துபாய் விமான நிலையம் வழியாக பயணிக்கும் பயணிகளின் வசதிக்காக, விமான நிறுவனங்கள் மற்றும் பயண முகவர்களுக்கு இடையிலான உறவை நிர்வகிக்கும் தெளிவான விதிகளை வகுக்கும் ‘விமானப் போக்குவரத்து நுகர்வோர் நல வழிகாட்டுதலை’ (Aviation Consumer Welfare Directive) துபாய் சிவில் விமானப் போக்குவரத்து ஆணையம் அறிமுகப்படுத்தியுள்ளது.
இந்த நடவடிக்கை, பயணம் முழுவதும் வெளிப்படைத்தன்மையை மேம்படுத்துவதையும், நியாயமான கவனிப்பை உறுதி செய்வதையும் நோக்கமாகக் கொண்டுள்ளது. துபாய் சிவில் விமானப் போக்குவரத்து ஆணையத்தின் (Dubai Civil Aviation Authority) இந்த முயற்சியின் மூலம், துபாய் வழியாகப் பயணிக்கும் பயணிகளின் உரிமைகள் மற்றும் புகார்கள் முறைப்படுத்தப்படும் என கூறப்பட்டுள்ளது.
இந்த வழிகாட்டுதலுடன், ஒரு புதிய டிஜிட்டல் சேவையும் அறிமுகப்படுத்தப்பட்டுள்ளது. இது பயணிகள் ஆன்லைனில் புகார்களைப் பதிவு செய்யவும், நிகழ்நேரத்தில் அவற்றின் நிலையை கண்காணிக்கவும், விமான மற்றும் பயண முகவர் சேவைகள் குறித்த கருத்துக்களைச் சமர்ப்பிக்கவும் அனுமதிக்கிறது.
ஆகவே, பயணிகள் இப்போது புகார்களை நேரடியாக ஆணையத்திடம் சமர்ப்பிக்கவும், தங்கள் வழக்குகளை ஆன்லைனில் கண்காணிக்கவும் மற்றும் சேவைகள் குறித்த கருத்துக்களைப் பகிரவும் முடியும் என்று துபாயின் சிவில் விமானப் போக்குவரத்து ஆணையம் கூறியுள்ளது.
குறிப்பாக, பயணிகள் தங்கள் கவலைகளை எவ்வாறு அடுத்த கட்டத்திற்கு எடுத்துச் செல்வது என்று உறுதியாகத் தெரியாதபோது, தாமதங்கள், ரத்துசெய்தல் மற்றும் சேவைத் தகராறுகள் போன்ற சிக்கல்களைக் கையாள்வதற்கு இது மிகவும் கட்டமைக்கப்பட்ட செயல்முறையை உருவாக்குகிறது.
மேலும், பயணிகளுக்கும் சேவை வழங்குநர்களுக்கும் இடையே நியாயமான முடிவுகளை உறுதி செய்வதற்காக, இந்த ஆணையம் ஒரு மத்தியஸ்தராகச் செயல்படும் என்று அதிகாரிகள் தெரிவித்துள்ளனர்.
விமான நிறுவனங்கள் மற்றும் முகவர்கள் மீதான தாக்கம்
DCAAயின் இந்த உத்தரவு, விமான நிறுவனங்கள் மற்றும் உரிமம் பெற்ற பயண முகவர்கள் மீது தெளிவான பொறுப்புகளை விதிக்கிறது. அவர்கள் சேவைத் தரங்களைப் பூர்த்தி செய்யவும், புகார்களைத் தீர்ப்பதில் ஒத்துழைக்கவும் இது வலியுறுத்துகிறது.
ஒவ்வொரு ஆண்டும் மில்லியன் கணக்கான பயணிகளைக் கையாளும் துபாயின் விமானப் போக்குவரத்துத் துறையில், சேவைத் தரத்தை மேம்படுத்துவதற்கும் நம்பிக்கையை வலுப்படுத்துவதற்கும் மேற்கொள்ளப்படும் துபாய் அரசு மேற்கொள்ளும் பரந்த முயற்சிகளின் ஒரு பகுதியாக இந்த முன்னெடுப்பு அமைந்துள்ளது.
இவ்வாறு தெளிவான விதிமுறைகளை ஒரு டிஜிட்டல் புகார் தளத்துடன் இணைப்பதன் மூலம், துபாய் பயணிகளுக்கு மிகவும் நம்பகமான மற்றும் வெளிப்படையான பயண அனுபவத்தை வழங்குவதை விமானப் போக்குவரத்து நுகர்வோர் நல வழிகாட்டுதல்கள் நோக்கமாகக் கொண்டுள்ளது குறிப்பிடத்தக்கது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
