ஜனவரி 20 அன்று மாலை ஷார்ஜாவில் உள்ள ஒரு உணவகத்தின் நுழைவாயிலில் ஒரு கார் மோதி விபத்துக்குள்ளான சம்பவம் அப்பகுதியினரிடையே பரபரப்பை ஏற்படுத்தியுள்ளது. அதிர்ஷ்டவசமாக, விபத்தில் யாருக்கும் காயம் ஏற்படவில்லை என்று உணவக நிர்வாகம் உறுதிப்படுத்தியுள்ளது.
நேற்று சரியாக இரவு 8.30 மணியளவில் அல் நப்பா பகுதியில் (Al Nabba) உள்ள ‘Bundoo Khan’ என்ற உணவகத்தில் இந்த சம்பவம் நிகழ்ந்ததாகக் கூறப்படுகிறது. இது தொடர்பாக இணையத்தில் பரவி வரும் வீடியோ ஒன்றில், கட்டுப்பாட்டை இழந்த ஒரு டாக்ஸி திடீரென உணவகத்தின் கண்ணாடி கதவுகளில் அதிவேகத்தில் மோதுவதைக் காணமுடிகிறது. அந்த நேரத்தில், சில வாடிக்கையாளர்கள் மட்டுமே உள்ளே இருந்ததாக அங்கிருந்தவர்கள் குறிப்பிடுகின்றனர்.
டாக்ஸி உணவகத்தின் கண்ணாடி நுழைவாயிலில் மோதியதால், கதவு உடைந்து, வாகனத்தின் முன்பக்கத்தில் குறிப்பிடத்தக்க சேதம் ஏற்பட்டுள்ளது. காரின் முன்பக்கத்தில் தாக்கிய உடனேயே ஏர்பேக்குகள் பயன்படுத்தப்பட்டதால் டாக்ஸி ஓட்டுநரும் காயமின்றி உயிர் தப்பியுள்ளார்.
உணவக ஊழியர்கள் மற்றும் வாடிக்கையாளர்களின் நிலை
இந்த உணவகத்தை நடத்தும் பொது மேலாளர் ஃபசல் ரஹ்மான் அப்பாசி என்பவர், உணவகத்திற்குள் இருந்த அனைவரும் பாதுகாப்பாக இருப்பதாக ஊடகங்களிடம் தெரிவித்துள்ளார். மேலும் “அதிர்ஷ்டவசமாக, கதவுக்கு அருகில் யாரும் நிற்கவில்லை. அனைத்து வாடிக்கையாளர்கள் மற்றும் ஊழியர்களும் காயமின்றி தப்பினர்,” என்று அவர் கூறியுள்ளார்.
விபத்திற்கான காரணம்
அப்பாசியின் கூற்றுப்படி, குறுகிய சாலையில் மற்றொரு வாகனம் பின்னால் ஹாரன் அடித்தபோது பீதியடைந்த ஓட்டுநர் தவறுதலாக பிரேக்கிற்கு பதிலாக ஆக்ஸிலரேட்டரை அழுத்தியதால் விபத்து ஏற்பட்டது என்பது தெரிய வந்துள்ளது.
அதுமட்டுமில்லாமல், விபத்து நடந்த சிறிது நேரத்திலேயே காவல்துறையினர் சம்பவ இடத்திற்கு வந்து, நிலைமையை நிர்வகிக்கவும், சம்பந்தப்பட்டவர்களுக்கு உதவவும் முயன்றதாக அவர் தெரிவித்துள்ளார்.
அத்துடன் காப்பீடு சேதத்தை ஈடுகட்டும் என்றும், மேலும் உடைந்த கண்ணாடி கதவு அடுத்த நாளுக்குள் சரிசெய்யப்படும் என்று எதிர்பார்ப்பதாகவும் ஃபசல் தெரிவித்துள்ளார்.
சுமார் ஒரு வருடம் முன்பு திறக்கப்பட்ட உணவகம் இந்த சம்பவம் ஏற்பட்ட போதிலும், தொடர்ந்து செயல்பட்டு வாடிக்கையாளர்களுக்கு சேவை செய்ததாக அக்கம்பக்கத்தினர் தெரிவித்துள்ளனர்.
இவ்வாறு வாகனங்கள் கடைகள் மற்றும் உணவகங்களில் மோதி விபத்துக்கள் ஏற்படும் சம்பவங்கள் புதிதல்ல, பல ஆண்டுகளாக ஐக்கிய அரபு அமீரகம் முழுவதும் இதுபோன்ற விபத்துகள் பதிவாகியுள்ளன, பெரும்பாலும் ஓட்டுநர் தவறு, வேகம், மருத்துவ அவசரநிலைகள் அல்லது குடிபோதையில் வாகனம் ஓட்டுதல் காரணமாக கடுமையான விபத்துகள் ஏற்பட்டுள்ளதாக அறிக்கைகள் கூறுகின்றன. குறிப்பாக பரபரப்பான வணிகப் பகுதிகளில் சில விபத்துகள் சொத்து சேதத்தை மட்டுமே விளைவித்தாலும், மற்றவை கடுமையான காயங்கள் மற்றும் இறப்புகளை ஏற்படுத்தியிருப்பதாகவும், இது சாலை பாதுகாப்பு மற்றும் எச்சரிக்கையின் முக்கியத்துவத்தை எடுத்துக்காட்டுகிறது என்றும் அதிகாரிகள் வலியுறுத்துகின்றனர்.
இது போன்ற அமீரகத்தின் முக்கிய செய்திகள் மற்றும் அன்றாட தகவல்களை அறிந்து கொள்ள எங்களின் Khaleej Tamil வாட்ஸ்அப் சேனலில் இணைந்து கொள்ளுங்கள்.
Link: Khaleej Tamil WhatsApp Channel
