அமீரகம் திரும்பி வர பயண தடை விதிக்கப்படும் ஏழு காரணங்கள் பற்றி தெரியுமா உங்களுக்கு..??

வெளிநாடுகளிலிருந்து வந்து அமீரகத்தில் பணிபுரிய கூடிய நம்மை போன்ற அமீரக குடியிருப்பாளர்களுக்கு, வெவ்வேறு காரணங்களுக்காக ஐக்கிய அரபு அமீரகத்தின் அதிகாரிகளால் பயணத்தடை விதிக்கப்படும். அவ்வாறு பயணத்தடையை எதிர்கொள்ளும் அமீரக குடியிருப்பாளர்களால் மீண்டும் அமீரகம் திரும்பி வந்து பணிபுரியவோ அல்லது தொழில் செய்யவோ முடியாது. மேலும் இந்த பயணத்தடையானது அதற்கான காரணத்தை பொறுத்து சில வருடங்களுக்கோ அல்லது ஆயுள் முழுவதுமோ விதிக்கப்படும்.

ஐக்கிய அரபு அமீரகத்தில் உள்ள நீதிமன்றங்கள் விதித்துள்ள சட்டக் காரணங்களால் அல்லது அமீரகத்தின் அடையாளம், குடியுரிமை, சுங்கம் மற்றும் துறைமுகங்கள் பாதுகாப்பு (ICP) போன்ற நிர்வாக அமைப்புகளால் தனிநபருக்கு வழங்கப்படும் இந்த பயணத்தடையானது, எந்தெந்த காரணங்களுக்காக வழங்கப்படுகிறது என்பது பற்றிய விரிவான தகவல்களை கீழே ஒவ்வொன்றாக காண்போம்.

1. விசா கால அவகாசம்

அமீரகத்தில் வசிக்கக்கூடிய ஒரு குடியிருப்பாளர் தனது விசா காலம் முடிந்தும் நாடு திரும்பாமல் நீண்ட நாள் தொடர்ந்து இங்கேயே தங்கியிருந்து, அதன் காரணமாக நாடுகடத்தப்படுவதை எதிர்கொண்டால், அவர் நாட்டை விட்டு வெளியேறிய பிறகு மீண்டும் அமீரகத்திற்கு திரும்பி வர அவருக்கு பயணத் தடை விதிக்கப்படும்.

2. தலைமறைவு வழக்கு

ஒரு நிறுவனத்தில் பணிபுரியும் ஊழியர் பணிபுரியத் தவறியதற்காக அவரின் முதலாளி அவருக்கு எதிராக ஒரு தலைமறைவு வழக்கைப் பதிவு செய்திருந்தால், அந்த ஊழியர் மீது பயணத் தடை விதிக்கப்படும்.

அதாவது ஐக்கிய அரபு அமீரக தொழிலாளர் சட்டத்தின்படி, ஒரு ஊழியர் தொடர்ந்து ஏழு வேலை நாட்களுக்கு வேலைக்குச் செல்லத் தவறினால், அவருக்கு எதிராக ஒரு தலைமறைவு வழக்கு அல்லது எதிர்பாராமல் வேலையை கைவிடுதல் அறிக்கையைப் பதிவு செய்ய முதலாளிக்கு உரிமை உண்டு. இந்த தடையை ஸ்பான்சரால் மட்டுமே நீக்க முடியும். அல்லது தலைமறைவு வழக்கு செல்லுபடியாகாது என்பதை மனித வளங்கள் மற்றும் எமிரேடிசேஷன் அமைச்சகத்திற்கு (MOHRE) நிரூபிக்க முடிந்தால், அமைச்சகம் அந்த ஊழியருக்கு எதிரான பயணத் தடையை நீக்கலாம்.

3. வங்கிக் கடனைத் திருப்பிச் செலுத்தாமல் இருப்பது

அமீரக வங்கியில் கடன் பெற்ற ஒருவர் வங்கிக் கடனைத் திருப்பிச் செலுத்தாதபோது அல்லது கிரெடிட் கார்டு நிலுவைத் தொகையைச் செலுத்தாமல் இருக்கும் போது அல்லது ​​போதிய பணம் இல்லாமல் காசோலை பவுன்ஸ் ஆகும் போது, அவர் பெற்ற கடனை முழுமையாக செலுத்த வங்கி கோரும் பட்சத்தில் பயணத் தடை விதிக்கப்படலாம். பவுன்ஸ் செய்யப்பட்ட காசோலைகள் இனி கிரிமினல் குற்றமாக இருக்காது என்றாலும், இந்த மீறலுக்காக சிவில் வழக்கு பதிவு செய்யப்படும்.

