துபாயில் சுற்றுலா விசா பெறுவது எளிதாக இருக்கும் பட்சத்தில் தற்பொழுது அதனை மிகவும் எளிதாக்கும் பொருட்டு 48 வேலை மணி நேரத்திற்குள் ஒற்றை நுழைவு சுற்றுலா விசாக்களை (single entry visa) வழங்கும் திட்டத்தை துபாய் அறிமுகப்படுத்தியது. துபாயின் இந்த புதிய திட்டமானது, அதிக பயணிகளை ஈர்க்கும் என எதிர்பார்க்கப்படுகிறது. இந்த வேகமான செயலாக்கம், சுற்றுலாப் பயணிகள், வணிகப் பயணிகள் மற்றும் கடைசி நேரப் பயணங்களைத் திட்டமிடும் குடும்பங்களுக்குப் பயனளிக்கும் என்று பயணத் துறை நிர்வாகிகள் கூறுகின்றனர்.
தேவையான அனைத்து ஆவணங்களையும் சமர்ப்பித்து, விண்ணப்ப செயல்முறையை முடித்த பிறகு, விண்ணப்பதாரர்கள் 48 வேலை மணி நேரத்திற்குள் 30-நாள் அல்லது 60-நாள் ஒற்றை நுழைவு சுற்றுலா விசாக்களைப் பெறலாம் என்று துபாயில் உள்ள குடியிருப்பு மற்றும் வெளிநாட்டினர் விவகாரங்களுக்கான பொது இயக்குநரகம் (GDRFA) சமீபத்தில் அறிவித்துள்ளது.
இந்த நடவடிக்கை, பயணிகளுக்கான நிச்சயமற்ற தன்மையைக் குறைத்து, துபாயை ஆண்டு முழுவதும் பயணிக்க ஏற்ற இடமாக வலுப்படுத்தும் என்று பயண வல்லுநர்கள் நம்புகின்றனர். குறிப்பாக, ஹோட்டல்கள், விமான நிறுவனங்கள் மற்றும் சுற்றுலாத் தலங்கள் கவர்ச்சிகரமான சலுகைகளை வழங்கும் கோடை காலத்தில் இது மிகவும் பயனுள்ளதாக இருக்கும் என்று அவர்கள் தெரிவித்துள்ளனர்.
தொழில்துறை வல்லுநர்களின் கூற்றுப்படி, விரைவான விசா செயலாக்கம் பயணிகளின் பயணத் திட்டமிடலை எளிதாக்குகிறது மற்றும் ஓய்வு மற்றும் வணிக நோக்கங்களுக்காக திடீர் பயணங்களை மேற்கொள்ளவும் ஊக்குவிக்கிறது.
குறிப்பாக, கிழக்கு மற்றும் மேற்கு நாடுகளை இணைக்கும் ஒரு உலகளாவிய மையமாக துபாய் விளங்குவதால், வணிகப் பயணிகள் பெரும்பாலும் குறுகிய கால அறிவிப்பில் பயணிக்க வேண்டியுள்ளது. இதனால், விரைவான விசா ஒப்புதல்கள் குறிப்பாகப் பயனளிப்பதாக பயண முகவர்கள் தெரிவிக்கின்றனர்.
இந்த அறிவிப்பு, வருங்காலப் பயணிகளிடையே ஏற்கெனவே ஆர்வத்தை ஏற்படுத்தியுள்ளது என்றும், சர்வதேச சந்தைகளில் இது குறித்த விழிப்புணர்வு அதிகரிக்கும்போது, பயணத் தேவை மேலும் அதிகரிக்கும் என்றும் அவர்கள் குறிப்பிட்டுள்ளனர்.
விண்ணப்பிப்பது எப்படி?
GDRFA வழங்கிய தகவலின்படி, ஒற்றை நுழைவு சுற்றுலா விசாவுக்கான விண்ணப்பங்கள், அங்கீகரிக்கப்பட்ட சுற்றுலா அலுவலகங்கள் மூலமாகவே சமர்ப்பிக்கப்பட வேண்டும்.
விண்ணப்பதாரர்கள் பொதுவாக வழங்க வேண்டிய ஆவணங்கள்:
- சமீபத்திய தனிப்பட்ட புகைப்படம்
- செல்லுபடியாகும் பாஸ்போர்ட்
- தேசிய அடையாள அட்டை (சில நாட்டினருக்கு)
சரிபார்க்கப்பட்ட அனைத்து ஆவணங்களும் சமர்ப்பிக்கப்பட்டவுடன், சில சமயங்களில் ஒரு நாளுக்குள் விசாக்கள் வழங்கப்படலாம், மற்ற சமயங்களில் 48 வேலை மணிநேரம் வரை ஆகலாம்.
மேலும், செயலாக்கத்தில் ஏற்படும் தாமதங்களைத் தவிர்க்க, அனைத்து ஆவணங்களும் முழுமையாகவும் துல்லியமாகவும் இருப்பதை உறுதி செய்யுமாறு பயண வல்லுநர்கள் விண்ணப்பதாரர்களுக்கு அறிவுறுத்துகின்றனர்.
கோடைக்கால பயண ஈர்ப்பு
துபாய் ஒரு கவர்ச்சிகரமான கோடைக்கால இடமாகத் தொடர்வதற்கு குறைந்த ஹோட்டல் கட்டணங்கள், பருவகால சலுகைகள் மற்றும் தள்ளுபடிகள், போட்டித்தன்மை வாய்ந்த விமானக் கட்டணங்கள், பருவம் முழுவதும் நடைபெறும் வணிக மற்றும் பொழுதுபோக்கு நிகழ்வுகள் ஆகியவையே காரணம் பின்வருமாறு எனத் தொழில் துறைப் பிரதிநிதிகள் சுட்டிக்காட்டுகின்றனர்.
ஆகவே, விரைவான விசா செயலாக்கம், மலிவு விலைக் கோடைக்காலப் பயணத் தொகுப்புகள் மற்றும் எளிமையான பயணத் திட்டமிடல் ஆகியவற்றின் ஒருங்கிணைப்பு, சர்வதேசப் பயணிகளுக்கு விருப்பமான இடமாக துபாயின் நிலையை மேலும் மேம்படுத்தும் என்று பயண முகவர்கள் நம்புகின்றனர்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
