துபாயில் வசிக்கும் 32 வயதான இந்தியர் ஒருவர், கடந்த செவ்வாய்க்கிழமையன்று ராஸ் அல் கைமாவில் உள்ள ஜெபல் ஜெய்ஸ் மலையிலிருந்து விழுந்து உயிரிழந்ததாக சமூக ஆர்வலர்கள் தெரிவித்துள்ளனர். தென்னிந்திய மாநிலமான கேரளாவைப் பூர்விமாகக் கொண்ட அந்த நபர், அமீரகத்தின் தேசிய தின விடுமுறையின் போது, மூன்று நண்பர்களுடன் பிரபலமான இடத்தில் முகாமிட்டிருந்தபோது இந்த விபத்து ஏற்பட்டதாகச் செய்திகள் வெளியிடப்பட்டுள்ளது.
இச்சம்பவம் குறித்து செய்தி ஊடகங்களிடம் பேசிய அவரது ரூம் நண்பர், “அவருடன் சென்ற எங்கள் நண்பர்கள் திடீரென்று அவர் காணாமல் போனதாகவும், அவரைக் காணாததால் உடனடியாக காவல்துறை அதிகாரிகளிடம் தெரிவித்தனர்” என்றும் கூறியுள்ளார். கடந்த திங்கட்கிழமை இரவு மலையை அடைந்த அவர் தனது நண்பர்களுடன் அங்கு தங்கியதாக மலையாளி கவுன்சிலின் பிரதிநிதி ஒருவரும் கூறியுள்ளார்.
அவர் மேலும் கூறுகையில், “ஜெபல் ஜெய்ஸ் போன்ற மலைப்பகுதிகளில் பார்வையாளர்கள் எச்சரிக்கையாக இருக்க வேண்டும், குறிப்பாக மலைக்குன்றின் விளிம்புகளுக்கு அருகில் புகைப்படம் எடுப்பது போன்ற ஆபத்தான செயல்களில் ஈடுபடும் போது மிக கவனமாக இருக்க வேண்டும்” என்று அறிவுறுத்தியுள்ளார்.
இந்த விபத்து குறித்து வெளியான செய்திகளின் படி, இச்சம்பவம் நடந்தவுடன் அவரது நண்பர்கள் உடனடியாக காவல்துறைக்கு தகவல் கொடுத்துள்ளனர். உடனடியாக வந்த காவல் அதிகாரிகள் அவரை கண்டறிந்து அவரின் மரணத்தை உறுதி செய்துள்ளனர். பின்னர், இறந்தவரின் உடல் ராஸ் அல் கைமாவில் உள்ள சக்ர் மருத்துவமனைக்கு மாற்றப்பட்டுள்ளது.
இதையடுத்து, இறந்தவரின் உடலை இந்தியாவிற்கு கொண்டு செல்வதற்கான அனைத்து நடைமுறைகளையும் முடித்த பிறகு, அவரது உடல் புதன்கிழமை விமானம் மூலம் கேரளாவில் உள்ள கண்ணூர் விமான நிலையம் கொண்டு செல்லப்பட்டு அவரது வீட்டிற்கு எடுத்துச் செல்லப்பட்டதாக இறந்தவரின் மற்றொரு நண்பர் ஒருவர் தெரிவித்துள்ளார்.
இந்நிலையில் ஜெபல் ஜெய்ஸ் மலைக்கு சென்ற அவர்கள் அனைவரும் ஒரே நிறுவனத்தில் வேலை செய்து வந்ததும், உயிரிழந்தவர் மெக்கானிக்கல் சூப்பர்வைசராக வேலை செய்து வந்ததும் தெரியவந்துள்ளது. மேலும் இவர்கள் அனைவரும் அல் குசைஸ் பகுதியில் உள்ள ஒரு அடுக்குமாடி குடியிருப்பில் ஒன்றாக வசித்து வந்துள்ளனர் என்பதும் குறிப்பிடத்தக்கது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