4. வீட்டு வாடகையை தாமதப்படுத்துவது

அமீரக குடியிருப்பாளர் ஒருவர் தான் வசிக்கும் வீட்டிற்கான வாடகைக் கட்டணத்தை செலுத்த தவறி, அதற்காக அவருக்கு வீட்டு உரிமையாளர் அளித்த நோட்டீஸிற்கு பதிலளிக்கவில்லை என்றால், அல்லது அவர் வசிக்கும் வீட்டை முறையாக பராமரிக்காததற்காக அல்லது ஒப்பந்தத்தைப் புதுப்பிக்கத் தவறியதற்காக வீட்டு உரிமையாளர் நோட்டீஸ் அனுப்பியிருந்தால், அவர் மீது வாடகை தகராறு மையம் (RDC) பயணத் தடையை விதித்து, வாடகையை செலுத்த அல்லது வாடகைதாரராக நீங்கள் நிறைவேற்ற வேண்டிய வேறு ஏதேனும் கடமைகளை நிறைவேற்றும்படி கட்டாயப்படுத்தும்.

5. கிரிமினல் வழக்கு

கிரிமினல் வழக்குகளில், போலீஸ் விசாரணை அல்லது நீதிமன்ற வழக்கு நடந்து கொண்டிருந்தால், அந்த நபர் மீது பயணத் தடை விதிக்கப்படலாம், அதாவது அவர் நாட்டை விட்டு வெளியேற முடியாமல் போகலாம். இதற்காக ஒரு குற்றவியல் புகார் பதிவு செய்யப்பட்ட பிறகு, புகார் அல்லது வழக்கு இறுதியாக தீர்க்கப்பட்டு, தீர்ப்பு செயல்படுத்தப்படும் வரை, அந்த நபர் பயணிப்பதைத் தடுக்க நிர்வாக அதிகாரியால் ஒரு சுற்றறிக்கை வெளியிடப்படலாம்.

மேலும், நாடு கடத்தப்படுவதற்கு வழிவகுக்கும் போதைப்பொருள் பயன்பாடு அல்லது தாக்குதல் சம்பவங்கள் போன்ற கடுமையான குற்றவியல் வழக்கில் ஒருவர் தண்டனை பெற்றால், நாடுகடத்தப்பட்ட பிறகு அவர் மீண்டும் அமீரகத்திற்குள் நுழைவதைத் தடுக்கும் வகையில் அவர் மீது பயணத் தடை விதிக்கப்படலாம்.

6. சிவில் அல்லது வணிக வழக்கு

சில சிவில் வழக்குகளில் குறிப்பாக ஒரு நிறுவனத்தால் நிலுவைத் தொகையைச் செலுத்தாதது தொடர்பான வணிக வழக்குகள் அல்லது குடும்ப நீதிமன்றங்களில் குழந்தையை பாதுகாப்பது தொடர்பாக தகராறு இருக்கும் போது, அதாவது ஒரு குழந்தையின் பெற்றோரில் ஒருவர் (உதாரணமாக தந்தை) சிறைக்காவலில் இருக்கும்போது மற்றொரு நபர் (உதாரணமாக தாய்) குழந்தையுடன் நாட்டை விட்டு வெளியேறலாம் என்ற கவலை இருந்தால் அவர்கள் குழந்தையை விமான நிலையத்தை விட்டு வெளியேறுவதைத் தடுக்கும் பயணத் தடையைப் பெறலாம்.

7. வேறு ஒருவருக்கு உத்தரவாதம் அளித்த வழக்கு

ஒரு குடும்ப உறுப்பினர் அல்லது உறவினருக்கு எதிராக காவல்துறை அல்லது நீதிமன்ற வழக்கு நிலுவையில் இருக்கும்போது, அந்த நபருக்கு ஒருவர் உத்தரவாதமாக நிற்கும் நேரத்தில் அவர்களால் பயணம் செய்ய முடியாது. பெரும்பாலான சந்தர்ப்பங்களில் உத்தரவாதம் அளித்தவரின் பாஸ்ப்போர்ட்டை காவல்துறை அல்லது நீதிமன்றம் வைத்திருக்கலாம்.