அமீரகத்தில் வாங்கிய லோன் நிலுவையில் இருக்கும் போது, வேலையை இழந்தால் என்னவாகும்..?? கடனைச் செலுத்தத் தவறினால் பயணத்தடை விதிக்கப்படுமா..?? சட்டம் கூறுவது என்ன..??

ஐக்கிய அரபு அமீரகத்தில் உள்ள ஒரு நிறுவனத்தில் பணிபுரியும் ஊழியர் ஒருவர் அவரது வேலையை இழந்த நேரம், அவரது வங்கிக் கடன்கள் நிலுவையில் இருந்தால் பயணத்தடை விதிக்கப்படுமா? வேலையை இழந்தால் அவருடைய கடன் என்னவாகும்? இது போன்ற சில சந்தேகங்கள் சிலருக்கு உண்டு.

இந்த சந்தேகங்களுக்கான பதில் மற்றும் விளக்கத்தைப் பின்வருமாறு பார்க்கலாம். உதாரணத்திற்கு, நீங்கள் அமீரகத்தில் உள்ள வங்கிகள் அல்லது நிதி நிறுவனங்களிடம் இருந்து தனிநபர் கடனைப் பெற்றிருக்கிறீர்கள் என்று வைத்துக் கொள்வோம்.

அமீரக மத்திய வங்கியால் அங்கீகரிக்கப்பட்ட கடன் ஒப்பந்த வடிவங்களின் படி, கடன் வாங்குபவருக்கு தனிநபர் கடன் வழங்கப்படும் போது, ​​கடன் கொடுத்தவர் (வங்கி) கடனின் வரம்பிற்கு ஒரு காசோலையை (security cheque) பத்திரமாக சேகரிக்கலாம்.

மேலும், தனிநபர் கடன் ஒப்பந்த வடிவத்தின் பிரிவு 4(4) இன் படி, கடன் வாங்கியவர் தொடர்ச்சியாக மூன்று தவணைகள் அல்லது ஆறு தொடர்ச்சியான தவணைகளை செலுத்தத் தவறினால், எந்தவொரு அறிவிப்பும் அல்லது நீதிமன்றத் தீர்ப்பையும் வழங்காமல் அவரின் அனைத்து தவணைகள், வட்டிகள் மற்றும் வேறு ஏதேனும் கட்டணங்கள் மற்றும் செலவுகள் உடனடியாக செலுத்த வேண்டியவையாக மாறும் என்பது குறிப்பிடத்தக்கது.

இதனால், லோன் கொடுத்த வங்கியானது குறிப்பிட்ட கடனாளியின் காசோலையை அவரது செலுத்த வேண்டிய தொகையை வசூலிப்பதற்காக டெபாசிட் செய்ய தேர்வு செய்யலாம். ஒருவேளை, காசோலையில் போதிய இருப்பு இல்லாததன் காரணமாக அந்த காசோலை மதிப்பிழந்தால், 2020 ஆம் ஆண்டின் ஃபெடரல் ஆணைச் சட்டம் எண். 14 இன் விதிகளின்படி, வங்கியானது கடனாளிக்கு எதிராக பயணத் தடையை விதிக்கக் கோரிக்கை வைப்பதுடன் ஒரு வழக்கையும் தாக்கல் செய்யலாம்.

மாறாக, 10,000 திர்ஹம்களுக்கு மேல் நிலுவையில் உள்ள லோனாக இருந்தால், வங்கி சம்பந்தப்பட்ட நீதிமன்றத்தை அணுகி கடன் வாங்கியவருக்கு பயணத் தடை விதிக்கக் கோரலாம். அதுமட்டுமின்றி, வங்கியானது நிலுவையில் உள்ள கடனை மீட்பதற்காக நீதிமன்றத்தில் கடனாளிக்கு எதிராக ஒரு கட்டண உத்தரவு வழக்கு அல்லது ஒரு சிவில் வழக்கு தாக்கல் செய்யவும் விருப்பம் உள்ளது.

குறிப்பாக, நீதிமன்றம் வழங்கும் இறுதித்தீர்ப்பு கடனாளிக்கு எதிராக வந்துவிட்டால், வங்கி ஒரு கடனாளிக்கு எதிராக வழக்கு நடவடிக்கைகளைத் தொடரலாம், மேலும் அதில் பயணத் தடை விதிக்கவும் மற்றும் கடனாளிக்கு எதிராக கைது வாரண்ட் பிறப்பிக்கவும் கோரிக்கை இருக்கலாம் என கூறப்படுகின்றது.

ஆகவே, மேற்கூறிய சட்ட நடவடிக்கைகளின் அடிப்படையில், உங்கள் நிறுவனத்தால் உங்களுக்கு வேலை நிறுத்தம் வழங்கப்படும் என்று நீங்கள் எதிர்பார்க்கிறீர்கள் என்றால், வாங்கிய கடனை திருப்பிச் செலுத்துவதில் பிரச்சனை ஏற்படுவதை தவிர்ப்பதற்காக, உங்கள் வேலையை இழந்த பிறகும் உங்கள் வழக்கமான மாதாந்திர தவணைகளைத் தொடர்ந்து செலுத்துமாறு பரிந்துரைக்கப்படுகிறது.

அதையும் மீறி, நீங்கள் தனிநபர் கடனின் மாதாந்திர தவணைகளை செலுத்தத் தவறினால், வங்கியானது மேற்கூறியபடி, உங்களுக்கு எதிரான சட்ட நடவடிக்கைகளைத் தொடங்கலாம்.

அத்துடன் உங்கள் வங்கியுடன் நீங்கள் வைத்திருக்கும் தனிநபர் கடன் ஒப்பந்தத்தின் விதிமுறைகளின் அடிப்படையில், உங்கள் முதலாளியால் நீங்கள் பணிநீக்கம் செய்யப்பட்டவுடன், உங்கள் தற்போதைய முதலாளியால் உங்கள் வங்கிக் கணக்கில் செலுத்தப்பட்ட உங்கள் சேவையின் இறுதிப் பலன்களின் தொகையானது நிலுவையில் உள்ள கடன்களுக்காகப் பயன்படுத்தப்படலாம்.

எனவே, முன்கூட்டியே உங்கள் வேலை நிறுத்தப்படுவதற்கான சாத்தியக்கூறுகள் குறித்து கடன் வழங்குபவருக்கு நீங்கள் தெரிவிக்கலாம் மற்றும் உங்கள் தற்போதைய வேலை முடிவடைந்ததும் உங்கள் வங்கிக் கணக்கை முடக்க வேண்டாம் என்றும் கடனளித்த வங்கியிடம் கோரலாம். அத்துடன் நீங்கள் இன்னொரு வேலையை பெறும் வரை மாதாந்திர திருப்பிச் செலுத்தும் தவணைகளைத் தொடர்ந்து செலுத்துவீர்கள் என்று வங்கிக்கு உறுதியளிக்க வேண்டும் என்பதும் குறிப்பிடத்தக்கது.