ஐக்கிய அரபு அமீரகத்தில் மூன்று மாதங்களுக்கும் மேலாக காணாமல் போன கேரளாவைச் சேர்ந்த 42 வயது இந்தியரின் உடல், அடக்கம் செய்யப்படுவதற்கு சில மணி நேரங்களுக்கு முன்பு கடந்த செவ்வாய்க்கிழமையன்று இந்தியாவுக்கு அவரின் உடல் அனுப்பப்பட்ட சம்பவம் ஒன்று நிகழ்ந்துள்ளது. இதற்கிடையில், அவர் சிறையில் இருப்பதாக நினைத்துக் கொண்டிருந்த அவரது குடும்பத்தினருக்கு, மூன்று மாதங்களுக்குப் பிறகே அவர் இறந்துவிட்டார் என்ற உண்மை தெரிய வந்துள்ளது அந்த குடும்பத்தினரை பெரும் துயரை ஏற்படுத்தியுள்ளது.
முன்னாள் டிரைவிங் பயிற்றுவிப்பாளரும் டாக்ஸி ஓட்டுநருமான மறைந்த ஜினு ராஜ் திவாகரன், கடந்த ஜூலை 14 அன்று ஷார்ஜாவில் சாலையோரத்தில் சரிந்து விழுந்து மாரடைப்பால் அதே நாளில் உயிரிழந்திருக்கிறார். அன்றிலிருந்து மூன்று மாதங்களுக்கும் மேலாக அவரது உடல் ஷார்ஜா காவல்துறை தடயவியல் துறையில் உரிமை கோரப்படாமல் இருந்ததாகக் கூறப்படுகிறது.
அதையடுத்து, இறந்தவரின் சகோதரி ஜிஜியின் சார்பாக கேரள உயர் நீதிமன்றத்தின் மூத்த மத்திய நிலை ஆலோசகரான வழக்கறிஞர் சினில் முண்டப்பள்ளி, அமீரகத்தைச் சேர்ந்த சமூக தன்னார்வலர் பிரசாத் ஸ்ரீதரனை அக்டோபர் 24 அன்று தொடர்பு கொண்டதை அடுத்து இந்த வழக்கு வெளிச்சத்துக்கு வந்தது. அவர் மூன்று மாதங்களாக காணாமல் போனதாகக் கேள்விப்பட்டபோது, ஷார்ஜாவில் உள்ள மற்ற தன்னார்வலர்களையும் சமூக உறுப்பினர்களையும் அணுகியுள்ளார்.
ஜினுவின் சகோதரி கடைசியாக ஜூலை 7 ஆம் தேதி அவருடன் பேசியதாகவும், தொடர்பு துண்டிக்கப்பட்ட பிறகு, ஜினு போக்குவரத்து விதிமீறலுக்காக கைது செய்யப்பட்டதாக ஒரு சமூக உறுப்பினர் அவருக்குத் தவறான தகவலை அளித்ததாகவும் தெரிவித்துள்ளார். மேலும், அவர் இதை நம்பி, பல்வேறு சிறைகளில் அவரைக் கண்டுபிடிக்க பல மாதங்கள் முயற்சித்ததாகவும், பிரசாத் மருத்துவமனைகள் மற்றும் அதிகாரிகளிடம் விசாரித்தபோதுதான் உண்மை வெளிப்பட்டது என்பதையும் குறிப்பிட்டுள்ளார்.
ஐக்கிய அரபு அமீரகத்தின் விதிமுறைகளின் கீழ், உரிமை கோரப்படாத உடல்கள் மூன்று மாதங்களுக்குப் பிறகு நாட்டிற்குள்ளேயே அடக்கம் செய்யப்படுகின்றன. அவ்வாறு உரிமை கோரப்படாமல் இருந்த ஜினுவின் உடலை அக்டோபர் 27 ஆம் தேதி அடக்கம் செய்ய திட்டமிடப்பட்ட நிலையில், பிரசாத் மற்றும் பிற சமூக உறுப்பினர்கள் விரைந்து செயல்பட்டு உடலைப் பெற்றுள்ளனர். YAB சட்ட ஆலோசனை நிறுவனத்தின் சலாம் பாப்பினிசேரி மற்றும் PRO நிஹாஸ் ஹாஷிம் மூலம், அவர்கள் ஜினுவின் அடையாளத்தைச் சரிபார்த்து, உடலை அமீரகத்தில் அடக்கம் செய்வதற்குப் பதிலாக தாய்நாட்டிற்கு அனுப்ப அனுமதிக்கும் நீதிமன்ற உத்தரவைப் பெற்றதாக அவர்கள் தெரிவித்துள்ளனர்.
பல ஆண்டுகளாக ஜினுவுடன் தொடர்பில் இல்லாத அமீரகத்தில் வசிக்கும் ஒரு உறவினர், சட்டப்பூர்வ முறைகளை முடிக்க முன்வந்ததாகவும், உறவின் சான்றுகள் வழங்கப்பட்டவுடன், நீதிமன்றம் தாய்நாட்டிற்கு திருப்பி அனுப்ப ஒப்புதல் அளித்ததாகவும் கூறப்படுகிறது.
மேலும், நாட்டில் உள்ள சமூக தன்னார்வலர்கள் மற்றும் நலம் விரும்பிகள் 5,430 திர்ஹம் நிதி திரட்டி உடலை திருவனந்தபுரத்திற்கு அனுப்பி வைத்த நிலையில், கேரள அரசின் நலவாழ்வு நிறுவனமான நோர்கா, ஜினுவின் சொந்த ஊரான பத்தனம்திட்டாவின் மலப்புழாவிற்கு எடுத்துச் செல்ல இலவச ஆம்புலன்ஸ் சேவையை வழங்கியிருக்கிறது.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil Whatsapp Channel
