அமீரகத்தில் கடந்த பல வருடங்களாக வெள்ளிக்கிழமையே வார இறுதி விடுமுறையாக இருந்து வந்த நிலையில் இந்தாண்டு ஜனவரி 1 முதல், சனி மற்றும் ஞாயிறு நாட்டில் புதிய வார இறுதி விடுமுறை நாளாக அறிவிக்கப்பட்டது. அரசு நிறுவனங்கள் அனைத்தும் வாரத்தில் நான்கரை நாட்கள் வேலை நாட்களாகவும் வெள்ளிக்கிழமை அரை நாள், சனிக்கிழமை, ஞாயிற்றுக்கிழமை என இரண்டரை நாட்கள் விடுமுறையையும் பின்பற்றுகின்றன.
தனியார் நிறுவனங்கள் தங்களுக்கு ஏற்ற வகையில் வார இறுதி விடுமுறை நாட்களை வகுத்துக்கொள்ளலாம் என அரசு கூறியபடியால், சில நிறுவனங்கள் அரசு நிறுவனங்கள் போன்றே இரண்டரை நாட்கள் விடுமுறையாகவும், சில நிறுவனங்கள் சனிக்கிழமையை விடுமுறை நாளாகவும் இன்னும் ஒரு சில தனியார் நிறுவனங்கள் ஞாயிற்றுக்கிழமையை விடுமுறை நாளாகவும் அறிவித்துள்ளன.
இது பற்றி சர்வே மேற்கொண்ட சர்வதேச ஆராய்ச்சி மற்றும் பகுப்பாய்வு நிறுவனமான YouGov, இந்த மாற்றம் பல்வேறு வயதினரை எவ்வாறு பாதித்துள்ளது என்பதை வெளிப்படுத்தியுள்ளது. அதன்படி 35 முதல் 44 வயதுக்குட்பட்ட முதியவர்கள் மற்றும் 45 வயதுக்கு மேற்பட்டவர்கள் ஆகியோரை விட, 18 முதல் 24 வயதுக்குட்பட்ட இளைஞர்கள் இந்த மாற்றத்தால் அதிகம் பாதிக்கப்பட்டுள்ளதாகக் கூறுகின்றனர்.
79 சதவீதம் பேர் தங்கள் நிறுவனங்கள் புதிய வேலை வார இறுதி கொள்கைக்கு மாறிவிட்டதாகக் கூறுகிறார்கள். இந்த மாற்றத்தின் காரணமாக எதிர்கொள்ளும் சவால்களைப் பற்றி கேட்டபோது, பணிபுரிந்தவர்களில் கிட்டத்தட்ட மூன்றில் ஒரு பகுதியினர் (31 சதவீதம்) தங்கள் வார இறுதி ஓய்வு நேர அட்டவணையை சரிசெய்வதில் சிரமம் இருப்பதாக தெரிவித்துள்ளனர். இதேபோன்ற அளவில் மற்றொரு பிரிவினர் (30 சதவீதம்) வெள்ளிக்கிழமைகளில் அதிக போக்குவரத்து நெரிசலை அனுபவித்ததாகக் கூறியுள்ளனர்.
ஐக்கிய அரபு அமீரகத்தில் உள்ளவர்கள் தற்போது எதிர்கொள்ளும் அல்லது எதிர்காலத்தில் எதிர்கொள்ளக்கூடிய பிற சிக்கல்களில், புதிய வேலை நாட்கள் (29 சதவீதம்), விடுமுறை நாட்களைத் திட்டமிடுவதில் சிக்கல் (26 சதவீதம்) மற்றும் வெவ்வேறு வேலை நாட்கள் காரணமாக குறைவான குடும்ப நேரம் செலவிடுதல் (24 சதவீதம்) போன்றவற்றைக் கூறியுள்ளனர்.
புதிய வேலை வாரக் கொள்கையின் பலன்களைப் பற்றி கேட்டபோது, அதற்கு பதிலளித்தவர்களில் கிட்டத்தட்ட பாதி பேர் (48 சதவீதம்) குறுகிய வேலை வார நாட்கள் சிறந்த வேலை-வாழ்க்கை சமநிலைக்கு வழிவகுத்து, இது அவர்களின் உற்பத்தித்திறனை அதிகரித்ததாகக் கூறியிருக்கின்றனர்.
இந்த தரவுகளானது ஜனவரி 26 முதல் ஜனவரி 31 வரை, ஐக்கிய அரபு அமீரகத்தில் வசிக்கும் 1,026 நபர்களிடம் இருந்து ஆன்லைனில் சேகரிக்கப்பட்டது என்பது குறிப்பிடத்தக்கது.
