ஐக்கிய அரபு அமீரகத்தில் 2.0 ரிக்டர் அளவிலான ஒரு லேசான நிலநடுக்கம் பதிவாகியுள்ளதாக அமீரகத்தின் தேசிய வானிலை மையம் (NCM) அறிவித்துள்ளது. இது தொடர்பாக NCM வெளியிட்ட விபரங்களின் படி, ஏப்ரல் 19 அன்று அமீரக நேரப்படி இரவு 9.15 மணியளவில், அல் ஹலா (Al Halah) பகுதியில் பூமிக்கு அடியில் 3.9 கிலோமீட்டர் ஆழத்தில் இந்த நில அதிர்வு ஏற்பட்டது தெரிய வந்துள்ளது. மேலும், இந்த நிலநடுக்கம் மிகவும் லேசானதே என்றும், இதனால் எவ்வித சேதமும் ஏற்படவில்லை என்றும் அதிகாரிகள் உறுதிப்படுத்தியுள்ளனர்.
சமீப மாதங்களாக இப்பகுதியில் பதிவாகி வரும் தொடர் சிறிய நில அதிர்வுகளின் ஒரு பகுதியாகவே இது கருதப்படுகிறது. முன்னதாக, இந்த ஆண்டின் தொடக்கத்தில், ஜனவரி மாதத்தில் முசந்தம் (Musandam) பகுதிக்குத் தெற்கே 2.2 ரிக்டர் அளவிலான நிலநடுக்கம் கண்டறியப்பட்டது. அதேவேளையில், டிசம்பர் மாதத்தில் அதே பகுதியில் சற்று அதிக தீவிரத்துடன் கூடிய 2.9 ரிக்டர் அளவிலான நில அதிர்வு ஒன்று பதிவாகியிருந்தது.
அதற்கு முன்பு, நவம்பர் மாதத்தில், முசந்தம் பகுதியில் ஏற்பட்ட 4.6 ரிக்டர் அளவிலான நிலநடுக்கம், ஐக்கிய அரபு அமீரகத்தின் பல்வேறு பகுதிகளில் உணரப்பட்டது. இருப்பினும், அதனால் குறிப்பிடத்தக்க அளவிலான சேதங்கள் ஏதும் ஏற்படவில்லை.
ஐக்கிய அரபு அமீரகம் ஒரு முக்கிய நிலநடுக்க அபாய மண்டலமாகக் கருதப்படாவிட்டாலும், உலகின் அதிகபட்ச நில அதிர்வுச் செயல்பாடு கொண்ட பிராந்தியங்களில் ஒன்றான ‘ஜாக்ரோஸ் மலைத்தொடருக்கு’ (Zagros Mountains) மிக அருகில் அமைந்துள்ளதன் காரணமாக, அவ்வப்போது இத்தகைய சிறிய நில அதிர்வுகள் உணரப்படுவதாக நிபுணர்கள் தெரிவிக்கின்றனர்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
