UAE: இன்று முதல் பிரம்மாண்டமாக துவங்கும் “ஷேக் சையத் ஃபெஸ்டிவல்”..!! வானவேடிக்கைகள், கச்சேரிகள் என களைகட்டும் நிகழ்வுகளுடன் இந்த சீசனுக்கான சிறப்பம்சங்கள் என்னென்ன…??

அபுதாபியில் ஒவ்வொரு வருடமும் கோலாகலமாக நடத்தப்படும் பிரபலமான ஷேக் சையத் ஃபெஸ்டிவலின் இந்தாண்டு பதிப்பானது, பிரம்மாண்ட வானவேடிக்கைகள், சிறப்பு விழாக்கள் மற்றும் கச்சேரிகள் என சுமார் 6,000 க்கும் மேற்பட்ட சர்வதேச கலாச்சார நிகழ்வுகளுடன் இன்று (நவம்பர் 1) வெகு விமரிசையாக தொடங்குகிறது.

மேலும், இந்தாண்டு 30,000 க்கும் மேற்பட்ட கண்காட்சியாளர்கள் மற்றும் 27 க்கும் மேற்பட்ட நாடுகள் பங்கேற்க உள்ளதால் இந்த பதிப்பு முற்றிலும் மாறுபட்ட அனுபவத்தை வழங்கும் என்று நிகழ்ச்சி ஏற்பாட்டாளர்கள் தெரிவித்துள்ளனர்.

ஷேக் சையத் ஃபெஸ்டிவல் 2024-2025 பதிப்பின் சிறப்பு தேதிகள்:

நவம்பர் 1, 2024 முதல் பிப்ரவரி 29, 2025 வரை

சுமார் நான்கு மாதங்களுக்கு நடைபெறும் ‘Hayakum’ (வரவேற்பு என்பதன் அரபு வார்த்தை) என்ற கருப்பொருளின் கீழ் நடத்தப்படும் ஷேக் சையத் ஃபெஸ்டிவலின் 2024-2025 பதிப்பு இம்முறை புதிய வடிவமைப்பு மற்றும் புதிய நிகழ்வுகள் மற்றும் செயல்பாடுகளுடன் முதல் முறையாக வாராந்திர விழாக்கள் நடத்தப்பட உள்ளதாக தெரிவிக்கப்பட்டுள்ளது.

ஷேக் சையத் ஃபெஸ்டிவல்

ஐக்கிய அரபு அமீரகத்தின் ஸ்தாபக தந்தை மறைந்த ஷேக் சையத் பின் சுல்தான் அல் நஹ்யான் அவர்களின் நினைவாக பெயரிடப்பட்ட ஷேக் சையத் ஃபெஸ்டிவல் பார்வையாளர்களுக்கு அமீரகத்தின் பாரம்பரியத்தைப் பற்றி அறியவும், உலகின் பல்வேறு பகுதிகளிலிருந்தும் கலாச்சாரங்களை வெளிப்படுத்தவும் ஒரு சிறந்த வாய்ப்பாகும்.

இந்த ஆண்டு பதிப்பில் யூனியன் தினம் மற்றும் புத்தாண்டு போன்ற முக்கிய நிகழ்வுகள் சிறப்பு விழாக்களுடன் கொண்டாடப்படும் என்றும், மேலும் அனுபவத்தை இன்னும் சிறப்பாக்க புதிய நாடுகளின் பெவிலியன்கள், கச்சேரிகள், நிகழ்வுகள் மற்றும் போட்டிகளும் சேர்க்கப்பட்டுள்ளதாக அறிவிக்கப்பட்டுள்ளது.

இந்த ஃபெஸ்டிவலில் நீங்கள் தவறாமல் பார்க்க வேண்டிய அனைத்து நிகழ்வுகளும் செயல்பாடுகளும் பின்வருமாறு கொடுக்கப்பட்டுள்ளது:

1. ஹெரிட்டேஜ் வில்லேஜ்

விழா நடைபெறும் இடத்தின் மையத்தில் அமைந்துள்ள ஹெரிட்டேஜ் வில்லேஜில் பாரம்பரிய சந்தைகள், கைவினைப்பொருட்கள் மற்றும் நேரடி பாரம்பரிய நிகழ்ச்சிகள் உட்பட பல கலாச்சார மற்றும் பாரம்பரிய செயல்பாடுகளை ஆராயலாம். அங்குள்ள எமிராட்டி டென்ட் உணவகம் (அல் கெய்மா) சமையல் அனுபவத்தின் மூலம் பார்வையாளர்களுக்கு ஐக்கிய அரபு அமீரகத்தின் கடந்த கால பயணத்தை வழங்கும் என்று கூறப்படுகிறது.

