராந்தியங்களில் மழை பெய்ய வாய்ப்புள்ளது.
- மார்ச் 26–27: வானம் படிப்படியாகத் தெளிவடைவதற்கு முன், கடைசி மழை அலை எதிர்பார்க்கப்படுகிறது.
மேகக் கூட்டங்கள் பல்வேறு பிராந்தியங்களைக் கடந்து நகர்வதால், மழைப்பொழிவு விட்டுவிட்டுப் பெய்யும் என்றும், ஒவ்வொரு மழைக்கும் இடையே குறுகிய இடைவெளிகள் இருக்கும் என்றும் வானிலை ஆய்வு மையம் குறிப்பிட்டுள்ளது.
அமீரகத்தில் நிலவும் சீரற்ற வானிலையைக் கருத்தில் கொண்டு, வாகனங்களை ஓட்டும்போது, குறிப்பாக நீர் தேங்கிய பகுதிகளில் மிகுந்த முன்னெச்சரிக்கையுடன் இருக்குமாறு அதிகாரிகள் பொதுமக்களை வலியுறுத்தியுள்ளனர். இந்த வாரம் முழுவதும் நிலையற்ற வானிலை தொடரும் என எதிர்பார்க்கப்படுவதால், வாகன ஓட்டிகள் தங்கள் வாகனங்களின் வேகத்தைக் குறைத்து ஓட்டவும், பாதுகாப்பான இடைவெளியைப் பராமரிக்கவும், வெள்ளப்பெருக்கு ஏற்படக்கூடிய இடங்களைத் தவிர்க்கவும் அறிவுறுத்தப்படுகிறார்கள்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
