சவூதி தலைநகர் ரியாத்தில் உள்ள கிங் காலித் சர்வதேச விமான நிலையம் மீது நடத்தப்பட்ட ஏவுகணைத் தாக்குதலில் உயிரிழப்பும் பலர் காயமடைந்ததையும் தொடர்ந்து, அக்டோபர் 10, சனிக்கிழமையன்று விமான நிலையம் தனது செயல்பாடுகளை இடைநிறுத்தியதாக ஊடக அறிக்கைகள் தெரிவிக்கின்றன. இந்த தாக்குதலினால் 12 பேர் உயிரிழந்ததாகவும் 309 பேர் காயமடைந்ததாகவும் அறிவிக்கப்பட்டுள்ளது.
சவுதி அரேபியாவில் ஏவுகணைத் தாக்குதலில் உயிரிழந்தவர்களில் 4 சவுதி குடிமக்கள், 2 வங்கதேசத்தினர் மற்றும் அமெரிக்கா, எகிப்து, ஜோர்டான், சிரியா, பாலஸ்தீனம், சூடான் ஆகிய நாடுகளைச் சேர்ந்த தலா ஒருவர் அடங்குவதாகத் தெரிவிக்கப்பட்டுள்ளது.
மேலும், காயமடைந்த 309 பேரும் பல்வேறு மருத்துவமனைகளில் சிகிச்சை பெற்று வருகின்றனர். அவர்களில் சிலரது நிலைமை கவலைக்கிடமாக இருப்பதாக சவுதி சிவில் விமானப் போக்குவரத்து பொது ஆணையம் (GACA) தெரிவித்துள்ளது.
அதே நேரத்தில், அதிகாரிகள் சேதங்களை மதிப்பிட்டு, விமான நிலைய வசதிகளின் பாதுகாப்பைச் சரிபார்த்து வருவதாகக் கூறப்படுகிறது. இந்நிலையில், சவூதி அரேபியாவின் பொது சிவில் விமானப் போக்குவரத்து ஆணையம் (GACA), விமான நிலையம் குறிவைக்கப்பட்டதை உறுதிசெய்ததுடன், சம்பந்தப்பட்ட அதிகாரிகளுடன் ஒருங்கிணைந்து செயல்பாடுகள் தற்காலிகமாக இடைநிறுத்தப்பட்டுள்ளதாகவும் அறிவித்துள்ளது. மேலும் தகவல்கள் கிடைக்கும்போது கூடுதல் அறிவிப்புகள் வெளியிடப்படும் என்றும் அந்த ஆணையம் தெரிவித்துள்ளது.
ஏ.எஃப்.பி (AFP) செய்தி நிறுவனத்தின்படி, ஈரான் ஆதரவு பெற்ற ஏமன் ஹூதி குழு சனிக்கிழமை மதியம் விமான நிலையத்தின் மீது ஏவுகணையால் தாக்குதல் நடத்தியதாக ஒரு தூதரக வட்டாரம் தெரிவித்துள்ளது. விமான நிலையத்தில் ஒரு பெரிய வெடிச்சத்தம் கேட்டதாக நேரில் பார்த்தவரும், இது குறித்து அறிந்தவர்களும் கூறியதாக செய்தி ஊடகங்கள் தெரிவித்துள்ளன.
சவுதி தலைநகரின் முக்கிய சர்வதேச விமான நிலையத்தில் நடந்ததாகக் கூறப்படும் தாக்குதலைத் தொடர்ந்து, பாதுகாப்பு குறித்த கவலைகள் அதிகரித்துள்ள நிலையில் இந்த அறிக்கைகள் வெளியாகியுள்ளன.
இத்தகைய நெருக்கடியான சூழலில், ரியாத் நகருக்கு அல்லது அங்கிருந்து விமானப் பயணம் மேற்கொள்ளத் திட்டமிட்டுள்ள பயணிகள், விமானச் சேவைகள் குறித்த சமீபத்திய தகவல்களை அறிய தங்கள் விமான நிறுவனங்களை நேரடியாகத் தொடர்புகொள்ளுமாறும், அதிகாரப்பூர்வ பாதுகாப்பு அறிவுறுத்தல்களைப் பின்பற்றுமாறும் அறிவுறுத்தப்படுகிறார்கள்.
விமான நிலையத்தில் நிகழ்ந்த சம்பவம் குறித்த கூடுதல் தகவல்கள் கிடைக்கும்போது அவை வழங்கப்படும் என்று சவுதி அதிகாரிகள் தெரிவித்துள்ளனர்.
இது போன்ற வளைகுடா நாடுகளின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
