அபுதாபியில் உள்ள ஒரு உணவகம் உணவு பாதுகாப்பு விதிகளை கடைபிடிக்காமல் இருந்ததற்காக அதிகாரிகளால் மூடப்பட்டுள்ளது. அல் அய்னில் உள்ள ஹாலோமீட் என்ற உணவகத்தை நிர்வாக ரீதியாக மூடுவதற்கான முடிவை அபுதாபி விவசாயம் மற்றும் உணவு பாதுகாப்பு ஆணையம் (ADAFSA) வெளியிட்டுள்ளது.
ஆணையம் வெளியிட்ட தகவல்களின் படி, அபுதாபி எமிரேட்டில் உணவு தொடர்பான 2008 ஆம் ஆண்டின் சட்ட எண் (2) மற்றும் அதனுடன் இணைந்த சட்டத்தை மீறியதால் உணவகம் மூடப்பட்டுள்ளது.
அவ்வப்போது, அபுதாபியில் உள்ள அனைத்து உணவு நிறுவனங்களும் உணவுப் பாதுகாப்புத் தேவைகளுக்கு இணங்குவதை உறுதி செய்வதற்காக அதிகாரத்தின் ஆய்வாளர்களால் ஆய்வு நடவடிக்கைகள் மேற்கொள்ளப்படுகின்ற நிலையில், அல் அய்னில் நடத்தப்பட்ட ஆய்வின் போது, CN-2756683 என்ற வர்த்தக லைசன்ஸ் கொண்ட உணவகம் வாடிக்கையாளர்களின் சுகாதாரத்திற்கு பெரும் அச்சுறுத்தலாக இருப்பது கண்டுபிடிக்கப்பட்டுள்ளது.
ஏற்கனவே, ADAFSA, உணவகங்களில் இது போன்ற ஏதேனும் விதிமீறல்கள் அல்லது உணவுப் பொருட்களின் உள்ளடக்கம் குறித்து சந்தேகம் இருந்தால், அபுதாபி அரசாங்கத்தின் கட்டணமில்லா எண்ணான 800555 க்கு புகார் தெரிவிக்குமாறு குடியிருப்பாளர்களை வலியுறுத்தியுள்ளது, மேலும், விதிமீறல் உறுதி செய்யப்பட்டால் உணவகத்தின் மீது சட்ட நடவடிக்கை எடுக்கப்படும் என்று தெரிவிக்கப்பட்டுள்ளது.
