துபாய்க்கும் அபுதாபிக்கும் இடையே பயணிக்கும் வாகன ஓட்டிகள், E11 நெடுஞ்சாலையில் புதிதாக நிறுவப்பட்ட டார்ப் சுங்கச்சாவடி கட்டமைப்புகளைக் கவனித்துள்ளனர். இது எமிரேட்டின் ஸ்மார்ட் சுங்கச்சாவடி அமைப்பின் விரிவாக்கம் குறித்த கேள்விகளை குடியிருப்பாளர்கள் மத்தியில் எழுப்பியுள்ளது.
கன்தூத் (Ghantoot) அருகே இரண்டு புதிய கட்டமைப்புகள் காணப்பட்டுள்ளன, ஒன்று எல்லையைத் தாண்டியவுடன் அபுதாபியை நோக்கியும், மற்றொன்று வெளியேறும் வழியான எக்ஸிட் 403-க்கு முன்பு துபாயை நோக்கியும் செல்கிறது. மற்றொரு தொகுதி அல் குர்ம் (Al Qurm) பகுதியில் தோன்றியுள்ளது, அங்கு இரு திசைகளிலும் வாயில்கள் நிறுவப்பட்டுள்ளதைக் கண்டதாக வாகன ஓட்டிகள் தெரிவித்துள்ளனர். இந்தக் கட்டமைப்புகள் “டார்ப் கன்தூத் டோல்” மற்றும் “டார்ப் அல் குர்ம் டோல்” எனப் பெயரிடப்பட்டுள்ளன, இருப்பினும் அவை இன்னும் செயல்பாட்டுக்கு வரவில்லை என்பது குறிப்பிடத்தக்கது.
பாலங்களில் அமைந்துள்ள தற்போதைய சுங்கச்சாவடிகளைப் போலல்லாமல், இந்த புதிய வாயில்கள் நேரடியாக நெடுஞ்சாலையில் அமைந்துள்ளன. இது, நகரத்திற்குள் நுழையும் நுழைவுப் புள்ளிகளுக்கு அப்பால் ஒரு சாத்தியமான மாற்றம் அல்லது விரிவாக்கத்தைக் குறிப்பதாக ஊடக அறிக்கைகள் கூறுகின்றன.
புதிய வாயில்களின் நிறுவல் மற்றும் செயல்படுத்தல் குறித்த மேலதிக விபரங்களுக்காக க்யூ மொபிலிட்டி நிறுவனத்திடம் ஊடகங்கள் கேள்வியெழுப்பிய போது, “எதிர்கால நிறுவல் அல்லது விரிவாக்கத் திட்டங்கள் தொடர்பான கூடுதல் விவரங்களை எங்களால் பகிர இயலவில்லை, எந்தவொரு புதிய தகவல்களும் அதிகாரப்பூர்வ வழிகள் மூலம் பகிரப்படும்” என்று பதிலளித்துள்ளது. மேலும், புதிய சுங்கச் சாவடிகள் அனைத்து வாகனங்களுக்கும் பொருந்துமா அல்லது கனரகப் போக்குவரத்து போன்ற குறிப்பிட்ட வகைகளுக்கு மட்டுமா என்பதும் இன்னும் தெளிவாகத் தெரியவில்லை என்றும் செய்தி ஊடகங்கள் தெரிவிக்கின்றன.
நெரிசலைக் கட்டுப்படுத்தவும், போக்குவரத்து ஓட்டத்தை மேம்படுத்தவும் 2021-ல் டார்ப் சுங்கக் கட்டண முறை அறிமுகப்படுத்தப்பட்டது. இது தற்போது தானியங்கி வாகனப் பதிவு எண் அங்கீகாரத் தொழில்நுட்பத்தைப் பயன்படுத்தி, அபுதாபி ஐலேண்டுக்குச் செல்லும் முக்கியப் பாலங்களில் செயல்படுகிறது.
தற்போதுள்ள முறையின் கீழ், வார நாட்களில் (திங்கள் முதல் சனி வரை) காலை 7 மணி முதல் 9 மணி வரையிலும், பிற்பகல் 3 மணி முதல் 7 மணி வரையிலும் உச்ச நேரங்களில் வாகன ஓட்டிகளிடம் 4 திர்ஹம் கட்டணம் வசூலிக்கப்படுகிறது. இந்த நேரங்களைத் தவிர, ஞாயிற்றுக்கிழமைகள் மற்றும் பொது விடுமுறை நாட்களிலும் பயணம் இலவசமாகவே உள்ளது.
புதிய சுங்கக் சாவடிகளின் நோக்கம் இன்னும் உறுதிப்படுத்தப்படாத நிலையில், முக்கிய நெடுஞ்சாலைகளில் சுங்கக் கட்டண வரம்பு விரிவுபடுத்தப்படுமா என்பது குறித்த அதிகாரப்பூர்வ அறிவிப்புகளை எதிர்நோக்கி பயணிகள் உன்னிப்பாகக் கவனித்து வருகின்றனர்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
