உலகம் முழுவதும் AI ன் ஆதிக்கம் நாளுக்கு நாள் அதிகரித்து வரும் நிலையில், புதிய செயற்கை நுண்ணறிவு (AI) அடிப்படையிலான பார்க்கிங் அமைப்பை துபாய் அறிமுகம் செய்யவுள்ளது. அதன் ஒரு பகுதியாக, துபாயின் மூன்று முக்கிய இடங்களில் 500-க்கும் மேற்பட்ட ஸ்மார்ட் கேமராக்களை நிறுவி வருவதாக பார்க்கின் நிறுவனம் புதன்கிழமை (மே 13) அறிவித்துள்ளது.
இந்தத் திட்டத்தின் முதல் கட்டமாக, டிரேட் சென்டர் 1, புர்ஜ் கலிஃபா மற்றும் அல் கார்னிச் ஆகிய இடங்களில் இந்த புதிய வகை பார்க்கிங் திட்டம் செயல்படுத்தப்படுவதாக பார்க்கின் (parkin) அதிகாரிகள் தெரிவித்துள்ளனர். மேலும் இது வாகன ஓட்டிகளுக்கு வாகனத்தை நிறுத்துவதை வேகமாகவும் வசதியாகவும் மாற்றுவதற்காக வடிவமைக்கப்பட்டுள்ளதாகவும் கூறியுள்ளனர்.
இந்த புதிய தொழில்நுட்பம், ஓட்டுநர்கள் பார்க்கிங் இடங்களைத் தேடுவதில் செலவிடும் நேரத்தைக் குறைக்கவும், அபராதம் விதிக்கப்படுவதற்கான வாய்ப்புகளைக் குறைக்கவும், பார்க்கின் மொபைல் செயலி மூலம் தானியங்கி பார்க்கிங் கட்டணச் செலுத்துதலைச் செயல்படுத்தவும் உதவும் என்று அதிகாரிகள் வலியுறுத்துகின்றனர்.
சாலையோரக் கேமராக்களுடன், துபாயில் உள்ள கட்டுப்படுத்தப்பட்ட பார்க்கிங் மண்டலங்களிலும் பார்க்கிங் பகுதி கேமராக்கள் நிறுவப்பட்டுள்ளன. மேலும் 200 கேமராக்கள் பல இடங்களில் சேர்க்கப்பட உள்ளதாகத் தகவல்கள் வெளியாகியுள்ளன.
பார்க்கின் வெளியிட்டுள்ள விபரங்களின் படி, இந்த அமைப்பு, வாகனங்களின் படங்களைப் பிடிக்கவும், வாகனப் பதிவு எண்களைத் தானாகவே படிக்கவும் திறன் கொண்ட AI அடிப்படையிலான கேமராக்களைப் பயன்படுத்துகிறது. அதுமட்டுமில்லாமல், வாகனங்கள் உள்ளே நுழையும் மற்றும் வெளியேறும் நேரங்களைக் கண்டறியவும், வாகன நிறுத்துமிடத்தின் கால அளவைக் கணக்கிடவும், தானாகவே பணம் செலுத்துதலைச் செயல்படுத்தவும், மற்றும் வாகன நிறுத்துமிட விதிமீறல்களை அடையாளம் காணவும் இந்தத் தொழில்நுட்பம் உதவுகிறது.
இதிலுள்ள குறிப்பிடத்தக்க சிறப்பம்சம் என்னவெனில், அனைத்து கேமராக்களும் சூரிய சக்தியில் இயங்கும் என்றும், நிகழ்நேர பார்க்கிங் ஆக்கிரமிப்பு கண்காணிப்பை ஆதரிக்கும் என்றும் பார்க்கின் நிறுவனம் கூறியுள்ளது. மேலும், இந்த முழு அமைப்பும் பார்க்கின் செயலியில் ஒருங்கிணைக்கப்படும் என்றும், இது பயனர்கள் பார்க்கின் வாலட் அம்சம் மூலம் தானியங்கி முறையில் பணம் செலுத்த அனுமதிக்கும் என்றும் அந்நிறுவனம் தெரிவித்துள்ளது.
இந்த அறிமுகம், பார்க்கிங் இடங்களின் இருப்பை மேம்படுத்தவும், வாகனப் பயன்பாட்டை அதிகரிக்கவும், மற்றும் பார்க்கிங் இடங்களைத் தேடும் ஓட்டுநர்களால் ஏற்படும் நெரிசலைக் குறைக்கவும் உதவும் என்று நிறுவனம் கூறியுள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
