குழந்தைகள் மற்றும் 18 வயது வரையிலான இளம் பருவத்தினருக்கு சிறப்பு மனநல சேவைகளை வழங்கும் ஒரு பிரத்யேக அமைப்பை அபுதாபி துவங்கியுள்ளது. ‘சகீனா ஃபார் சில்ட்ரன்’ (SAKINA for Children)-என்ற இந்த வலையமைப்பை தொடங்கியதன் மூலம், குழந்தைகளின் மனநலப் பராமரிப்பை வலுப்படுத்துவதில் அபுதாபி ஒரு முக்கிய படியை எடுத்துள்ளது.
ஐக்கிய அரபு அமீரகத்தின் ‘Year of the Family’ ஆண்டின் போது ‘PureHealth’ நிறுவனத்தால் அறிவிக்கப்பட்ட இந்த முயற்சி, உணர்ச்சி, நடத்தை மற்றும் வளர்ச்சி சார்ந்த சவால்களை எதிர்கொள்ளும் இளம் வயதினருக்கு ஆரம்பகாலத் தலையீடு, நோயறிதல் மற்றும் சிகிச்சையை எளிதில் கிடைக்கச் செய்வதை நோக்கமாகக் கொண்டுள்ளது. குழந்தையை மையமாகக் கொண்ட ஒரு பராமரிப்பு மாதிரியாக வடிவமைக்கப்பட்டுள்ள SAKINA, வெளிநோயாளர் சேவைகள், சிறப்பு சிகிச்சைகள் மற்றும் உள்நோயாளர் மனநலப் பராமரிப்பு ஆகியவற்றை ஒரே ஒருங்கிணைந்த அமைப்பின் கீழ் ஒன்றிணைக்கிறது.
இந்தத் திட்டம், குழந்தை மற்றும் இளம் பருவ மனநல மருத்துவம், வளர்ச்சிசார் குழந்தை மருத்துவம், தொழில்சார் சிகிச்சை, பேச்சு மற்றும் மொழி சிகிச்சை, நடத்தை சார்ந்த தலையீடுகள் மற்றும் குடும்ப உளவியல் ஆதரவு உள்ளிட்ட பலதரப்பட்ட சேவைகளை வழங்குகிறது. இதில் உணர்வுசார் சிகிச்சை அறைகள், டிஜிட்டல் சிகிச்சைக்கான இடங்கள், அனைவரையும் உள்ளடக்கிய விளையாட்டுப் பகுதிகள் மற்றும் 24 மணி நேரமும் பராமரிப்பை வழங்கும் பிரத்யேக உள்நோயாளிகள் பிரிவுகள் போன்ற சிறப்பு வசதிகளும் இடம்பெற்றுள்ளதாகக் கூறப்படுகிறது.
ஒவ்வொரு குழந்தையின் வளர்ச்சித் தேவைகள், மருத்துவ நிலை மற்றும் குடும்பச் சூழ்நிலைகளுக்கு ஏற்ப தனிப்பயனாக்கப்பட்ட சிகிச்சைத் திட்டங்களை வழங்குவதற்காக இந்தச் சேவை வடிவமைக்கப்பட்டுள்ளது என்று அதிகாரிகள் தெரிவிக்கின்றனர். அதுமட்டுமில்லாமல், நரம்பியல் பன்முகத்தன்மை மற்றும் கடுமையான மனநலப் பிரச்சினைகள் உள்ளவர்கள் உட்பட, தீவிர சிகிச்சை தேவைப்படும் குழந்தைகளுக்கும் இந்த வலையமைப்பு ஆதரவளிக்கும் என்று கூறப்படுகிறது.
பியூர்ஹெல்த் (PureHealth) அமைப்பின்படி, ‘சகினா ஃபார் சில்ட்ரன்’ (SAKINA for Children) அதன் சிகிச்சைத் திட்டங்கள் மூலம் ஒவ்வொரு மாதமும் 500 குழந்தைகள் வரை ஆதரவளிக்கும் திறன் கொண்டிருக்கும் என்பது தெரிய வந்துள்ளது. மேலும், பல்வேறு பின்னணிகளைக் கொண்ட குடும்பங்கள் எளிதில் அணுகுவதை உறுதி செய்வதற்காக, அரபு, ஆங்கிலம், இந்தி, உருது மற்றும் மலையாளம் ஆகிய மொழிகளில் சேவைகள் வழங்கப்படும் என்று தெரிவிக்கப்பட்டுள்ளது.
இந்த முயற்சியானது, 34 துணை மருத்துவ மையங்கள், இரண்டு மனநல மையங்கள், இரண்டு மனநல உள்நோயாளிகள் வசதிகள், இரண்டு நரம்பியல் பன்முகத்தன்மை மையங்கள் மற்றும் ஒன்பது ஒருங்கிணைந்த மருத்துவ மையங்களை உள்ளடக்கிய ஒரு பரந்த மனநல வலையமைப்பு மூலம் செயல்படும் என்றும் தெரிவிக்கப்பட்டுள்ளது. இதற்கு 500-க்கும் மேற்பட்ட சுகாதாரப் பணியாளர்கள் ஆதரவளிப்பார்கள் என்றும் கூறப்பட்டுள்ளது.
மேற்கூறியவாறு தடுப்பு, ஆரம்பகாலத் தலையீடு மற்றும் நீண்டகாலக் குடும்ப நலன் ஆகியவற்றில் வலுவான கவனம் செலுத்தி, ஐக்கிய அரபு அமீரகத்தில் குழந்தைகள் மனநலப் பராமரிப்பை அணுகும் விதத்தை மறுவடிவமைப்பதில் இந்தத் தொடக்கம் ஒரு முக்கிய மைல்கல் என்று சுகாதார அதிகாரிகள் விவரித்துள்ளனர்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
