உலகின் பாதுகாப்பான நகரங்களின் வரிசையில் அபுதாபி தொடர்ந்து முதலிடம்…. தனியாக நடக்கும்போது பாதுகாப்பாக உணர்வதாக மக்கள் கருத்து…!!
உலகின் பாதுகாப்பான நகரங்களின் பட்டியலில் அபுதாபி தொடர்ந்து ஆறாவது ஆண்டாக முதலிடத்தைப் பிடித்துள்ளது. Numbeo Safety Index 2022 என்ற ஆன்லைன் தளத்தில் வெளியிடப்பட்டிருக்கும் 10 பாதுகாப்பான நகரங்களின் தரவரிசைப் பட்டியலில் அபுதாபி முதலிடத்திலும் அமீரகத்தின் மற்ற நகரங்களான ஷார்ஜா 4-வது இடத்திலும் துபாய் 8-வது இடத்திலும் இடம்பெற்றுள்ளன.
வாழ்க்கைச் செலவு, பாதுகாப்பு, மாசுபாடு மற்றும் குற்றங்கள் தொடர்பான கேள்விகள் குறித்த பயனர் கருத்துகளின் அடிப்படையில் Numbeo பட்டியல் 459 நகரங்களை வரிசைப்படுத்துகிறது. அதில் 88.4 என்ற பாதுகாப்பு குறியீட்டுடன், அபுதாபி உலகின் பாதுகாப்பான இடமாக வாழவும், வேலை செய்யவும் மற்றும் முதலீடு செய்யவும் அதன் நிலையை வலுப்படுத்தியுள்ளது.
இதன்படி குற்றம், கடத்தப்படுவோமோ அல்லது கொள்ளையடிக்கப்படுமோ என்ற பயம் மற்றும் போதைப்பொருள் பயன்பாடு ஆகியவற்றில் அபுதாபி ‘மிகக் குறைவான’ தரவரிசையில் உள்ளது. மேலும் தனியாக நடக்கும்போது மிக பாதுகாப்பாக உணரும் நகரங்களின் வரிசையில் அபுதாபி ‘மிக அதிக’ மதிப்பெண் பெற்றிருக்கின்றது.
2009 இல் நிறுவப்பட்ட Numbeo என்பது ஒரு கூட்டு ஆன்லைன் தரவுத்தளமாகும், இது பயனர்கள் தகவலைப் பகிர்ந்து கொள்ளவும் ஒப்பிடவும் உதவுகிறது. ஐக்கிய அரபு அமீரகமானது சமீபத்தில் மக்கள் இரவில் தனியாக நடக்கும் போது மிக பாதுகாப்பாக உணரும் நாடுகளின் பட்டியலில் முதலிடம் பிடித்துள்ளது குறிப்பிடத்தக்கது.
Gallup இன் 2021 உலகளாவிய சட்டம் மற்றும் ஒழுங்கு அறிக்கையில் 95% குடியிருப்பாளர்கள் அமீரகத்தில் பாதுகாப்பாக இருப்பதாக உறுதிப்படுத்தியுள்ளனர். இந்த அங்கீகாரத்திற்கு பதிலளித்து, ஐக்கிய அரபு அமீரக துணைத் தலைவரும் பிரதமரும், துபாய் ஆட்சியாளருமான ஷேக் முகமது பின் ரஷித் அல் மக்தூம் அவர்கள், “குடியிருப்பாளர்கள் அமீரகத்தில் இரவில் பாதுகாப்பாக தனியாக நடக்கலாம். பாதுகாப்பு என்பது ஒரு ஆசீர்வாதம் மற்றும் பாதுகாப்பு என்பது அமைதியைக் குறிக்கிறது. மகிழ்ச்சியான வாழ்க்கை. ஒரு பெண் தனியாக, பகல் நேரத்திலோ அல்லது இரவு நேரத்திலோ பயமின்றி நடக்க முடியும் என்று சொன்னால், அவர் ஐக்கிய அரபு அமீரகத்தில் இருப்பதை நீங்கள் அறிந்து கொள்ள வேண்டும்” என பெருமிதமாக தனது ட்விட்டர் பக்கத்தில் தெரிவித்திருந்ததும் குறிப்பிடத்தக்கது.
