உலகின் பல முன்னணி நகரங்களும் போக்குவரத்து நெரிசலுக்கான தீர்வுகளை ஆராய்ந்து வருகின்ற நிலையில், துபாய் பறக்கும் டாக்ஸி சேவையைத் தொடங்குவதற்கான திட்டத்தில் தீவிரமாக வேலை செய்து வருகிறது.
இந்நிலையில், ஏர் டாக்ஸி திட்டத்தின் முதல் நிலையம் துபாயில் விரைவில் அறிவிக்கப்படும் என்று துபாயின் சாலைகள் மற்றும் போக்குவரத்து ஆணையம் (RTA) செவ்வாயன்று தெரிவித்துள்ளது. இந்த திட்டத்தின் முதல் கட்டத்தில் நான்கு நிலையங்களின் தொடக்கமும் அடங்கும் என்று குறிப்பிடப்பட்டுள்ளது.
அதன் படி, 2026ஆம் ஆண்டின் முதல் காலாண்டில் முதல் ஏர் டாக்ஸி சேவை அதிகாரப்பூர்வமாக செயல்படத் தொடங்கும் என்று எதிர்பார்க்கப்படுவதாகவும் ஆணையம் கூறியுள்ளது.
இது குறித்து RTA இல் உள்ள பொது போக்குவரத்து ஏஜென்சியின் போக்குவரத்து அமைப்புகள் துறையின் இயக்குனர் காலித் அல் அவதி செப்டம்பர் 16 முதல் 20 வரை துபாய் உலக வர்த்தக மையத்தில் நடைபெறும் நுண்ணறிவு போக்குவரத்து அமைப்புகள் மாநாடு மற்றும் கண்காட்சியின் (Intelligent Transport Systems Conference and Exhibition) ஒரு பகுதியாக பேசிய போது, இந்த திட்டம் தன்னாட்சி விமான போக்குவரத்து துறையில் ஒரு லட்சிய படியாக கருதப்படுவதாகவும், ஏர் டாக்ஸி நகரின் பல்வேறு பகுதிகளுக்கு சேவை செய்யும் என்று எதிர்பார்க்கப்படுவதால், ஹோட்டல்கள் மற்றும் விமான நிலையத்திற்கு இடையே சேவையை இணைப்பதில் கவனம் செலுத்துவதால், நவீன மற்றும் பயனுள்ள போக்குவரத்து வழிமுறைகளை வழங்குவதை நோக்கமாகக் கொண்டுள்ளதாகவும் குறிப்பிட்டுள்ளார்.
RTA வெளியிட்டுள்ள அறிவிப்பின் படி, முதல் கட்டமாக DXB, டவுன்டவுன், துபாய் மெரினா மற்றும் பாம் ஜுமேரா ஆகிய நான்கு இடங்களில் தரையிறங்கும் தளங்க உருவாக்கப்படும் என்பது தெரிய வந்துள்ளது. Skyports உடன் இணைந்து வடிவமைக்கப்பட்டு உருவாக்கப்படும் இந்த நிலையங்கள் பிரத்யேகமான புறப்படும் மற்றும் தரையிறங்கும் பகுதிகள், மின்சார சார்ஜிங் வசதிகள், பிரத்யேக பயணிகள் பகுதி மற்றும் பாதுகாப்பு நடைமுறைகளை உள்ளடக்கியதாக இருக்கும் என்றும் தெரிவிக்கப்பட்டுள்ளது.
ஏர் டாக்ஸி என்பது நான்கு பயணிகள் வரை ஏற்றிச் செல்லக் கூடிய ஆளில்லா பறக்கும் விமானம் ஆகும். இது மணிக்கு 320 கிமீ வேகம் மற்றும் 160 கிமீ தூரம் வரை செல்லும் திறன் கொண்டது.
