ஐக்கிய அரபு அமீரகத்தின் சுகாதாரம் மற்றும் தடுப்பு அமைச்சகம் (Mohap) கடந்த சனிக்கிழமை அன்று, சட்டப்பூர்வ கருக்கலைப்பு செய்வதற்கான நடைமுறைகள் மற்றும் கட்டுப்பாடுகள் குறித்த புதிய அறிவிப்பை வெளியிட்டுள்ளது. நாட்டில் கர்ப்பிணிப் பெண்ணின் உயிரைப் பாதுகாத்தல், அவரது பாதுகாப்பை உறுதி செய்தல் மற்றும் நாட்டில் சுகாதார மையங்களின் மேற்பார்வையை மேம்படுத்துதல் போன்றவற்றை நோக்கமாகக் கொண்டு கருக்கலைப்பு விதிமுறைகள் அறிவிக்கப்பட்டுள்ளதாகக் கூறப்படுகிறது.
அமீரகத்தில் கருக்கலைப்பானது தெளிவான நிபந்தனைகள் மற்றும் கட்டுப்பாடுகளின் கீழ் அனுமதிக்கப்படுகிறது. அந்த வகையில், கருக்கலைப்பு கோரிக்கைகளை முழுமையாக ஆய்வு செய்ய ஒவ்வொரு சுகாதார ஆணையத்திலும் ஒரு குழு அமைக்கப்படும் என்று அமைச்சகம் கூறியுள்ளது.
புதிய விதிமுறைகளின் படி, கருக்கலைப்புக்கான அனைத்து நிகழ்வுகளும் உரிமம் பெற்ற மருத்துவரால் அங்கீகரிக்கப்பட்ட மையத்தில் செய்யப்பட வேண்டும் என்றும் மேலும், இந்த செயல்முறை கர்ப்பிணிப் பெண்ணின் உயிருக்கு அச்சுறுத்தலாக இருக்கும் எந்தவொரு மருத்துவ சிக்கல்களையும் ஏற்படுத்தக்கூடாது என்றும் கூறப்பட்டுள்ளது. குறிப்பாக, கருக்கலைப்பு நேரத்தில் கர்ப்பத்தின் காலம் 120 நாட்களுக்கு மிகாமல் இருக்க வேண்டும் என்று அமைச்சகம் ஒரு அறிக்கையில் தெரிவித்துள்ளது.
கருக்கலைப்புக்கான ஒழுங்குமுறைக் குழு:
அமீரகத்தில் ஒரு பிரத்யேக குழு கருக்கலைப்புக்கான கோரிக்கைகளை ஆராய்ந்து முடிவெடுக்கும் என்றும், இந்த குழு Mohap அல்லது எமிரேட் சுகாதார ஆணையத்தின் தலைவரால் அமைக்கப்படும் என்றும் தெரிவிக்கப்பட்டுள்ளது. மேலும், இந்த பிரத்யேகக் குழுவில் மகப்பேறு மற்றும் மகளிர் மருத்துவ நிபுணர், மனநல நிபுணர் மற்றும் பொது வழக்கறிஞரின் பிரதிநிதி இருக்க வேண்டும் என்று கூறப்பட்டுள்ளது. கூடுதலாக தேவைப்படும் பட்சத்தில், பொருத்தமான சிறப்பு மற்றும் நிபுணத்துவம் கொண்ட மூன்றாம் தரப்பினரைக் கலந்தாலோசிக்கவும் குழு அனுமதிக்கப்படுகிறது.
கருக்கலைப்பு எப்போது அனுமதிக்கப்படுகிறது?
தொடர்ந்து கர்ப்பத்தை சுமப்பது கர்ப்பிணிப் பெண்ணின் உயிருக்கு ஆபத்தை விளைவிக்கும் என்றால் கருக்கலைப்பு நடைமுறை அனுமதிக்கப்படுகிறது என்று அமைச்சகம் தெளிவாகக் கூறியுள்ளது. அதாவது, கர்ப்பிணிப் பெண்ணின் உயிரைக் காப்பாற்ற மாற்று வழி இல்லாத நிலையில் இருந்தாலும் அல்லது கருவின் சிதைவு கடுமையாக இருந்தால், அதாவது புதிதாகப் பிறந்த குழந்தையின் ஆரோக்கியத்தையும் வாழ்க்கையையும் பாதிக்கும் என்பதை நிரூபிக்கப்பட்ட பின்னர் கருக்கலைப்பு அனுமதிக்கப்படும் என தெரிவிக்கப்பட்டுள்ளது.