2. நாடுகளின் பெவிலியன்கள்

இந்த ஃபெஸ்டிவலில் பல்வேறு நாடுகளின் பெவிலியன்களையும் நீங்கள் பார்வையிடலாம், இது ஒவ்வொரு நாட்டின் கலாச்சாரங்கள், பழக்கவழக்கங்கள் மற்றும் தனித்துவமான கூறுகளைப் பற்றி அறிய அனுமதிக்கிறது. மேலும், அங்கு விருந்தினர்களுக்காக நடவடிக்கைகள் மற்றும் நிகழ்ச்சிகள் ஏற்பாடு செய்யப்படும். இந்தாண்டு பதிப்பில் கூடுதல் பெவிலியன்கள் சேர்க்கப்பட்டுள்ளது.

3. தீம் பார்க்

இந்த சீசனில், ஃபெஸ்டிவலின் தீம் பார்க், அனைத்து வயதினருக்கும் ஏற்றவாறு, விர்ச்சுவல் ரியாலிட்டி தொழில்நுட்பத்தால் மேம்படுத்தப்பட்ட புதிய சவாரிகளைக் கொண்டிருக்கும் என்று தெரிவிக்கப்பட்டுள்ளது. இதில் திரில் அனுபவங்களைத் தேடுபவர்களுக்கான ‘Haunted House’ மற்றும் பல சாகசங்கள் மற்றும் விளையாட்டுகள் போன்றவை அடங்கும்.

4. உலக சாதனை படைத்த வானவேடிக்கைகள்

இந்த ஆண்டு, முதன்முறையாக, இரண்டு வாரங்கள் நீடிக்கும் ஒரு சிறப்பு திருவிழா ஏற்பாடு செய்யப்படும் மற்றும் புதிய கின்னஸ் உலக சாதனைகளை உருவாக்கும் முக்கிய வானவேடிக்கை காட்சிகள் உட்பட பல்வேறு நிகழ்வுகள் இடம்பெறும் என்று கூறப்பட்டுள்ளது. இவற்றுடன் அற்புதமான ட்ரோன் மற்றும் லேசர் காட்சிகளையும் நீங்கள் எதிர்பார்க்கலாம்.

5. புதிய மியூசிக்கல் ஃபவுன்டைன்

இந்த சீசனில், வெவ்வேறு நீர் விளையாட்டுகள் மற்றும் நீரின் இயக்கத்துடன் ஒத்திசைக்கப்பட்ட இசை நிகழ்ச்சிகள் அடங்கிய புதிய மியூசிக்கல் ஃபவுன்டைன் செயல்பாடுகள் அறிவிக்கப்பட்டுள்ளன.

6. ஃப்ளோட்டிங் மார்க்கெட்

அல் வத்பா மிதக்கும் சந்தையானது (சியாம் பாரடைஸ்) பல்வேறு ஆசிய நடவடிக்கைகள் மற்றும் பாரம்பரிய கைவினைப்பொருட்கள், குடை ஓவியம் மற்றும் பல உணவகங்கள் போன்றவற்றைக் கொண்டுள்ளது.

7. ‘ஹெலிகாப்டர்’ அனுபவம்

ஃபெஸ்டிவலின் மற்றொரு சிறப்பம்சமாக ‘ஹெலிகாப்டர்’ அனுபவம் இருக்கும். பார்வையாளர்கள் அங்கு விர்ச்சுவல் ரியாலிட்டி மூலம் பறக்கும் 5D அனுபவத்தை அனுபவிக்க முடியும்.

8. தேன் கண்காட்சி மற்றும் டேட் ஃபெஸ்டிவல்

இங்கு ஐக்கிய அரபு அமீரகத்தில் உள்ள தேன் உற்பத்தித் துறையை ஆதரித்து, சிறந்த மற்றும் அரிதான தேன் வகைகளைக் கண்டறியவும், டேட் ஃபெஸ்டிவலில் சில சிறந்த உள்ளூர் பேரிச்சம்பழங்களை வாங்கவும் முடியும்.

9. திறன் திட்டம்

அபுதாபி மீடியா நெட்வொர்க்குடன் இணைந்து தொழில்நுட்பம் மற்றும் தொழிற்கல்வி மற்றும் பயிற்சிக்கான அபுதாபி மையம் ஏற்பாடு செய்துள்ள ‘Skills’ நிகழ்ச்சி முதன்முறையாக இவ்விழாவில் இடம்பெற உள்ளது.

