துபாய் சர்வதேச விமான நிலையத்திற்கு அருகில் தனது முதல் ஏர் டாக்ஸி நிலையத்தைத் தயாராக வைத்திருப்பதன் மூலம், துபாய் போக்குவரத்தின் எதிர்காலத்தை நோக்கி ஒரு முக்கிய அடியை எடுத்து வைத்துள்ளது. இது, மேம்பட்ட நகர்ப்புறப் போக்குவரத்தை நோக்கிய நகரத்தின் பயணத்தில் ஒரு மைல்கல்லைக் குறிக்கிறது.
துபாயின் பட்டத்து இளவரசர் ஷேக் ஹம்தான் பின் முகமது பின் ரஷீத் அல் மக்தூம் அவர்களால் அறிவிக்கப்பட்ட, பிரத்யேகமாக உருவாக்கப்பட்ட இந்த நிலையம், டவுன்டவுன், பாம் ஜுமைரா மற்றும் துபாய் மெரினா உள்ளிட்ட முக்கிய இடங்களை இணைக்கும் ஒரு பரந்த ஏர் டாக்ஸி வலையமைப்பின் ஒரு பகுதியாக இருக்கும் என்று அதிகாரிகள் தெரிவித்துள்ளனர். இவை அனைத்தும் இந்த ஆண்டின் இறுதிக்குள் கட்டி முடிக்கப்படும் என எதிர்பார்க்கப்படுகிறது.
அதுமட்டுமில்லாமல், இந்த ஆண்டு பொதுப் பயன்பாட்டிற்காக ஏர் டாக்ஸி சேவைகள் தொடங்கப்படும் என்றும், இதன் முதல் நிலையம் ஆண்டுக்கு சுமார் 1,70,000 பயணிகளுக்கு சேவை செய்யும் திறன் கொண்டது என்றும் நிலையத்தின் முன்னேற்றத்தை ஆய்வு செய்த பட்டத்து இளவரசர் உறுதிப்படுத்தியுள்ளார்.
இது குறித்து ஷேக் ஹம்தான் பேசுகையில், பயண நேரத்தைக் குறைப்பதிலும், நகரம் முழுவதும் இணைப்பை மேம்படுத்துவதிலும் இந்தத் திட்டம் ஒரு முக்கியப் படியாகும் என்றும், இது துபாயின் ஸ்மார்ட் மற்றும் தடையற்ற போக்குவரத்து குறித்த தொலைநோக்குப் பார்வையுடன் ஒத்துப்போகிறது என்றும் விவரித்துள்ளார்.
அதிகாரிகள் வெளியிட்டுள்ள விபரங்களின் படி, இந்த மேம்பட்ட வசதியில் பின்வரும் கட்டமைப்புகள் அடங்கும்:
- 3,100 சதுர மீட்டர் பரப்பளவுள்ள ஒரு நான்கு மாடிக் கட்டிடம்
- eVTOL விமானங்களுக்கான இரண்டு புறப்பாடு மற்றும் தரையிறங்கும் தளங்கள்
- பிரத்யேக மின்னேற்றும் உள்கட்டமைப்பு
- குளிரூட்டப்பட்ட பயணிகள் பகுதிகள்
- ஒரு இரண்டு அடுக்கு பார்க்கிங்
இந்த நிலையம் உயர் சர்வதேச பாதுகாப்புத் தரங்களைப் பூர்த்தி செய்யும் வகையில் உருவாக்கப்பட்டுள்ளதாக அதிகாரிகள் தெரிவித்துள்ளனர். இதன் உள்கட்டமைப்பை ஸ்கைபோர்ட்ஸ் இன்ஃப்ராஸ்ட்ரக்சர் நிறுவனமும், விமானச் செயல்பாடுகளை ஜோபி ஏவியேஷன் நிறுவனமும் நிர்வகிக்கின்றன என்பது குறிப்பிடத்தக்கது.
பயண நேரம் வியத்தகு முறையில் குறையும்
துபாய் முழுவதும் உள்ள முக்கிய இடங்களுக்கு இடையே வேகமான, தடையற்ற மற்றும் பாதுகாப்பான பயணத்தை விரும்பும் குடியிருப்பாளர்கள் மற்றும் பார்வையாளர்களுக்கு இந்த ஏர் டாக்ஸி ஒரு தனித்துவமான புதிய போக்குவரத்து விருப்பத்தை வழங்கும் என்பதில் மாற்றுக்கருத்து இல்லை. அதிகாரிகளின் கூற்றுப்படி, துபாய் சர்வதேச விமான நிலையத்திலிருந்து பாம் ஜுமைரா வரையிலான பயணம், காரில் சுமார் 45 நிமிடங்கள் ஆகும் நிலையில், ஏர் டாக்ஸியில் ஏறக்குறைய 10 நிமிடங்களில் முடிந்துவிடும் என எதிர்பார்க்கப்படுகிறது.
இது ஏர் டாக்ஸிகளை உள்ளூர்வாசிகள் மற்றும் சுற்றுலாப் பயணிகள் இருவருக்கும் ஒரு வேகமான, உயர்தர மாற்றாக நிலைநிறுத்துகிறது.
மார்காமிலிருந்து அல் மக்தூம் சர்வதேச விமான நிலையத்திற்கு 17 நிமிட விமானி இயக்கிய விமானப் பயணம் மற்றும் கடுமையான பாலைவனச் சூழல்களில் நடத்தப்பட்ட பல சோதனை ஓட்டங்கள் உள்ளிட்ட வெற்றிகரமான சோதனைகளைத் தொடர்ந்து இந்தத் தொடக்கம் நிகழ்ந்துள்ளது குறிப்பிடத்தக்கது.
அதுமட்டுமில்லாமல், இனி வரும் காலத்தில் மெட்ரோ, பேருந்துகள் மற்றும் பகிரப்பட்ட போக்குவரத்து சேவைகளை ஒருங்கிணைக்கத் திட்டமிட்டுள்ளதால், ஏர் டாக்சிகள் ஒரு பல்முனைப் போக்குவரத்து அமைப்பின் அங்கமாக மாறவிருக்கின்றன. எனவே, இது வெறும் ஒரு ஆடம்பரத் தேர்வாக மட்டுமல்லாமல், நடைமுறைக்கு உகந்த ஒன்றாகவும் அமையும் என்று எதிர்பார்க்கலாம்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
