அபுதாபி சுகாதாரத் துறையானது (DoH) அபுதாபி பொது சுகாதார மையத்துடன் (ADPHC) இணைந்து, தனது தனிப்பயனாக்கப்பட்ட எடை மேலாண்மைத் திட்டத்தின் ஒரு பகுதியாக, உடல் பருமனுக்கான ஒரு புதிய தினசரி வாய்வழி சிகிச்சையை (oral treatment) அறிமுகப்படுத்தியுள்ளது.
இந்தத் திட்டம், மருத்துவ சிகிச்சை, நடத்தை சார்ந்த ஆதரவு மற்றும் தொடர்ச்சியான டிஜிட்டல் கண்காணிப்பு ஆகியவற்றை ஒருங்கிணைத்து, சுகாதார விளைவுகளையும் வாழ்க்கைத் தரத்தையும் மேம்படுத்தும் என்று அதிகாரிகள் தெரிவித்துள்ளனர். மேலும் உடல் பருமன் பராமரிப்பில் உள்ள ஒரு முக்கிய சவாலான நீண்ட கால சிகிச்சைக்கு மாற்றாக இந்த புதிய வாய்வழி சிகிச்சை முறை இருக்கும் என்றும் அதிகாரிகள் கூறுகின்றனர்.
புதிய சிகிச்சை முறை
“orforglipron” என்ற இந்த மருந்து, பசியையும் உணவு உட்கொள்ளலையும் ஒழுங்குபடுத்துவதன் மூலம் செயல்படுவதாகவும், இது உடல் பருமனானவர்கள் தங்கள் எடையை மிகவும் திறம்பட நிர்வகிக்க உதவுவதாகவும் கூறப்படுகிறது.
அதுமட்டுமில்லாமல், உடல் பருமன் உள்ள பெரியவர்கள் அல்லது அது தொடர்பான நோய்களுடன் அதிக எடை கொண்டவர்களுக்கு, வாய் வழியாக எடுத்துக்கொள்ளப்படும் இந்த சிகிச்சையை, அமெரிக்காவிற்குப் பிறகு உலகளவில் அங்கீகரித்த இரண்டாவது நாடு ஐக்கிய அரபு அமீரகம் ஆகும்.
இந்த சிகிச்சையானது இம்பீரியல் காலேஜ் லண்டன் நீரிழிவு மற்றும் நாளமில்லாச் சுரப்பி மையம் (Imperial College London Diabetes and Endocrine Centre) மூலம் வழங்கப்படும். இது பின்வருவனவற்றை உள்ளடக்கிய ஒரு ஒருங்கிணைந்த மாதிரியின் மூலம் சிகிச்சையை வழங்கும்:
- தனிப்பயனாக்கப்பட்ட மருத்துவ ஆதரவு
- டிஜிட்டல் கண்காணிப்பு
- விரிவான சிகிச்சை பாதுகாப்பு
நீண்டகால ஆரோக்கியத்திற்கு ஆதரவளித்தல்
இந்த முயற்சியானது, ஒருங்கிணைந்த, நோயாளியை மையமாகக் கொண்ட சுகாதாரப் பராமரிப்பை நோக்கிய அபுதாபியின் உந்துதலைப் பிரதிபலிக்கிறது என்றும், இது தனிநபர்கள் நீடித்த வாழ்க்கை முறை மாற்றங்களை மேற்கொள்ள உதவுவதோடு, நீண்டகால விளைவுகளையும் மேம்படுத்துகிறது என்றும் சுகாதாரத் துறையின் (DoH) துணைச் செயலாளர் நௌரா கமிஸ் அல் கைத்தி கூறியுள்ளார்.
குறிப்பாக, இந்தத் திட்டத்தின் கீழ் தகுதியுள்ள நோயாளிகளுக்கு சிகிச்சைக்கான செலவு ஈடுசெய்யப்படும் என்று தெரிவிக்கப்பட்டுள்ளது. இது அணுகலை விரிவுபடுத்துவதோடு, புதுமையான மற்றும் முழுமையான பராமரிப்புத் தீர்வுகள் மூலம் உடல் பருமனைச் சமாளிப்பதற்கான முயற்சிகளை வலுப்படுத்துகிறது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