இருப்பினும் சிறப்பு மருத்துவக் குழுவால் வழங்கப்பட்ட மருத்துவ அறிக்கையால் இது ஆதரிக்கப்பட வேண்டும் எனவும் கூறப்பட்டுள்ளது. கருக்கலைப்பு செயல்முறையின் போது கர்ப்ப காலம் 120 நாட்களுக்கு மேல் இல்லை எனில், அனுமதிக்கப்பட்ட கருக்கலைப்புக்கான பிற வழக்குகள் அனுமதிக்கப்படுகின்றன.
கருக்கலைப்பு எங்கே செய்யலாம்?
அமீரகத்தில் கருக்கலைப்பு செய்ய அதிகாரத்தால் உரிமம் பெற்ற ஒரு சுகாதார மையத்தில் மட்டுமே செயல்முறை செய்யப்பட வேண்டும். நாட்டில் பயிற்சி செய்ய உரிமம் பெற்ற ஒரு சிறப்பு மகப்பேறியல்-மகளிர் மருத்துவ நிபுணரால் இது மேற்கொள்ளப்பட வேண்டும். மேலும் கருக்கலைப்பு என்பது கர்ப்பிணிப் பெண்ணின் உயிருக்கு அதிக ஆபத்தை ஏற்படுத்தக்கூடிய மருத்துவ சிக்கல்கள் இல்லாமல் இருக்க வேண்டும் என்பது குறிப்பிடத்தக்கது.
சுகாதார மையங்களின் பொறுப்புகள்:
அமீரகத்தில் உள்ள சுகாதார மையங்கள் கர்ப்பிணிப் பெண்ணின் உரிமைகள் மற்றும் பொறுப்புகளை விவரிக்க வேண்டும் மற்றும் செயல்முறைக்கு முன்னும் பின்னும் அவர்களுக்குத் தேவையான சுகாதாரத் தேவைகளை பற்றியும் விளக்கமாக எடுத்துக் கூற வேண்டும் என கூறப்பட்டுள்ளது.
அதேசமயம், கருக்கலைப்பு செய்யும் கர்ப்பிணிப் பெண்ணின் தனிப்பட்ட தரவுகளின் தனியுரிமை மற்றும் ரகசியத்தன்மையைப் பேணுவதற்கும் சுகாதார வசதிகள் கடமைப்பட்டுள்ளன. கூடுதலாக, கருக்கலைப்பு செய்ய உரிமம் பெற்ற சுகாதார மையங்களின் செயல்பாடுகளை கண்காணித்து மேற்பார்வை செய்வது மற்றும் அவற்றின் இணக்கத்தை மதிப்பிடுவது சுகாதார அதிகாரியின் பொறுப்பாகும்.
இந்த ஆண்டின் தொடக்கத்தில், கருக்கலைப்பு தொடர்பாக அமீரக சட்டம் திருத்தப்பட்டது, ஒப்புதல் விதிகளை எளிதாக்கியது. அதன்படி ஒருவேளை தாயின் உயிருக்கு ஆபத்தான நிலையில் இருந்தால், மருத்துவ நிபுணர்கள் செயல்முறையை உடனடியாக மேற்கொள்ள வேண்டும் என்பதற்காக திருத்தப்பட்ட சட்டம் செயல்முறையை எளிதாக்கியுள்ளது. உடனடி அறுவை சிகிச்சை தலையீடு தேவைப்படும் அவசர சந்தர்ப்பங்களில் ஒப்புதல் ஒரு நிபந்தனையாக இருக்கக்கூடாது என்று திருத்தப்பட்ட சட்டத்தில் மாற்றம் செய்யப்பட்டுள்ளது என தெரிவிக்கப்பட்டுள்ளது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
