துபாயின் சாலைகள் மற்றும் போக்குவரத்து ஆணையத்தால் (RTA), இயக்கப்படும் பஸ்-ஆன்-டிமாண்ட் (bus-on-demand) சேவை நெட்வொர்க்கானது தற்பொழுது மேலும் 4 புதிய இடங்களுக்கு விரிவுபடுத்தப்பட்டுள்ளதாக தெரிவிக்கப்பட்டுள்ளது. அதன்படி தற்பொழுது, அல் குசைஸ், ஜுமைரா வில்லேஜ் சர்க்கிள், அல் வர்கா மற்றும் துபாய் இன்வெஸ்ட்மென்ட்ஸ் பார்க் (DIP) ஆகிய நான்கு கூடுதல் குடியிருப்புப் பகுதிகளுக்கு இந்த சேவை விரிவுபடுத்தப்பட்டுள்ளது என கூறப்பட்டுள்ளது.
கடந்த 2025-ஆம் ஆண்டில் பயணிகளின் எண்ணிக்கை 136 சதவீதம் என கூர்மையாக அதிகரித்ததைத் தொடர்ந்து இந்த விரிவாக்கம் செய்யப்பட்டுள்ளது. இதற்கு முந்தைய ஆண்டில் 417,315 ஆக இருந்த பயணிகளின் எண்ணிக்கை, 2025-ல் 984,929 ஆக உயர்ந்து, 567,000-க்கும் மேற்பட்ட பயணங்கள் அதிகரித்துள்ள நிலையில் இந்த விரிவாக்கம் செய்யப்பட்டுள்ளது என RTA தெரிவித்துள்ளது.
இதன் மூலம் நகரம் முழுவதும் நெகிழ்வான, செயலி அடிப்படையிலான போக்குவரத்து விருப்பங்களை மக்கள் அதிகளவில் சார்ந்திருப்பதை இந்தப் புள்ளிவிவரங்கள் எடுத்துக்காட்டுகின்றன என கூறப்பட்டுள்ளது.
மேலும் இந்த சமீபத்திய விரிவாக்கத்துடன், பஸ்-ஆன்-டிமாண்ட் சேவையானது தற்போது 49 மினிபேருந்துகளைக் கொண்டு துபாயில் 17 பகுதிகளில் இயங்குகிறது. இது குடியிருப்புப் பகுதிகளை மெட்ரோ நிலையங்கள், பேருந்து நிறுத்தங்கள் மற்றும் முக்கிய வணிக மையங்களுடன் இணைப்பதன் மூலம், முதல் மற்றும் கடைசி மைல் இணைப்பை மேம்படுத்துவதற்காக இது வடிவமைக்கப்பட்டுள்ளது.
முன்னதாக இந்த சேவையானது அல் பர்ஷா, துபாய் சிலிக்கான் ஓயாசிஸ், பிசினஸ் பே, டவுன்டவுன் துபாய், DIFC, அல் நஹ்தா, அல் கராமா, ஓத் மெத்தா மற்றும் பிற பகுதிகளுக்கு வழங்கப்பட்டிருந்தது குறிப்பிடத்தக்கது.
மேலும் இந்தச் சேவை, துபாய் பஸ்-ஆன்-டிமாண்ட் செயலி மூலம் செயல்படுகிறது. இது, பயணிகள் தங்களுக்கு ஏற்றவாறு ஒதுக்கப்படும் ஏறும் மற்றும் இறங்கும் இடங்களுக்கு இடையே பகிரப்பட்ட பயணங்களை முன்பதிவு செய்ய அனுமதிக்கிறது.
பாரம்பரிய பேருந்து வழித்தடங்களைப் போலல்லாமல், இது நிலையான நிறுத்தங்கள் இல்லாமல் இயங்குகிறது, அதாவது பயணிகளின் தேவைக்கு ஏற்ப நிகழ்நேரத்தில் தன்னை மாற்றியமைத்துக் கொள்கிறது. இதனால் பயணிகளுக்கு காத்திருப்பு நேரங்களைக் குறைத்து, செயல்திறனை மேம்படுத்துகிறது.
அதே நேரத்தில் துபாயின் ஸ்மார்ட் மற்றும் நிலையான போக்குவரத்துக்கான பரந்த முன்னெடுப்புடன் இந்த விரிவாக்கம் ஒத்துப்போகிறது என்றும், மெட்ரோ மற்றும் பேருந்து அமைப்புகள் உட்பட எமிரேட்டின் பரந்த பொதுப் போக்குவரத்து வலையமைப்புடன் மேலும் நெருக்கமாக ஒருங்கிணைந்து, தனியார் வாகனங்களைச் சார்ந்திருப்பதைக் குறைப்பதை இது நோக்கமாகக் கொண்டுள்ளது என்றும் RTA கூறியுள்ளது.
இதில் ஒரு பயணத்திற்கான கட்டணம் 5 திர்ஹம்ஸ் ஆகவும், கூடுதல் பயணிகளுக்கு 4 திர்ஹம்ஸ் ஆகவும் நிர்ணயிக்கப்பட்டுள்ளது. இது நகரத்தில் உள்ள மிகவும் மலிவு விலையிலான ஆன்-டிமாண்ட் போக்குவரத்து விருப்பங்களில் ஒன்றாக அமைகிறது.
தேவை தொடர்ந்து அதிகரித்து வருவதால், சேவைத் தரத்தையும் நீண்டகால நிலைத்தன்மையையும் சமநிலைப்படுத்தும் வகையில், செயல்பாட்டு மாதிரியில் திருத்தங்கள் மேற்கொள்வதோடு, அடுத்த கட்டத்தில் மேலும் விரிவாக்கம் செய்யவும் திட்டமிடப்பட்டுள்ளது என தெரிவிக்கப்பட்டுள்ளது.