அதிக இரைச்சலை உண்டாக்கும் ஹெலிகாப்டர்களுடன் ஒப்பிடும்போது இது சீராகவும் அமைதியாகவும் இயங்குகிறது, ஏனெனில் இது 45 டெசிபல்களுக்கு மிகாமல் ஒலியை வெளியிடுகிறது, இது மழையின் ஒலியை விட குறைவாகும். குறிப்பாக, துபாய் சர்வதேச விமான நிலையத்திலிருந்து பாம் ஜுமேரா வரையிலான பயண நேரத்தை 10-12 நிமிடங்களாகக் குறைக்கும் என எதிர்பார்க்கப்படுவதால், புதிய சேவையானது துபாயில் போக்குவரத்து நெரிசலைக் குறைக்க உதவும் என்று Joby Aviation நிறுவனத்தின் ஜெனெரல் மேனேஜர்டைலர் சுட்டிக்காட்டியுள்ளார்.
மேலும், துபாயில் ஸ்மார்ட் மொபிலிட்டி முன்முயற்சிகளை ஆதரிப்பதில் இந்த முயற்சியின் முக்கியத்துவத்தை வலியுறுத்திய அவர், நகரத்தில் நிலையான காற்று இயக்கத்தை மேம்படுத்துவதற்கான நிறுவனத்தின் பார்வையை அடைய RTA மற்றும் SkyPorts உடன் ஒத்துழைக்க தனது உற்சாகத்தை வெளிப்படுத்தியுள்ளார்.
முழுக்க முழுக்க மின்சாரத்தால் இயக்கப்படும் இந்த பறக்கும் டாக்ஸி, தீங்கு விளைவிக்கக்கூடிய வாயுக்களின் உமிழ்வை உருவாக்காததால் சுற்றுச்சூழலுக்கு ஏற்றதாக அமைகிறது. உலகளவில் இந்தத் துறையில் சமீபத்திய நவீன தொழில்நுட்பங்கள் அதன் உற்பத்தியில் பயன்படுத்தப்பட்டுள்ளதாகக் கூறப்படுகிறது.
துபாயில் நடந்த உலக அரசாங்க உச்சி மாநாட்டின் போது, ஆறு ஆண்டுகளுக்கு நகரத்தில் விமான டாக்சிகளை இயக்குவதற்கான பிரத்யேக உரிமையை ஜோபி ஏவியேஷன் நிறுவனத்திற்கு வழங்கும் ஒப்பந்தம் கையெழுத்தானது. இந்த திட்டம் போக்குவரத்தில் நவீன தொழில்நுட்பத்தின் பயன்பாடுகளில் முன்னணி நகரமாக துபாயின் நிலையை மேம்படுத்துகிறது, மேலும் நிலையான கண்டுபிடிப்புக்கான அதன் உறுதிப்பாட்டை பிரதிபலிக்கிறது.
ஏர் டாக்ஸிகள் வழக்கமான போக்குவரத்து வழிகளில் நெரிசலைக் குறைக்க உதவுவது மட்டுமில்லாமல், கார்பன் உமிழ்வைக் குறைக்க உதவுகின்றன மற்றும் நகரத்தில் சுற்றுச்சூழல் முயற்சிகளை அதிகரிக்க உதவுகின்றன. அதேசமயம், நகரத்தின் முக்கிய புள்ளிகளுக்கு இடையே செல்வதற்கும், போக்குவரத்து அனுபவத்தை மேம்படுத்துவதற்கும், நேரத்தைக் குறைப்பதற்கும் ஏர் டாக்ஸிகள் வசதியான மற்றும் விரைவான மாற்றீட்டை வழங்குகின்றன.
இவ்வாறு புதுமையான மற்றும் தனித்துவமான போக்குவரத்து அனுபவத்தை வழங்குவதன் மூலம் பார்வையாளர்களையும் சுற்றுலாப் பயணிகளையும் ஈர்க்கும் என்று எதிர்பார்க்கப்படுகிறது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