இந்தத் திட்டமானது மாணவர்களின் திறன்கள் மற்றும் சமூகத்திற்கான அவர்களின் பங்களிப்புகளை வெளிப்படுத்தும் பல்வேறு நிகழ்வுகள் மற்றும் போட்டிகளைக் கொண்டிருக்கும், உலகளாவிய திறன் போட்டிகளில் ஐக்கிய அரபு அமீரகத்தை பிரதிநிதித்துவப்படுத்தும் போது, ​​தொழில்நுட்ப மற்றும் தொழில்முறை துறைகளில் திறமையான குடிமக்களை சர்வதேச தரத்தின்படி போட்டியிட ஈர்க்கும்.

10. கார் ஷோ

அல் வத்பா கஸ்டம் ஷோ கிளாசிக் கார்கள், ஆஃப்-ரோடு வாகனங்கள் மற்றும் அவற்றின் எஞ்சின்களை மேம்படுத்துவதற்கான சிறந்த முறைகளைப் பற்றி அறிய ஒரு தனித்துவமான வாய்ப்பை வழங்குகிறது. மேலும், சுவாரஸ்யமான மாற்றியமைக்கப்பட்ட வாகனங்கள் காட்சிக்கு வைக்கப்படும் மற்றும் பரிசுகளுடன் கூடிய போட்டிகளும் சிறப்பு ஒர்க் ஷாப்களும் ஏற்பாடு செய்யப்படும் என்று தெரிவிக்கப்பட்டுள்ளது.

11. அல் வத்பா இரவு கச்சேரிகள்

அல் வத்பா நைட்ஸ் கச்சேரிகளில் சிறந்த அரபு பாடகர்கள், கலைஞர்கள் மற்றும் நட்சத்திரங்கள் பார்வையாளர்களை உற்சாகப்படுத்துவார்கள். நிகழ்ச்சிகள் பாரம்பரிய மற்றும் தேசிய மற்றும் நாட்டுப்புற மற்றும் நவீன பாடல்கள் வரை இருக்கும்.

வீக்லி ஃபெஸ்டிவல்

இந்த ஆண்டு மற்றொரு புதிய அம்சம் வாராந்திர விழாக்கள் ஆகும். பின்வரும் நிகழ்வுகள் இதில் அடங்கும்:

1. தேசிய தின கொண்டாட்டங்கள்
2. குழந்தைகள் மற்றும் கார்ட்டூன் கதாபாத்திரங்கள் திருவிழா
3. புத்தாண்டு கொண்டாட்ட விழா
4. கலைகள், மலர்கள் மற்றும் தாவரங்கள் திருவிழா
5. கிழக்கு ஆசிய விழா
6. உணவு மற்றும் இனிப்பு திருவிழா
7. ரமலான் பண்டிகை

கூடுதல் நிகழ்வுகள் மற்றும் போட்டிகள்

மேலே பட்டியலிடப்பட்டுள்ள அனைத்து நிகழ்வுகள் மற்றும் அனுபவங்களைத் தவிர, திருவிழாவில் பல நிகழ்வுகள் ஆண்டுதோறும் நடத்தப்படுகின்றன, அவற்றுள்:

• ஒரு பந்தய திருவிழா (racing festival)
• ஒரு தோவ் பாய்மரப் பந்தயம் (Dhow sailing race)
• ஒரு பால்கன்ரி போட்டி (falconry competition)
• ஒட்டக பந்தய கிராண்ட் பரிசு
• பாரம்பரிய சமையல் போட்டி

எப்படி செல்வது?

அபுதாபியின் அல் வத்பா பகுதியில் இந்த  ஃபெஸ்டிவல் நடைபெறுகிறது. பார்வையாளர்கள் ஷேக் சையத் சாலை E11ஐப் பயன்படுத்தி, அல் அய்ன் சாலை/E22 எக்ஸிட் வழியே சென்றால் இலக்கை எளிதாக அடையலாம். அல் வத்பா சாலையில் ஒன்றிணைந்து பின்னர் லேன் 2121 க்கு செல்லவும். ரவுண்டானாவில், லேன் 2124 ஐ நோக்கி இடதுபுறமாகச் செல்லவும், இது ஷேக் சையத் ஃபெஸ்டிவலின் நுழைவாயிலுக்கு உங்களை அழைத்துச் செல்லும்.

இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel